Chru GALATI 5

Pơnuaĭ Akŏ-Lơhuai Tơkai-Lơnàng Lăm Pô Krist

1 Pô Krist hũ tơleh-pơklàh buơl gudrơi tô buơl gudrơi hũ akŏ-lơhuai tơkai-lơnàng. Yơu nư̆n, dò dơ̆ng kơjăp bĕ, juơi daŭ drơi tơ ala yơu pơnuaĭ hơlŭn-hơlă sa amăng tra. 2 Dơlhă, Pôl, đờm sơ̆ng buơl adơi-ai lài, yah buơl adơi-ai păl kŏng sơkaŭ-kơlì, nư̆n Pô Krist 'buh kwơ-màng hơgĕ tơ buơl adơi-ai ơu. 3 Sa amăng tra wơ̆, dơlhă yòng đờm nìn-kơjăp sơ̆ng abih tơgrơ̆ mơnih lơi hũ kŏng adăt sơkaŭ-kơlì lài, buơl guñu kŏng pơkơŭ păl păng-bơbah păng-rơmiă wĭl-tơ̆l abih pơnuaĭ adăt-adia. 4 Yah mơnih lơi khiăng hũ angăn rĭng-tơpă kơyoa pơnuaĭ adăt-adia, nư̆n hũ pơklah atàh mư̆ng Pô Krist, lơhiă abih pơnuaĭ anĭt-brơi-soh bơjơ. 5 Mư̆ng pơ-ơnah buơl gudrơi, nư̆n la kơyoa pơnuaĭ păng-tui sơ̆ng gơnừm tơ Bơngă Sơc̆ih-Sri bloh buơl gudrơi hũ đồ-lĕng pơnuaĭ gơnừm-c̆àng mư̆ng pơnuaĭ rĭng-tơpă. 6 Kơyoa lăm Yàng Jêsu Krist, pơnuaĭ hũ kwơ-màng 'buh iơŭ la sơkaŭ-kơlì halài 'buh sơkaŭ-kơlì, bloh la bruă ngă kơyoa pơnuaĭ uơ̆n-rơnăm, tô ràng-tơbiă pơnuaĭ păng-tui drơi.

7 Buơl adơi-ai đuaĭ jak yơu nư̆n bloh aràng sơi hũ pơkơŭ-c̆ơkhă buơl adơi-ai, tô 'buh brơi buơl adơi-ai păng-bơbah ngă tui pơnuaĭ tơpă? 8 Pơnuaĭ pơsŭt-pơđăr nư̆n 'buh truh mư̆ng Pô iơu-rơwah buơl adơi-ai. 9 Sa-sĭt tơpơi ngă rồ-đì abih sa tơnài tơpŭng-bràh. 10 Lăm Yàng, dơlhă păng-tui nìn-kơjăp lài buơl adơi-ai rơŭ 'buh sơnư̆ng krơi sơ̆ng dơlhă; bloh mơnih ngă sơlŭng-sơlăng hơtai-akŏ buơl adơi-ai, 'buh kơrhia la aràng sơi, rơŭ păl kŏng ngă glài mư̆ng pơnuaĭ nư̆n. 11 Ơ buơl adơi-ai, mư̆ng pơ-ơnah dơlhă, yah dơlhă dò pơto-akhàn mư̆ng adăt sơkaŭ-kơlì, nư̆n kơđa hơgĕ dơlhă sơđaŭ dò kơđòng mă-pơkơŭ? Yah biă yơu nư̆n, bruă dơlhă pơto-akhàn mư̆ng kơyơu pơkăl 'buh dò la pơnuaĭ pơkơŭ-c̆ơkhă tra! 12 Dơlhă lơkơu hơgĕ du mơnih ngă sơlŭng-sơlăng tơ buơl adơi-ai, buơl guñu kreo bĕ rùp-phŭn drơi la siàm rơlau!

PƠNUAĬ PƠTO-KƠKƠI

(Mư̆ng tăl 5:13 truh tăl 6:18)

Bruă Ngă Gah Rùp-Phàp Drah-Rơlo Sơ̆ng Bơngă Sơc̆ih-Sri

13 Ơ buơl adơi-ai, buơl adơi-ai hũ iơu-rơwah tô đồ-lĕng pơnuaĭ akŏ-lơhuai tơkai-lơnàng, bloh juơi angui pơnuaĭ akŏ-lơhuai tơkai-lơnàng nư̆n yơu sa pơnuaĭ hơnàn tô hơdiŭ tui gah rùp-phàp drah-rơlo, bloh mă bĕ hơtai-hơtiàn uơ̆n-rơnăm ngă hơlŭn-hơlă duh bruă duă tơ gơŭ. 14 Kơyoa abih pơnuaĭ adăt-adia hũ tơrgùm wơ̆ lăm sa pơnuaĭ ni: “Hã păl rơnăm tơ mơnih gơŭ sa plơi adơi sa 'băng yơu rơnăm rùp-phŭn drơi.” * 15 Bloh yah buơl adơi-ai kừ kĕ hĕt duă gơŭ, nư̆n c̆ơ-kơrhia bĕ, huơĭ buơl adơi-ai pơluĭ-pơlơhiă duă gơŭ wơ̆.

16 Yơu nư̆n dơlhă đờm lài: Yàm nau bĕ tui Bơngă Sơc̆ih-Sri, juơi tŭ lơi ngă tui tô sak-hơtai du pơnuaĭ gah rùp-phàp drah-rơlo hàm-khiăng. 17 Kơyoa rùp-phàp drah-rơlo hũ du pơnuaĭ hàm-khiăng tơrblơ̆ wơ̆ sơ̆ng Bơngă Sơc̆ih-Sri, Bơngă Sơc̆ih-Sri hũ du pơnuaĭ hàm-khiăng tơrblơ̆ wơ̆ sơ̆ng rùp-phàp drah-rơlo; dua gah tămdră-wơ̆ sơ̆ng gơŭ yơu nư̆n, ngă tơ buơl adơi-ai 'buh ngă jiơ̆ng du pơnuaĭ drơi khiăng ngă. 18 Bloh yah buơl adơi-ai hũ Bơngă Sơc̆ih-Sri dùi-ba, nư̆n buơl adơi-ai 'buh dò tơ ala pơnuaĭ adăt-adia tra. 19 Du bruă rùp-phàp drah-rơlo la loh-làng biă, nư̆n la: dri-sơnoh bŭng-pơkăl, sơŭ-sơnoh, mơñŭm 'bơ̆ng lềng-làng 'buh thơu srăp, 20 duh-dơlbăt rơ̆p-ràk, juh proh, mơbai lơmù, tămc̆ok-tămgeh, oàn-mơbai, anok-anoa, hàm-kơrlih, pơc̆ơrlah krơi tơrpuơl, tui jơlàn duh-dơlbăt sŭng, 21 oàn-anok, mơbŭ-mơbèng, hrạ mơñŭm hrạ 'bơ̆ng, găm sơ̆ng tơgrơ̆ bruă pơkơ̆n mơhiơ̆ yơu nư̆n. Dơlhă đờm dơlhơu tơ buơl adơi-ai, yơu dơlhă hũ đờm bơjơ: Yah aràng sơi ngă du bruă yơu nư̆n rơŭ 'buh hũ đồ-lĕng Lơgăr Yàng Pô Lơngì.

22 Bloh boh Bơngă Sơc̆ih-Sri, nư̆n la uơ̆n-rơnăm, sờh-sài, rĭng-lơngai, kŏng ă-ư̆n, siàm hơtai-hơtiàn, lơnguh-lơngui, tơpă sa hơtai-hơtiàn, 'buh yeh-drơi pơglòng-rùp, thơu tư̆ng-kơrhia. 23 'Buh hũ pơnuaĭ adăt-adia lơi pơkơŭ du pơnuaĭ nư̆n. 24 Du mơnih găm sơ̆ng Yàng Jêsu Krist hũ pơ̆ng anà mơnih glài-sơnoh găm sơ̆ng du pơnuaĭ hàm-khiăng gah rùp-phàp drah-rơlo drơi tơ ngŏ kơyơu pơkăl bơjơ. 25 Yah buơl gudrơi gơnừm tơ Bơngă Sơc̆ih-Sri bloh hơdiŭ, nư̆n kŭng yàm nau bĕ tui Bơngă Sơc̆ih-Sri. 26 Juơi tui-duah pơnuaĭ tiơ̆ng-dơnài màng-rơyŭ lơ̆r lơhiă soh, bloh tămc̆ok-tămgeh sơ̆ng oàn-mơbai gơŭ.

GALATI
<
5
>

*5:14 5:14 Lebi 19:18.