1 Naꞌh Pahblu naan tuhbi pooxtla xteenn Jesucristu laasii gulii Dxiohs naꞌh tin guluꞌyiꞌhn xchiꞌdxyi Ñiꞌh laꞌh raꞌ bwiinn, nee neezaa Sóstenes nin naa tuhbi bwihtsi za nuꞌh loh xchiꞌdxyi Dxiohs; 2 racaꞌh nu dxihtsi riiꞌ loh tu nin bagwachiistoꞌ raꞌ ñiꞌh xchiꞌdxyi Dxiohs, nin naa raꞌ bwiinn xquidoꞌ Dxiohs loh guihdxyi Corintu. Laꞌhtu nin ba bazuhnayaa Jesucristu laꞌn lastoꞌ raꞌ ñiꞌh laasii pur nin gwachiistoꞌ tu xchiꞌdxyi Ñiꞌh. Nee laꞌhza tu cun neezaa garaa snuhn raꞌ bwiinn raꞌ nin gwachiistoꞌ raꞌ ñiꞌh xchiꞌdxyi Jesucristu loh gaduhbitiiꞌ guidxyiyuh, garaa tu naa tu xpwiinn Dxiohs nin naa Daada xteenn garaa raꞌ nuꞌh. 3 Rachinaꞌba nu loh Dxiohs nin naa Xtaada nuꞌh cun loh Daada Jesucristu gacanee ru Ñiꞌh laꞌh tu, gusacwachidxyii Ñiꞌh stoꞌ tu.

4 Rudiꞌhi zahn guelzuxchiilli loh Dxiohs pur xcweenta tu, nee pur guelruhnntaaꞌyi xteenn Ñiꞌh nin baniꞌhi Ñiꞌh laꞌhtu pur xcweenta Jesucristu. 5 Pwihsi pur xcweenta za Ñiꞌh baniꞌhi Dxiohs laꞌhtu garaaloh raꞌ cohsa zaꞌca raꞌ, tin guluuꞌyi za tu xchiꞌdxyi Ñiꞌh neezaa tin gacabwaꞌ zaꞌca tu xchiꞌdxyi Ñiꞌh. 6 Ziꞌchi gahca za cun ziga nabahan zaꞌca tu baluuꞌyi tu gwachii duxa stoꞌ tu xchiꞌdxyi Dxiohs xcweenta Jesucristu. 7 Niꞌchin llitiiꞌ dxiaꞌdxi tu loh raꞌ dziꞌn zaꞌca nin runiꞌhi Dxiohs, loh nin cabweeza tu loh dxyih raꞌ nin guibiaꞌgarii Daada Jesucristu loh guidxyiyuh. 8 Zuhnn nadxiipa Ñiꞌh lastoꞌ tu hasta laꞌn dxyihyi nin guibiaꞌgarii Ñiꞌh loh guidxyiyuh, tin ziꞌchi ayi chyu bwiinn guidxeela xtuhlda tu. 9 Dxiohs nahpa ruzaꞌloh Ñiꞌh xchiꞌdxyi Ñiꞌh; laꞌh Ñiꞌh gudihdxyi Ñiꞌh laꞌhtu tin chuu tu loh xneziuh Lliiꞌn Ñiꞌh nin naa Daada Jesucristu.

10 Rñiꞌn loh tu bwihtsi lasaaꞌ raꞌn, xcweenta Daada Jesucristu xteenn nuꞌh; gulguiꞌhnn tuhsi lligaaba, nee ayi taaꞌha lasaaꞌ tu sino que gulguibahannee lasaaꞌ cun gulcaꞌstoꞌ lasaaꞌ za. 11 Rñiꞌn squiiꞌ loh tu bwihtsi lasaaꞌraꞌn laasii laꞌh tuhbi bwiinn famihyi Cloé bieꞌnnaa loon ziga naa xcweenta tu cun llahn nin cazahcanee lasaaꞌ tu. 12 Pwihsi guiñiꞌzahn loh tu squiiꞌ laasii nuu raꞌ bwiinn nin rñiꞌ raꞌ: “Naꞌh naan tuhbi xpwiinn Pahblu”, ya snuhn raꞌ ba rahbi: “Naꞌh naann tuhbi xpwiinn Apolos”, ya snuhn raꞌ ba rahbi: “Naꞌh naan tuhbi xpwiinn Pehdru”, ya snuhn za raꞌ ba nin rahbi: “Naꞌh naan tuhbi xpwiinn Jesucristu.” 13 ¿Ta ruhnn tu lligaaba Jesucristu ziahan cwaꞌh naa Ñiꞌh?, o ¿ta ruhnn tu lligaaba Pahblu gucah loh cruhzi xcweenta xtuhlda raꞌ tu?, o ¿ta gurohbañihsa tu pur lah Pahblu? 14 Per zuxchiilli Dxiohs ayi ziahan dxiꞌh bwiinn baroꞌbañiisahn, sola laꞌh Crispu cun Gahyu baroꞌbañiisahn, 15 pwihsi para ayi chuu nin guiñiꞌ gurohbañihsa niꞌchi cun laan. 16 Niꞌchin sola baroꞌbañiisahn laꞌh raꞌ xfamihyi Estéfanas, per ya loh delaanta ayi gaꞌnnahn gu nuu ru chyu baroꞌbañiisahn, 17 laasii Jesucristu ayi guxeꞌhla Ñiꞌh naꞌh para guroꞌbañiisahn, sino que guxeꞌhla Ñiꞌh naꞌh tin guluꞌyiꞌhn xchiꞌdxyi Ñiꞌh xcweenta ziga gutaꞌh Ñiꞌh laꞌh raꞌ bwiinn loh duhlda, per ayi ruluꞌyiꞌhn cun dxyiꞌdxyi guelnaanntiiꞌ, tin ayi guziaꞌtiin yihca dziꞌn rooꞌ duxa nin bwiꞌhnn Jesucristu chin guhchi Ñiꞌh loh cruhzi.

18 Dxyiꞌdxyi raꞌ nin raluuꞌyi nu ziga guhchi Jesucristu loh cruhzi tin gutaꞌh Ñiꞌh laꞌh raꞌ bwiinn loh duhlda, naa raꞌn zigazi dxyiꞌdxyi nin ayi xi galluꞌyi para bwiinn raꞌ nin zeezaꞌbi loh duhlda, laasii ayi riachiistoꞌ raꞌ ban. Per garaa raꞌ nuꞌh ziga zoozah nuꞌh nez taꞌh raꞌ nuꞌh loh duhlda, dxyiꞌdxyi raꞌ riiꞌ naa raꞌn guelrnabwaꞌ xteenn Dxiohs para laꞌh raꞌ nuꞌh. 19 Squiiꞌ rahbi loh Xchihtsi Dxiohs:

20 Ya nnahaxchiꞌh ¿cuun bwiinn nin naann duxa? ¿Cuun bwiinn nin naa mwehsu? ¿Cuunn bwiinn nin ruchaꞌgalasaaꞌ dxyiꞌdxyi xcweenta raꞌ cohsa xteenn guidxyiyuh riiꞌ? Pwihsi guelnaann duxa nin nuu loh guidxyiyuh riiꞌ, laꞌh Dxiohs bwiꞌhnn biahca raꞌn ziga zi cohsa naxihn raꞌ. 21 Niꞌchin loh xquelnasiin Dxiohs, bacaꞌbwaꞌ Ñiꞌh ayi chyu bwiinn guidxyiyuh gaca dxiuꞌnbwaꞌ laꞌh Dxiohs cun guelnasiinsi xteenn guidxyiyuh riiꞌ, niꞌchin nin gudxiꞌhyi Dxiohs xa bataꞌh Ñiꞌh bwiinn raꞌ cun xchiꞌdxyi Ñiꞌh tin riachiistoꞌ raꞌ ba xchiꞌdxyi Ñiꞌh xcweenta Jesucristu. Ya ziga para snuhn raꞌ bwiinn naa xchiꞌdxyi Dxiohs ziga nin ayi galluꞌyitiiꞌ.

22 Bwiinn Israel raꞌ xclaaꞌdzi raꞌ ba gwaꞌha raꞌ ba sehn raꞌ xteenn nez llaaꞌndxibaaꞌ, ya laꞌh raꞌ bwiinn griehgu rdxiꞌhyi raꞌ raꞌ ba guelnasiin, 23 per laꞌhnu raluuꞌyi nu xchiꞌdxyi Jesucristu nin guhchi loh cruhzi, ya para laꞌh raꞌ bwiinn Israel naa dxyiꞌdxyi riiꞌ ziga tuhbi dxiah nin rgaꞌha ñaaꞌ bwiinn, ya ziga laꞌh raꞌ bwiinn raꞌ nin ayi naa raꞌ bwiinn Israel rwaꞌha raꞌ ba dxyiꞌdxyi riiꞌ ziga dxyiꞌdxyi mbah, 24 per para laꞌh raꞌ bwiinn raꞌ nin gulii Dxiohs naa xpwiinn Ñiꞌh, ziga bwiinn Israel o bwiinn nin ayi naa raꞌ bwiinn Israel; para laꞌh raꞌ ba Crixtu naa guelrnabwaꞌ cun guelnasiin xteenn Dxiohs. 25 Pwihsi ziga nin ruhnn raꞌ bwiinn guidxyiyuh lligaaba naa guelmbah xteenn Dxiohs, niꞌchi naa mahzi guelnaann duxa xteenn Dxiohs loh ziga xquelnaann raꞌ bwiinn guidxyiyuh; ya ziga nin rluuꞌyi gulliaaꞌha jweersi loh xteenn Dxiohs, niꞌchi naa mahzi jweersi rooꞌ loh xjweersi raꞌ bwiinn guidxyiyuh.

26 Bwiitsi raꞌn, gulgahcabwaꞌ Dxiohs gulii laꞌhtu, nicala gulliaaꞌyiꞌhn tu naa bwiinn nasiin loh raꞌ bwiinn guidxyiyuh, nee nicala za gulliaaꞌyiꞌhn za tu nahpa guelrnabwaꞌ, nee nicala gulliaaꞌyiꞌhn za tu naa bwiinn nin gaca bwiinn lasahca. 27 Per Dxiohs gulii laꞌh raꞌ bwiinn nin ayi xi gaanntiiꞌ tin gusiaꞌhanxtuhyi raꞌ ba laꞌh raꞌ bwiinn raꞌ nin ruhnn naanntiiꞌ raꞌ; laꞌhza Ñiꞌh gulii laꞌh raꞌ bwiinn raꞌ nin gulliaaꞌ rnabwaꞌ tin gusiaꞌhanxtuhyi za Ñiꞌh laꞌh raꞌ bwiinn raꞌ nin ruhnn lligaaba rnabwaꞌ duxa raꞌ, 28 nee laꞌh Dxiohs gulii laꞌh raꞌ bwiinn raꞌ nin ayi guilasahca raꞌ cun bwiinn raꞌ nin nunpaꞌh rwaꞌha raꞌ bwiinn guidxyiyuh loh raꞌ ñiꞌh, tin gusiaꞌhanxtuhyi Ñiꞌh laꞌh raꞌ bwiinn raꞌ nin nahpa balaaquiꞌhn guelrnabwaꞌyiꞌhn raꞌ, 29 tin ziꞌchi ayi chyu bwiinn guunn nayaachi cun xcweenta gahca ba nezloh Dxiohs, 30 ya laꞌh gahca Dxiohs bazuh laꞌhtu loh Daada Jesucristu; baxeꞌhla za Ñiꞌh Jesucristu loh nuꞌh tin baziaꞌñih Ñiꞌh laꞌh lastoꞌ nuꞌh tin gahpa raꞌ nuꞌh guelnasiin xteenn Dxiohs, tin guibahan xnehza nuꞌh nezloh Dxiohs, tin gaca nayaa lastoꞌ nuꞌh tin guziaꞌtii Ñiꞌh xtuhlda raꞌ nuꞌh. 31 Ziꞌchi bwiꞌhnn Dxiohs tin guzohba xchiꞌdxyi Ñiꞌh hasta rñiꞌ squiiꞌ: