1 Naaning Kalati cawngsaw mehruh sahlo! Aho ky maw, a ca pamo he? Naa mehmuh letah pui Zisu Khri khraws letah aa khaipaipaw khah a sepaw tah ka ca ching thah he kha! 2 Naaning taitah hming sangkheh hni ka dupaw cawh phungbia zuinah thong tamaw Thlawpaw naa hmuh, a cang ly leh naa thuipaw thawngchawbia naa zingnah thong tamaw? 3 Ma tlua hei maw naa hru thlang? Naa pathoning takhei Thlawpaw tah patho he ceh ka, naa patlung langchang letah mehnung a zawngná tamaw patlung na du? 4 Ma vytei reithui naa ingpaw khah zehmai lytah maw a cang thlang a? Zehmai lytah cang kheh seh tah ka du. 5 Phungbia naa zui cawtah khei Khazing tah ningang chuipaw khah naa hrong letah tua tah a Thlawpaw cawh a ca peh he maw? Naa thuipaw thawngchawbia naa zing rawng tah maw?

6 Abraham khah pacang tua hmai o. “Khazing khah zing ka, ma cawh dingnah tah reipah a cang.”✡ Atho 15:6 7 Macawtaco Khazing a zingpaw cawngsaw maikaw cawh Abraham sawtei a cang he tahpaw heh hnih my lo. 8 Zingnah thongtah Gental cawngsaw sahlo cawh Khazing tah thai a cangsah he takhah Capathai taco a rei hlang thah. Ma thawngchawbia heh Abraham hai letah, “Nama na thongtah mingphing vytei cawh bonghnang song a cang he a,”✡ Atho 12:3; 18:18; 22:18 tatah phyhlang a cang. 9 Macawtaco, zingnah a hnuipaw cawngsaw sahlo cawh Abraham tei a zingnah thongtah a cypaw bonghnang khah aa hrong he.

10 Mehding aa cang nápaw cawtah phungbia zuinah a paichaipaw cawngsaw vytei cawh chiasahnah rai letah a ungpaw a cang he. Zecawtamaw tatah, “Phungbia cabu letei ciapaw maikaw a tua pazo lypaw cawngsaw maikaw cawh chiasah a cang he,”✡ Biary 27:26 tatah cia a cang. 11 Ahohmai Khazing hme letah phungbia thongtah a dingpaw ung bei he tah cawh a se, zecawtamaw tatah, “Zingnah tah a hringpaw he cawh mehding a cang he,”✡ Habak 2:4 tatah Capathai tah a tah. 12 Phungbia cawh zingnah letah a pahnia be. Ma hraco cang lytah, “Phungbia tah tuápaw a cang a tahpaw sahlo khah a tuatupaw cawngsaw cawh ma aa tuapaw hming sahlo thong co, a hringpaw a cang he,”✡ Tlangbui 18:5 a tah. 13 Khri cawh kaa cawtah chiasah a cangnah cawtah phungbia chiasahnah taitah kaaning cawh a ma tlang. Zecawtamaw tatah, “Thing letah khaipaipaw cawngsaw maikaw cawh chiasahpaw a cang he,”✡ Biary 21:23 tatah ciapaw a cang. 14 A ma tlangpaw cawh Abraham letei pehpaw bonghnang khah Khri Zisu thongtah Gental cawngsaw sahlo khatah a tlung khy hrah nápaw cawtah a cang, ma pawsui co, biakangpaw Thlawpaw Pathai khah zingnah thongtah kaa hmuh khy a.

15 Uny sahlo, ningting kaa hringnah leteipaw taihei tawchingnah bia sangkheh tah law tua neh. Cawngsaw tei biatainah a tuapaw, pacysah ciapaw khah ahotahmai tah rorang tah chahchi khy bei he, ma hraco Khazing biatainah letah a cang hrah. 16 Biakangnah sahlo cawh Abraham le a pathlah khatah pehpaw a cang. Capathai taco, “Pathlah sahlo,” a silang cawh cawngsaw a hlupui, tatah tah be. A cang naná tah, “Na pathlah,”✡ Atho 12:7; 13:15; 24:7 tah ka, a silang cawh cawngsaw pakheh Khri kong khah a reipaw a cang. 17 Ka rei dupaw cawh kung 430 khy taiteipaw phungbia takhei Khazing tah a hmasaw tei, Abraham khatah a za tuapaw biataipaw khah rawh khy be ca ka, biakangnah khah sangtle lytah tua khy be. 18 Khazing rycynah cawh phungbia letah a pahnia caco biakangnah letah a pahnia be tahnah a cang. Canghrasala, Khazing tah a ningdo ná tah Abraham khah a pehpaw cang ka, biakangnah thongtah a cang.

19 A cang caco, phungbia cawh zecawtamaw peh a cang? Cawngsaw khah zetlua tamaw aa sua takhah palang rua tah cang ka, ma phungbia cawh Khazing biakangpaw pathlah a va lang hlai tai cawtah a cang. Phungbia cawh Khazing le mehnung kaa letei aly a cangpaw Moses khakhei vaiming hmang tah peh a cang. 20 Aly lang a seipaw cawh phukheh caw longtei tah sei be. Canghrasala Khazing cawh pakheh tei suipaw a cang.

21 A cang caco, phungbia cawh Khazing biakangpaw khatah a cakhae he maw? A cakhae hrahring bei he! Phungbia tahei male hringnah a peh khy a cang caco, ma phungbia thong co, dingnah cawh hmuh khy a cang hrahring a. 22 Canghrasala, Capathai taco khazaw pungpaluh heh suanah rai letah a ungpaw a cang, tatah a tah. Macawtaco Zisu Khri zingnah thong tei, pehpaw biakangnah cawh a zingpaw sahlo khatah peh a cang.

23 Zingnah a va chua hlai taco phungbia takhei thong letah a ma thlah thlu, zingnah a lang nápaw cai tai khah a ma hrai thlang. 24 Macawtaco, Khri khatah tlungkhui kaa cang khy nápawtah le zingnah thongtah thai kaa cang khy nápawtah phungbia cawh langchuitu a cang. 25 Atoheh cawh zingnah cawh va chuh myca ka, phungbia langhruinah rai leco ung khawh bei peh.

26 Naaning vytei cawh Khri Zisu leteipaw zingnah thongtah Khazing sawtei sahlo cang he ceh ka, 27 Khri letei baptisma a cangpaw naaning vytei cawh Khri khah na buh myca he ceh. 28 Juda cawngsaw, Grik cawngsaw, sae, mehzalong, canu, capaw tah ung khawh lytah naa zongmingtei co, Khri Zisu letah pungkheh na cang myca he ceh. 29 Khri na hnui caco Abraham pathlah cang he ceh ka, Abraham khatah pehpaw biakang hrakhei rycytu na cang he ceh.