1 Ỹhỹ Pahpãm, apê ampo cunea jõ Pahhiti,

ne mehcunea jirôa pê ampeaj kam quêt acarôt tỳj.

Ne ampeaj kam imã ite me ato amji kam me ijapac xà jũrkwa kĩn.

2 Ne imã gũrkwa ata ri apu imõr prãmti,

ne ampeaj kam to ijapac xà.

Wa ite amji kam ijapac xà cunea to,

wa apê me ijõ Inxũ Cati tĩar ata pyrên ijakryti to amã cre.

3 Apê ijõ Pahhiti pê Pahpãm!

Quêt ampeaj kam acarôt tỳjti!

Acatihti cakrô,

mã ihtỳj cute me ato me amji kam hapac xà jũrkwa kam

cuwênre me, xiprôre amji mã hahê to,

cute kam amji mã intoreto ipijapar xà caxuw.

4 Por cute me ato amji kam hapac prãmte,

gũrkwa mã hãn ne me acjêj,

ne me hapôj atajê ri hãn ne ampeaj kam me hakry xà,

ne hõtpê acatihti na me amã cre!

5 Ne por apĩn amji mã me carôt cwa,

ne ma Krĩpinkrên jõ hàpkàjti pê Xijãw na me to hàpir,

gũrkwa wỳr me to cator prãmte atajê ri,

ampeaj kam me hakry xà.

6 Ne caprũm cràre nõ kôt me mõr xà ata kam,

ca ha atỳj me cumã ihkôt cô catõc ne ipijapjêr na to,

quê ha ajpjê.

Ne quê ha hanea ne ta cakônĩnõ wrỳ,

quê ha ampeaj kam hĩpô hàhtô.

7 Ne me mõr kwỳa kam,

quê ha ihtỳj me carôt ita me cumã ipicamẽn to mõ.

Ne ma Krĩpinkrên kam,

cute me ato amji kam me hapac xà jũrkwa wỳr me cato,

ne me apê pahpãm cahàc krekà cunea jirôa pê acati

ne apê Pahhiti impeaj na me apupu.

8 Mehcunea jirôa pê ijõ Pahhiti pê Pahpãm carôt tỳjti ita,

ite amã icakôc xà ita na, ikampa.

Apê iquêtti pê Jaco xwỳ jõ Pahpãm ita, ikampa.

9 Pahpãm, ate amji mã me ijõ pahhi capi ne hãm ata krã kam garcô mẽ,

ne to impeaj ne.

10 Wa ite jũ ri amji to amcro jàhtô to mir romã,

wa ha gũrkwa kam amji to amcro pyxit peaj.

Ne mehkrã kên jũrkwa pejti kam ijàhhuc romã ri,

imã cormã gũrkwa jarkwa mã mencjêj xà kam ixãm na

amji to prãam to amji to prãm.

11 Pahpãm, apê me ijõ Pahhiti, ne apê pyt pyràac,

ne ampeaj kam acati ne apràti, ne apê me itête gàmtàr catê.

Ne gàhcajrẽnti to, amã me ikĩnti kam, ca hãn ne me ito impej,

ne mehcunea kam mare mã me ito me icati.

Ne por catyt kam, mempejti to ame ipa atajê pê ri,

nee ate ampo pejti intê xà nare.

12 Mehcunea jirôa pê apê ijõ Pahhiti carôt tỳjti ita.

He ampeaj kam ri amji mã me ato ihhimpej atajê cunea jakry pit.