JONAH
THEMGAO LEKHABU
Jonah Themgao Lekhabu Sung Thu Umdan
Jonah Themgao Lekhabua kon hi nagel phah loubeh lamkhat nasim doh ding ahi. Ajeh chu kithana, hunam’a kisuhset, hem le thal tho’a gucha michom: Hitobang chondan hi angaija umlou, hichu mimal chung hijongleh gimbolna peh ding thudol aseijin ahi. Hinlah Pakai mingailutna hi miphalou chunga jong aum’e ti thudol jong muchet ahi. Hichea kon hin, Pathen mingailutna jal-a hitobang miphalou ho chung jenga jong hi, ibonchauva ngailutna ineidiu ahiti, i-jildoh theijun ahi.
Chule hiche lekhabua hin Pathen in mijouse angailu’e tihi athupipen a mudoh ahi. Itobang phatlouna hijongleh ngaidamna bukimsel in angaidam in ahi. Ajeh chu Jonah lekhabua kon in Pakaiyin huhhingna thupha jaloute jahsah ding le seiphong peh ding adeisah’ dan thudol muchet ahi.
Lekhabu Jihpa, Ajih Kum Chule Koi Henga Ana Jih Ham?
Hiche lekhabu hi Jonah themgao in Jeroboam II lal lai 785-750 BC sunga anajih ahi. Pathen mingailutna hi ama doute heng’a jong seiphong le dinga Pakaiyin a-themgaote ho ana manchah ahi.
1
Jonah Pakaija Kon Ajam
1 Amittai chapa Jonah kommah Pathen thupeh ahung lhung in, ✡ 2 Lengte 14:25 2 Kipat dohin lang Ninevah kiti khopi lentaha khun gihna thu gaphongdoh tan ajeh chu amite’u gitlouna hi kamu chen tan ahi. 3 Ahinlah Jonah akipat dohin Pakaiya konin akihei mangin Joppa kongkai munlanga achen kong sunga alut in atou man apen Tarshish lam jonin akitoltan ahi. 4 Ahin Pakaiyin twikhanglen chunga chun huipi hattahin ahin nun sahin kong suhkeh theileu chun hui le go nasatahin ahin nuhtan ahi. 5 Kong sepai ho chu thina khop hellin akichatauvin, lung lengvai pumin ama ama Pathen ngehnan ataovun, chuleh kong jankhaina ding chun kong sunga kon chun thil gehsa ho chu aseplha tauvin ahi. Ahinlah Jonah chu kong indan noinung penna akum lhan ana lummin kho helou khopin ana imu lhatan ahi. 6 Hichun kong sepai lamkai pa chun Jonah chu aga mudohin ajah a “A imupa ipi nangaito hitam thoudoh in na Pathen henga tauvin chutileh aman ithigam nadiuva konna hi eihuhdoh theidiu ahi” ati. 7 Hitichun amaho akihouvun, khaije hiche vangsetna hi eiholah a koipen jeh hiding ham vang veuhite akitiuvin, vang avetauvin ahileh Jonah chunga chun achu tan ahi. 8 Hichun amahon Jonah komma ipi jeh'a hitobang vangsetna hi ichunguva chu hitam? Nang koi nahim? Ipi na tong na him? Hoiya konna na hung ham? Koigam mi nahim? tin adong tauvin ahi. 9 Jonah in adonbutin, keima Hebrew mi kahin, Leiset leh Twikhanglen semma van Pathen ging jinga um mi kahi ati. 10 Jonah chun Pathen na konna hung jamdoha ahi chu a seidoh phat in amaho aha kichat behsehun, epi na bolkhel hitam atiuvin ahi. 11 Twikhanglen chu aha khoh cheh cheh phat chun amahon nanghi i-nalo uleng hiche Twikhanglen hi thip thei ding ham atiuvin ahi. 12 Hichun aman amaho koma chun keima hi nei dom sangun lang Twikhanglen'a hin neiseplut leu chun hichi twipi kinong hi tang tante “Ajeh chu hiche twipi kinong hi keijeh ahi” ati. 13 Ahijeng vang'in amahon ajo kham chanun kong chu leigo langa toldoh tei ding agongun ahinlah Twikhanglen kinong chu akhoh cheh jotan, 14 Hijeh chun amaho Jonah Pathen komma chun ataovun “Vo Pakai nei lungset unlang hichi pa chonset jeh'in nei sumang hihun chuleh heche pan thina ato jeh'in keiho mo neipehihbeh un, O Pakai nangin hichi mipa jeh'a hi hitobang thilse hi nasohsah ah bouve ti kahe tauve” atiuvin ahi. 15 Hichun kongtol hon Jonah chu aman’un aselhahuva ahileh Twikhanglen kinong hoisetah chu athipchet jeng tan ahi. 16 Kongtol ho chun Pakai thanei dan chu amudoh phatun akichalheh jingun pumgo thilto abolun kitepna anei tauvin ahi. 17 Hichun Pakaiyin Jonah val lut dingin nga lentah khat ana gongin hiti chun Jonah chu hiche ngapi sunga chun nithum le janthum atham tan ahi. ✡ Matt 12:40
DRAFT COPY