1 Hichun Job apaodoh kit in: 2 Kagenthei naho hi tedoh thei hihen lang ka natna hi kilep toh thei henlang hileh, 3 Twikhanglen'a neldi umjat sangin gih jonte, hiche ho jeh a chu khongai man louhella kaseidoh ji ahi. 4 Hat Chungungpa thal hanging eikap lhuh tah jeh chun athal gu chun kalhagao asukhan, Pathenna kon tijatna ho chu keidou din ahung kigoltoh tauve. 5 Kalunglhai louna thu seitheina tha kanei hilou ham? Gamlah sangan chun nehding hampa akimu jilou teng penglouva umjia chule bongchal ten jong neh ding aneilou teng buji hilou ham? 6 Chiso louna anneh chunga chu mihon alung lhailou nao aseiji louvu ham? A-alna bei ahtwi kang podal khu kon adu ding ham? 7 Kavet jiteng ka-an duna abei jitai, neh dinga kangaito najouse akikhah tansoh jitai.

8 Oh, keiman kadei khat kaki thum thei ding hihen, Pathen chun kadei chu eipeh ding hileh, 9 Aman eisuh chip jeng ding kadeije, akhut ahin lhandoh a chule eitha jeng ding kadeije 10 Natgim genthei thoh'a kimusetna ho a konna hiche beh a hi lung monna kaneiding ahi. Athengpa thusei nahsahmon kabol khapoi. 11 Ahinlah athoh jou nading thahat kaneipoi, keiman hinpi ding imacha kaneipoi. 12 Songthahatna chu nei kahim? Katahsa hi sum eng kisem ham? 13 Ahipoi keima ahin lolhinnaphat gomkom neilou kithopi beihel kahi.

14 Agol apai lhasam khat dinga lungsetna nei mi hiding ahinla nangin Hatchungungpa kicha louvin themmo neichanne. 15 Kasopi teho aphat phat cha long ji vadung neocha banga tahsan theilou, khaltwi vadung neocha akam dima long tobang nahiu naphot chenu ahi. 16 Buhbang lhang le buhbang twi kikhol khom chu, 17 Kholum phat ahung lhun tengleh twi chua amangjin, vadung neucha chu asat jeh chun amang jitai. 18 Kholjin miho chu holdoh kitna ding in akihei doh jiuvin, ahin donding aum loujeh chun athiji tauve. 19 Tema a hung kholjin miho chun twi ahol jiuvin, Sheba a hung kholjin miho chun neiding akinem uve. 20 Akinep nao chu asim jiuvin ahinlah alunglhai jipouve, ahung lhun tengleh akinep nao akisudong jitauve. 21 Nanghon jong kithopina neipe pouve, kavang setna namuvin chule naki chauve. 22 Ahinlah ipijeh ham? Keiman thilpeh khattou kathum khah em? Keiman nanei ikhat tou keiding tuma kathum khah em? 23 Melma pa a konin nei huhdoh un tia kasei khah a, ahilouleh lungsetna neilou miho a konin nei huhdoh un tia kaseikhah em? 24 Neihillin, chutilehthipbeh in um inge, ipi kabol khel um'em neivetsah in? 25 Lungtheng sella kiseidoh thucheng hi itobanga thahat hitam? Ahin neidem nao ijat aphah hitam? 26 Kalung natna kakana ija naselou tenguleh nathusei houhin mi jouvinte natiuvem? 27 Chagate ahiloule nagol napaite jeng jong soh in naso jiuve. 28 Neihin vetan, namai chang tah a kajou ding ham? 29 Kachonsetna hi dih nante tin gelda tauvin, ijeh inem itile keiman bolkhel kaneipoi. 30 Thujou seidinga nei gelluvem? Aphale ase hekhen thei lou ding kahim?