Chru HEBRƠ 4

Pơnuaĭ Pơdời-Gleh Bloh Yàng Pô Lơngì Hũ Đờm Pơguăn

1 Yơu nư̆n, lăm tŭ dò hũ pơnuaĭ đờm pơguăn brơi tơma lăm pơnuaĭ pơdời-gleh Yàng, nư̆n păl huơĭ kơ-ù bĕ, huơĭ lài lăm buơl gudrơi hũ mơnih lơi lơhiă thĭt pơnuaĭ hơnàn-pơtuah hũ tơma ơu. 2 Kơyoa Pơnuaĭ-Siàm hũ pơto-akhàn tơ buơl gudrơi kŭng mơhiơ̆ yơu tơ buơl guñu rơi, bloh pơnuaĭ buơl guñu hũ mơhư̆ 'buh ba truh pơnuaĭ kwơ-màng hơgĕ, kơyoa lăm tŭ păng, buơl guñu 'buh đồ-lĕng pơnuaĭ nư̆n sơ̆ng pơnuaĭ păng-tui. 3 Mư̆ng pơ-ơnah buơl gudrơi la du mơnih hũ păng-tui, nư̆n tơma lăm pơnuaĭ pơdời-gleh, yơu Yàng Pô Lơngì hũ đờm:

“Yơu Kơu hũ tơpah-sri lăm pơnuaĭ anok-anoa prŏng Kơu:

Guñu rơŭ 'buh tŭ lơi hũ tơma lăm pơnuaĭ pơdời-gleh Kơu!” *

Yah lài du bruă Pô hũ wĭl-tơ̆l abih mư̆ng tŭ c̆ơmrừp c̆rơ̆ng-tơbiă lơngì-tơsì tơnah-rơya. 4 Kơyoa hũ anih Pô đờm mư̆ng hơrơi tơjuh lài:

“Hơrơi tơjuh, Yàng Pô Lơngì pơdời-gleh abih tơgrơ̆ bruă Pô.” †

5 Mư̆ng pơnuaĭ ni, Pô đờm wơ̆:

“Guñu rơŭ 'buh tŭ lơi tơma lăm pơnuaĭ pơdời-gleh Kơu.” ‡

6 Yơu nư̆n, anih pơdời-gleh nư̆n sơđaŭ dò tô pioh tơ du mơnih tơma. Dò du mơnih dơlhơu thrơi hũ mơhư̆ pơto-akhàn Pơnuaĭ-Siàm bloh 'buh hũ tơma lăm nư̆n, la kơyoa buơl guñu 'buh păng-bơbah. 7 Nư̆n hơdơi ni suơi biă, lăm sa pơnuaĭ pơđik adoh-mơyòm Đabit, Yàng hũ ngă-nìn sa hơrơi pơkơ̆n wơ̆ angăn la “hơrơi ni,” yơu hũ đờm tơ ngŏ:

“Hơrơi ni yah buơl guhã mơhư̆ săp Pô,

Nư̆n juơi kră-khăng hơtai-hơtiàn.” §

8 Kơyoa yah Jôsue hũ brơi buơl guñu pơdời-gleh, nư̆n Yàng Pô Lơngì 'buh dò đờm mư̆ng sa hơrơi pơkơ̆n tra. 9 Yơu nư̆n, sơđaŭ dò sa hơrơi pơdời-gleh sa'bat tơ buơl làng Yàng Pô Lơngì. 10 Kơyoa aràng sơi tơma lăm pơnuaĭ pơdời-gleh Yàng Pô Lơngì nư̆n pơdời-gleh bruă drơi, kŭng yơu Yàng Pô Lơngì hũ pơdời-gleh bruă Pô rơi.

11 Kơyoa nư̆n, buơl gudrơi păl abih pràn-hơtai tô tơma lăm pơnuaĭ pơdời-gleh nư̆n, tô 'buh hũ sa aràng mơnih lơi lăm buơl gudrơi tui krơh du mơnih 'buh păng-bơbah dih bloh sơnĕ lơbuh. 12 Kơyoa pơnuaĭ Yàng Pô Lơngì la pơnuaĭ hơdiŭ sơ̆ng gơdrưh-sơnak, lơhư̆ rơlau đào dua dơlah, hơluh tơma tơ̆l truh pơklah-krơi bơngă-joa sơ̆ng hơtai-bơngă, kơyồl-tơlàng sơ̆ng gơlo-tơlàng, c̆ahrơña du pơnuaĭ sơnư̆ng sơ̆ng du pơnuaĭ ngă-nìn lăm hơtai-hơtiàn. 13 'Buh sa phơ̆n hũ c̆rơ̆ng-tơbiă lơi rơgơi ac̆ĭng-bơdơŭ jiơ̆ng tơ anaŭ Yàng, bloh abih tơgrơ̆ phơ̆n rơŭ păl kŭl-sơlŭn sơ̆ng ràng-tơbiă tơ anaŭ Pô, la Pô bloh buơl gudrơi păl đờm akhàn wơ̆ mư̆ng abih tơgrơ̆ bruă. *

Yàng Jêsu Krist La Mơnih Gơnuăr Prŏng Apăn-Akŏ Pơyă Phơ̆n Duh-Dơlbăt Pơnuaĭ Pơguăn-Pơđoàn Bơrhơu

14 Yơu nư̆n, kơyoa buơl gudrơi hũ sa aràng mơnih gơnuăr prŏng apăn-akŏ pơyă phơ̆n duh-dơlbăt hũ nau găn du tăl lơngì, nư̆n la Yàng Jêsu, Anà Yàng Pô Lơngì, nư̆n păl păng-rơmiă kơjăp tơgrơ̆ pơnuaĭ buơl gudrơi hũ păng-tui đồ-mă. 15 Kơyoa 'buh iơŭ buơl gudrơi hũ sa aràng mơnih gơnuăr prŏng apăn-akŏ pơyă phơ̆n duh-dơlbăt 'buh thơu sơnư̆ng-anĭt truh tơgrơ̆ pơnuaĭ 'buh khăng-pràn buơl gudrơi, bloh buơl gudrơi hũ sa aràng mơnih gơnuăr prŏng apăn-akŏ pơyă phơ̆n duh-dơlbăt hũ kơđòng pơluơ-ơñiai tơ̆l abih tơgrơ̆ mơta yơu buơl gudrơi, bloh 'buh ngă glài sŭng. 16 Yơu nư̆n, buơl gudrơi kơjăp bĕ hơtai-hơtiàn truh jĕ sơbàn Yàng Pô Lơngì, la phŭn-ơkha pơnuaĭ anĭt-brơi-soh, tô đồ-mă hũ pơnuaĭ anĭt-anăr, sơ̆ng duah hũ pơnuaĭ anĭt-brơi-soh tô dŏng-kờl buơl gudrơi lăm tŭ-jơ păl c̆àng.

HEBRƠ
<
4
>

*4:3 4:3 Pơđik Adoh Mơyòm 95:11.

†4:4 4:4 Bơ-àr C̆ơmrừp 2:2.

‡4:5 4:5 Pơđik Adoh Mơyòm 95:11.

§4:7 4:7 Pơđik Adoh Mơyòm 95:7,8.

*4:13 4:13 Hũ du bơ-àr pơkơ̆n wă yơu ni: “'Buh hũ pơnuaĭ hơgĕ lăm dun-ya hũ rơgơi bơdơŭ-tơrđơŭ jiơ̆ng tơ anaŭ Yàng Pô Lơngì. Abih tơgrơ̆ bruă rơŭ hũ ràng-tơbiă loh-làng tơ anaŭ Pô, la Pô bloh buơl gudrơi rơŭ păl đờm akhàn-wơ̆ mư̆ng abih tơgrơ̆ bruă buơl gudrơi ngă.”