1 Ganꞌ uz̃iꞌ Jesús zionëꞌ blëꞌënëꞌ tu benꞌ laochulacazi nacatëꞌ gologuëꞌ naquëꞌ xcuidiꞌ. 2 Naꞌra una yaca benꞌ quie Jesús rëbiyaquëꞌ lëbëꞌ:

―Maestro, ¿bixquienꞌ golo benꞌ niga nechula laohuëꞌ? ¿Nu quie dulaꞌ xquia guca laohuëꞌ canꞌ? ¿Idulaꞌ xquia quie xuzëꞌ, o chi dulaꞌ xquia quie cuinzëꞌ?

3 Naꞌra una Jesús rëbinëꞌ yaca benꞌ quiëꞌ:

―Cala gucan quie dulaꞌ xquia quie cuinzëꞌ, ni quele dulaꞌ xquia quie xuzinëꞌ. Gucan canꞌ tacuenda inezi yaca benëꞌ cabëꞌ hue Diuzi yelaꞌ huaca quienëꞌ gacalënëꞌ lëbëꞌ. 4 Naꞌ niaꞌ leꞌe naꞌa te dza naca baguin racaten dyabëꞌ huaꞌ dyin quie Xuzaꞌ, benꞌ useꞌelaꞌ nëꞌëdiꞌ. Cati baodzeꞌ, nuranu saqueꞌ hue dyin. 5 Tu raca zuaꞌ lao yedyi layu, nacaꞌ ca quie guiꞌ rseniꞌn ga naca chula ta ilëꞌë yaca benëꞌ.

6 Ude beyudyi una Jesús canaꞌ, uruꞌunëꞌ z̃enꞌ layu, bënëꞌ ledaoꞌ gunꞌ conlë z̃enꞌ quienëꞌ. Ude naꞌ uz̃iꞌnëꞌn blëpinëꞌn lao benꞌ laochula. 7 Naꞌra una Jesús rëbinëꞌ benꞌ laochula:

―Uyo yetibi laoloꞌ luꞌu pozo nisa lao Siloé, ta inaro xtiꞌidzaꞌro: Pozo nisa quie benꞌ uyo lao laza benꞌ tula.

Biz̃i uyo benꞌ laochula yetibinëꞌ laohuëꞌ, naꞌ biz̃i bedyinnëꞌ z̃an yuꞌu quienëꞌ baoyalo laohuëꞌ barlëꞌënëꞌ. 8 Naꞌra yaca benꞌ nitaꞌ gaꞌalaꞌ ga zu benꞌ abeyalo laohue, len yacara los demás benꞌ tula, benꞌ bezaque chi lënëꞌ requeꞌnëꞌ rnabëꞌ gun, caora naꞌ unayaquëꞌ rëbiyaquëꞌ laguedyiyaquëꞌ:

―¿Cala benꞌ niga requeꞌ rnaba gun yugu dza?

9 Bala yaca benëꞌ unayaquëꞌ:

―Lëlëbëꞌ.

Ibalayaquëꞌ unayaquëꞌ:

―Lëbëꞌ raquero.

Pero biz̃i cuincazi benꞌ beyalo laohue unëꞌ:

―Lënëꞌëdiꞌ.

10 Naꞌra unabayaquëꞌ lëbëꞌ:

―¿Biz̃i baoꞌ ta belëꞌëloꞌ?

11 Naꞌra bequëbinëꞌ rëbinëꞌ leyaquëꞌ:

―Lëbenꞌ lao Jesús bënëꞌ gunꞌ blëpinëꞌn laohuaꞌ. Bëꞌ beyudyi blëpinëꞌ gunꞌ laohuaꞌ, naꞌra unëꞌ nëꞌëdiꞌ: “Uyo yetibi laoloꞌ luꞌu pozo nisa lao Siloé.” Biz̃i naꞌ uyaꞌa yetibaꞌ laohuaꞌ, canaꞌ gucaꞌ barlëꞌëdaꞌ.

12 Naꞌra unabayaquëꞌ lënëꞌ:

―¿Ganaz̃i benꞌ naoꞌ canaꞌ?

Naꞌra unëꞌ:

―Binezdaꞌ gala zionëꞌ.

13 Naꞌra uquiëꞌyaquëꞌ benꞌ beyalo laohue psedyinyaquëꞌ lëbëꞌ ganꞌ nitaꞌ yaca benꞌ partido fariseo. 14 Canaꞌ bëyaquëꞌ, danꞌ beyue Jesús laohue benꞌ naꞌ dza saodo, dza huezilaꞌadyiꞌ. 15 Naꞌra pquëpiyaquëꞌ benꞌ beyalo laohue ca guca danꞌ belëꞌënëꞌ. Cani unëꞌ rëbinëꞌ leyaquëꞌ:

―Blëpiguëꞌ gunꞌ laohuaꞌ. Ude naꞌ uyaꞌa yetibaꞌn. Canaꞌ guca belëꞌëdaꞌ.

16 Naꞌra una bala yaca benꞌ partido fariseo:

―Benꞌ naoꞌ bë canꞌ, binaquëꞌ benꞌ quie Diuzi, danꞌ bibënëꞌ bala dza huezilaꞌadyiꞌ quiero.

Naꞌ biz̃i ibalayaquëꞌ unayaquëꞌ:

―Chi naquëꞌ benꞌ napa dulaꞌ xquia, ¿cabiz̃i guca bënëꞌ yelaꞌ huaca ta belëꞌë benꞌ niga?

Canaꞌ guca unëyaquëꞌ diꞌidzaꞌ udeudela. 17 Naꞌra unayaquëꞌ rëbiyaquëꞌ benꞌ beyalo laohue:

―¿Cabiz̃i naoꞌ luëꞌ quie benꞌ naoꞌ beyue laoloꞌ?

Naꞌra unëꞌ rëbinëꞌ leyaquëꞌ:

―Nëꞌëdiꞌ rniaꞌ naquëꞌ benꞌ useꞌelaꞌ Diuzi. ―Canaꞌ unëꞌ rëbinëꞌ yaca benꞌ partido fariseo.

18 Pero bigulecaziyaquëꞌ chi tali guquëꞌ benꞌ laochula. Naꞌ tacuenda yezacalao bi guca quienëꞌ, guz̃iyaquëꞌ xuzi z̃naꞌ benꞌ beyalo laohue. 19 Naꞌra unabayaquëꞌ xuzi z̃naꞌ benꞌ naꞌ rëbiyaquëꞌ leyaquëꞌ:

―¿Z̃iꞌile ni unale nechula laonëꞌ cati uzutenëꞌ? Chi nale nechula laonëꞌ, ¿cómo barlëꞌënëꞌ naꞌa?

20 Naꞌ biz̃i unayaquëꞌ rëbiyaquëꞌ leyaquëꞌ:

―Nandoꞌ z̃iꞌindoꞌ. Nezindoꞌ desde bdaoꞌtenëꞌ nechula laonëꞌ. 21 Binezcazindoꞌ bi guca danꞌ barlëꞌënëꞌ. Nica nezizindoꞌ nu benꞌ bë ta belëꞌënëꞌ. Banacanëꞌ benꞌ huaca. Ulenabacaranëꞌ lënëꞌ. Huananëꞌ cuinnëꞌ bi guca quienëꞌ danꞌ barelëꞌënëꞌ.

22 Canaꞌ una xuzi z̃naꞌ benꞌ beyalo laohue, danꞌ rdzebiyaquëꞌ bi hue yaca benꞌ rnabëꞌ, como danꞌ banuz̃iꞌa yaca benꞌ rnabëꞌ bihueꞌyaquëꞌ lato tzuꞌu benꞌ luꞌu idaoꞌ sinagoga, benꞌ rale quie Jesús naquëꞌ benꞌ Cristo. 23 Tanaꞌ lenaꞌ unayaquëꞌ rëbiyaquëꞌ yaca benꞌ rnabëꞌ: “Banaquëꞌ benꞌ huaca. Ulenabacaranëꞌ lënëꞌ.”

24 Biz̃i yaca benꞌ rnabëꞌ guz̃iyaquëꞌ tatula benꞌ beyalo laohue, unayaquëꞌ rëbiyaquëꞌ lëbëꞌ:

―Tali una nëtoꞌ, danꞌ huecazi Diuzi ca inaoꞌ. Biz̃i nëtoꞌ banezindoꞌ benꞌ naꞌ naquëꞌ benꞌ de dulaꞌ xquia quie.

25 Naꞌra una benꞌ beyalo laohue rëbinëꞌ leyaquëꞌ:

―Binezicazidaꞌ chi naquëꞌ benꞌ de dulaꞌ xquia quie, o chi bede dulaꞌ xquia quienëꞌ. Zelao naꞌ ta nezdaꞌ, gucaꞌ benꞌ laochula, biz̃i naꞌa barelëꞌëdaꞌ.

26 Lenaꞌ unabayaquëꞌ lëbëꞌ tatula:

―¿Biz̃i bënëꞌ quioꞌ danꞌ naoꞌ beyuenëꞌ luëꞌ?

27 Naꞌra unëꞌ rëbinëꞌ leyaquëꞌ:

―Baoniaꞌ leꞌe canꞌ bënëꞌ, pero bibi bala ruele quiaꞌ. ¿Bixquienꞌ rnabale nëꞌëdiꞌ tatula? ¿Cala reꞌenle inaorële lëbëꞌ, gacale benꞌ quienëꞌ?

28 Biz̃i mazara bdzaꞌ yaca benꞌ rnabëꞌ lëbëꞌ rëbiyaquëꞌ lëbëꞌ:

―Luëꞌ naoloꞌ benꞌ naꞌ. Biz̃i nëtoꞌ naondoꞌ rzundoꞌ diꞌidzaꞌ ca una Moisés. 29 Nëtoꞌ banezindoꞌ dyëꞌëdi ca bë Diuzi bëꞌlënëꞌ Moisés diꞌidzaꞌ. Pero quie benꞌ naꞌ, nica nezindoꞌ ga zaꞌnëꞌ.

30 Naꞌra unë benꞌ beyalo laohue rëbinëꞌ leyaquëꞌ:

―Nacan ta yebanero ca nale, nale binezile ga zaꞌnëꞌ. ¿Cómo binezile ga zaꞌ tu benꞌ guca beyuenëꞌ nëꞌëdiꞌ barlëꞌëdaꞌ naꞌa? 31 Dyëꞌëdi neziro bire Diuzi yaca benꞌ napa dulaꞌ xquia. Con tuzi yaca benꞌ rionlaꞌadyiꞌ lëbëꞌ, yaca benꞌ rue quie xtiꞌidzëꞌ, lëjëꞌ re Diuzi quiejëꞌ. 32 Desde ureꞌte lao yedyi layu, nunu nehue cabëꞌ bë benꞌ niga, bënëꞌ ta yelëꞌë tu benꞌ laochulacazi nacatëꞌ gologuëꞌ. 33 Chi benꞌ naꞌ biuzaꞌnëꞌ tzionëꞌ lao Diuzi, bibi de huenëꞌ cuinzinëꞌ.

34 Naꞌra una yaca benꞌ partido fariseo rëbiyaquëꞌ lëbëꞌ:

―Yelaꞌ benꞌ mala quioꞌ nacoꞌ canꞌ gololoꞌ. ¿Naꞌ como luëꞌ reꞌenloꞌ yexiꞌidzeꞌloꞌ nëtoꞌ uzioñeꞌeloꞌ nëtoꞌ?

Canꞌ guca ulioyaquëꞌ lëbëꞌ luꞌu idaoꞌ sinagoga.

35 Biz̃i Jesús unezinëꞌ ulio yaca benꞌ partido fariseo benꞌ baoyalo laohue luꞌu idaoꞌ sinagoga. Naꞌ bedila Jesús lëbëꞌ unëꞌ rëbinëꞌ lëbëꞌ:

―¿Raleloꞌ quie benꞌ naca z̃iꞌi Diuzi?

36 Naꞌra una benꞌ baoyalo laohue rëbinëꞌ Jesús:

―Señor, una nu benꞌ naꞌ tacuenda galedaꞌ quienëꞌ.

37 Naꞌra una Jesús rëbinëꞌ lëbëꞌ:

―Nëꞌëdiꞌ, benꞌ ruꞌelë luëꞌ diꞌidzaꞌ, nacaꞌ benꞌ naꞌ.

38 Caora naꞌ uditzo z̃ibinëꞌ lao Jesús rëbinëꞌ lëbëꞌ:

―Baraledaꞌ quioꞌ, Señor.

39 Naꞌ biz̃i una Jesús rëbinëꞌ lëbëꞌ:

―Nëꞌëdiꞌ bidaꞌ lao yedyi layu ta huaꞌ juicio. Lëzirë bidaꞌ tacuenda yelëꞌë yaca benꞌ birlëꞌë. Pero quie yaca benꞌ bireꞌen gale quiaꞌ, bidaꞌ ta yechula laohueyaquëꞌ.

40 Biz̃i bala yaca benꞌ partido fariseo nitaꞌyaquëꞌ gaꞌalaꞌ ga zë Jesús, bëꞌ beyaquëꞌ canꞌ unanëꞌ, naꞌtera unayaquëꞌ rëbiyaquëꞌ lëbëꞌ:

―¿Biz̃i ca naoꞌ? ¿Nacarëndoꞌ benꞌ laochula?

41 Naꞌra una Jesús rëbinëꞌ leyaquëꞌ:

―Chi tali binezile bi ruele, bide dulaꞌ xquia quiele. Pero como dyëꞌëdi banezile bi ruele, lenaꞌ decazi dulaꞌ xquia quiele.