1 ང་རང་ཆོས་ཚོགས་ཀྱི་འགན་ཁུར་བ་དང༌། མཱ་ཤི་ཀའི་སྡུག་བསྔལ་གྱི་དཔང་པོ་དང༌། མངོན་པར་འགྱུར་བའི་གཟི་བརྗིད་ཀྱི་སྐལ་བ་འཐོབ་མཁན་ཡིན་པས། ཁྱེད་ཚོའི་ནང་ནས་ཆོས་ཚོགས་ཀྱི་འགན་ཁུར་བ་རྣམས་ལ་འདི་ལྟར་སྐུལ། 2 དཀོན་མཆོག་གིས་ཁྱེད་རྣམས་ལ་གཏོད་གནང་བའི་མི་རྣམས་རྫི་བོས་ལུག་ཁྱུ་ལྟར་སྐྱོངས། མི་འདོད་པར་མིན་གྱིས། དགའ་བའི་ངང་ནས་འགན་དེ་འཁུར། རྒྱུ་ནོར་ལ་ཆགས་པའི་སྒོ་ནས་མིན་པར། དཀོན་མཆོག་ལ་ཞབས་ཏོག་སྒྲུབ་པའི་བརྩོན་སེམས་ཀྱིས་སྐྱོངས་ཤིག 3 ཁྱེད་ལ་གཏད་པའི་ལུག་ཁྱུ་སྟེ་མི་རྣམས་ལ་བཙན་ཤེད་མི་བྱེད་པར་མིག་དཔེ་སྟོན་ཞིག 4 རྫི་བོ་མཆོག་དེ་མངོན་པར་འགྱུར་བའི་ཚེ། ཁྱེད་རྣམས་ལ་གཟི་བརྗིད་དང་ལྡན་པའི་མི་འཇིག་པའི་ཅོད་པན་འཐོབ་པར་འགྱུར་ངེས་ཡིན། 5 དེ་བཞིན་དུ་ཁྱེད་གཞོན་ནུ་རྣམས་ཀྱིས་ཆོས་ཚོགས་ཀྱི་འགན་ཁུར་བའི་བཀའ་ལ་ཉན་དགོས། ཁྱེད་ཚོ་ཐམས་ཅད་ཉམས་ཆུང་གི་ཐོག་ནས་གཅིག་གིས་གཅིག་ལ་རོགས་བྱེད་དགོས། གང་ཡིན་ཞེ་ན།

6 དེའི་ཕྱིར་དཀོན་མཆོག་གི་དབང་ལྡན་པའི་ཕྱག་འོག་ཏུ་རང་ཉིད་ཀྱིས་དམའ་ས་བཟུང་ཞིང༌། དུས་ལ་བབས་པའི་ཚེ་ཁོང་གིས་ཁྱེད་ཚོ་མཐོ་བར་མཛད། 7 ཁོང་གིས་ཁྱེད་རྣམས་ལ་གཟིགས་སྐྱོང་མཛད་པས། ཁྱེད་ཀྱི་སེམས་ཁྲལ་ཐམས་ཅད་ཁོང་ལ་གཏོད། 8 རང་ཚོད་ཟིན་ནས་དོགས་ཟོན་བྱེད་ཅིག བདུད་རྒྱལ་ཏེ་ཁྱེད་ཚོའི་དགྲ་བོ་ནི་ངར་སྐད་འདོན་པའི་སེང་གེ་ལྟར་གང་སར་མྱུལ་ནས་ཟ་རྒྱུའི་མི་ཞིག་འཚོལ། 9 ཁོ་བཀག་སྟེ་ཁྱེད་ཚོའི་དད་པ་ལ་བརྟན་པོར་གནས། གང་ལགས་ཤེ་ན། འཇིག་རྟེན་ཡོངས་སུ་ཁྱེད་ཀྱི་སྤུན་ཟླ་རྣམས་དེ་ལྟར་གྱི་སྡུག་བསྔལ་མྱོང་བར་ཤེས་པའི་ཕྱིར་རོ། 10 ཡང་ཁྱེད་ཚོ་དུས་ཐུང་ངུ་སྡུག་བསྔལ་མྱོང་བའི་རྗེས་སུ། མཱ་ཤི་ཀའི་སྒོ་ནས་རང་གི་རྟག་ཏུ་གནས་པའི་གཟི་བརྗིད་དུ་བོས་མཁན་ཐུགས་རྗེ་ཐམས་ཅད་དང་ལྡན་པའི་དཀོན་མཆོག་ཉིད་ཀྱིས་ཁྱེད་རྣམས་ལ་སླར་གསོ་བ་དང༌། རྒྱབ་སྐྱོར། ནུས་ཤུགས། རྨང་གཞི་སྲ་བརྟན་བཅས་དང་ལྡན་པར་མཛད་ངེས་ཡིན། 11 ཁོང་དུས་གཏན་དུ་མངའ་ཐང་དང་ལྡན་པར་གྱུར་ཅིག ཨ་མེན།

12 ངས་བློ་གཏད་ཆོག་པར་རྩི་བའི་སྤུན་ཟླ་སིལ་ཝ་ནུ་བརྒྱུད་ནས་ཡིག་གེ་ཐུང་ངུ་འདི་བྲིས། ཁྱེད་ཚོར་སྐུལ་ཞིང༌། ཡི་གེ་འདིར་བཀོད་པ་ནི་དཀོན་མཆོག་གི་ཐུགས་རྗེ་བདེན་པ་ཡིན་པར་དཔང་པོ་བྱེད་པའི་ཆེད་དུ་ཡིན། དེ་ལ་བརྟན་པོར་གནས་ཤིག 13 སྦ་བི་ལོན་གྲོང་ཁྱེར་ལ་ཡོད་པའི་ཆོས་ཚོགས་ཁྱེད་རྣམས་ལྟར་བདམས་པ་དང༌། ངའི་བུ་ལྟར་ཡིན་པ་མར་ཀུས་ཁྱེད་ཚོར་འཚམས་འདྲི་ཞུ། † 5:13 ཕལ་ཆེར་སྦ་བི་ལོན་གྲོང་ཁྱེར་ནི་རོ་མཱ་གྲོང་ཁྱེར་མཚོན། 14 བྱམས་སེམས་ཀྱི་ཐོག་ནས་གཅིག་གིས་གཅིག་ལ་འོ་ཡིས་འཚམས་འདྲི་ཞུས། མཱ་ཤི་ཀའི་ནང་ན་གནས་པ་ཁྱེད་ཚོ་ཐམས་ཅད་ལ་ཞི་བདེ་དང་ལྡན་པར་གྱུར་ཅིག །