5
1 Jeju Crixtô te mam me panquêtjê himpej xà atajê pê me pahcaxàr, mãr cu pahtỳj amepapa. Cwỳrjapê ca ha nee hipêr jũm himpej xà mã axàr, ne ihkrac ri apu apa nare.
Quê ha Pahpãm nee me pajàpên xà impejti kôt me pahna amji caxàr nare
Jowãw 8.32, 36
2 Ỹhỹ, ipê Pawrô pê Jeju Crixtô jarkwa na imprar catê, ne pa wa ha me amã awjarẽ, cwỳrjapê ca ha ikam me gapac to impeaj ne he. Ihhêj neramã Juta catêjê kwỳ me awỳr cator, ne cute me amã:
— Ca ha Mojxe te me hapackre xà kôt, cama amji na me ijamã, wa me amã me apy kà kwỳ jakep. Ampona? Ca ha ate ita to hajỹr nare na, quê ha nee Pahpãm ana amji caxàr nare — hajỹr na. Ca ha nee kam me gapac, ne amji na me hamãr, quê me amã apy kàkwỳ jakep nare. Ampo na? Ca ha ate amji na me hamãr na, ca ha nee Jeju to pit mã amji mã me ahimpej nare. Quê ha me amã me pajõ Pahhiti tyc xà ita kôt hamreare ne.
Pê Pahpãm amjia kôt me pahna amji capa
3 He wa ha hipêr me amã ita cawpa he. Ca ha me anõ te amji na me hamãr, quê ha cute me amã apy kà kwỳ jakep na, hamre, ramã ate Mojxe te mehapackre xà pyxit ne ihkôt amji ton, na ca ha atỳj ate ahpỹanre na ihcunea kam gapac to prãm xà. 4 Ca ha Pahpãm te me ana amji caxàr prãmte, ate me Mojxe te me hapackre xà ata pynãr na, ca ha ramã me Jeju Crixtô mã hikra. He me atea ca mePahpãm te hàhcaprĩa kam, amjia kôt cute me apytàr jicu na me ton, mã cute me gicu. 5 He nee me ite me hajỹr nare. He quêt me imã quê ha Pahpãm amjia kôt me ina amji caxàr na me imã hahkre pej. Ne quêt Pahpãm Carõ Pejti carôt ri, Jejuto ite amji mã me ihimpej tỳj na me itehcajpa. 6 Cu ha Jeju Crixtô na me ajpẽn hônco ita kam, nee Pahpãm me, me papê ajpẽn pê ajteare mã nare, ne cumã me papipẽn pit. Ne me pahkà jakep me, me pahkà jakep nare itajê me, me Pahpãm mã me papipẽn pit. Ne cumã Jeju to me pahte amji mã me pahhimpej xà ata kôt ri me pamã ajpẽn kĩn, ata na ri cumã impej.
7 Pỳhàpà! He curmã ca Pahpãm kôt me aprõt kên nare ta? Ne ampo na mã ate amji na me jũm ita jamãr, mã cute me ato pry hyr, ca ate me pry hyr? 8 He nee Pahpãm te hõ pry ita tête me amẽn nare, ne ihtỳj quêt amji wỳr me amã akij. 9 He cu ha me pahnõ cuhkõn cahàc to cuprõ, ne hakôt, quê ha ihkrĩ ne hipôc ri ihnõ kam cô, ne ihcacu, ne amji kôt ihkwỳ cunea to kên. Ỹhỹ, ita jĩkjê na mã jũm te, Jeju te amji kamhapac xà kaj na, me amã ampo kên kryjre to hahkre xà atajê to me acunea to kên. 10 Ne jũm ata te me amã ampo kên to hahkre cakrô, wa itỳj, nee ate mempar nare na, amji mã me ato hane. Ne imãa, ca ha me anõ te kam gapac, neihkôt amji ton na, ca ha hacpỹa mã ate amji jaxàr, ne hipêr Jeju te amji kam hapac xà impejti ata pynãr na, wa itỳj me ato amji mã hane. Ne porame amã ampo kên to hahkre to ipa ata, quê ha Pahpãm ihtỳj cute me ato kên xà ata cwỳrjapê to ihtỳj tu ne.
Pê Pawrô nee jũm te impy kà kwỳ jakep to cumã hahkre nare
11 Ỹhỹ me ikjêjê, wa ha me amã amji jarẽ. He cute me amã ito ihhêj xi catêjê me amã hane he:
— Pawrô cormã mehcunea te mempy kà kwỳ jakepto me cumã hahkre — hane. Wa ha ite me cumã to hahkre to hajỹr na, quê ha nee Juta catêjê jõ pahhi kwỳ itajê ame ito kên nare. Ne mẽr ampo na mã ame ito kên? Nee mã ampo na nare. He wa mehcunea mã Jeju te pĩ kam me pancwỳrjapê ihtyc xà ata kôt Pahpãm te me pahna amji caxàr na harẽ, na ri ame ikam incryc. 12 Ne por ame akrã to acto atajê, quê hapacta ne ihtỳj amji mã mehhy me incre cunea jakep hiahpuro, wa ha nee intête mehcahpêrkàr nare.
Cu ha ajpẽn to mempeaj ne
Jowãw 13.31-35
13 Jeju kam me ikjêjê, pê Pahpãm amji wỳr me pamã akij, mãr quê nee pjê kam jũm cute amji kam hapac xàa to pahte amji kam me pajapac xà to ihhimpej nare. Co he! Ca ha nee me anõ ate amji kamgapac xà tũm kên ata kôt apa prãmte, amji mã:
— Taamã, jũm nee ito ihhimpej nare ita kam, wa ha itỳj ite amji to amji cajpuaw prãmte, ite ampo ton prãmata cunea to — hajỹr nare. Ne quêt amã me akwỳ kĩan kam, cute ampo na mehprãmti xà atajê to ca ha me. 14 Ne por Mojxe te me hapackre xà atajê, ca ha ihcunea to cuprõ, ne to pyxit peaj to hane he:
“Quê ha amã mehcunea kĩn hanea,
pom quê amãa amjikĩn he” hane.
Cu ha pahte me ajpẽn to hajỹr na, cu ha ramã Mojxe te me pajapackre xà atajê cunea kôt me ajpẽn to. 15 Nãmri ca ha me apê ampo kên pyràc, ne cama ame ajpẽn curê, ne ajpẽn kam me atẽm na, ca ha me caa me ajpẽn jipej. Cupate ca ha atỳj ateamji kam gapac xà na me amji kôpĩr to me apa.
Pahte mam amji kam me pajapac xà kên atajê pê Carõ Pejti curê xwỳn
Roman 7.7-25; 8.1-11
16 Ỹhỹ me ikjêjê, ca ha Pahpãm Carõ Pejti te amji kam hapac xà tuw pejti ata kôt me apa na, ca ha nee hipêr ate amji kam me gapac xà tũmkên ata kôt me apa nare. Ne nee ate amji to amji cajpuaw prãmte, ate ampo ton prãmata cunea ton to me apa nare. 17 Mam pahte amji kam me pajapac xà tũm kên ata me, Pahpãm Carõ Pejti te amji kam hapac xà tuw pejti ita me, cupê ihhêj rũm ajpẽn curê xwỳn. Na ri ihtỳj ajpẽncahpêrkàr to ipa. Na cu nee me pahte amji kam me pajapac xà pejti to me papa to prãm ata kôt me papa nare. 18 Cu ha pahte Pahpãm Carõ Pejti to amji mã me pahhimpej na, cu ha nee hipêrme hàhcawpa xà me, me to ihhimpej xà atajê to apu amji kam me pajapac nare. Ampo na? Nee hipêrcute me hàhcawpa xà ata me pahto ihhimpej nare.
Mam pahte amji kam me pajapac xà tũm kên atajê te hajỹr
19 He me pahcunea mã hirãa pê mam pahte amji kam me pajapac xà tũm kêanre te ampo kên cunea na me pahton na, pahte me amji jahkre pej. Itajête hajỹr he:
Me pahnõ te me pahprõ kaj na ahti na me pyjê nõ caxun me,
hanea ne pyjê nõte impjên kaj na, ahti na jũm xũmre caxun.
He ihhêj rũm me pahkwỳ pê rop pyràac, ne pahte amji kam me pajapac xà kam me panxyre kamme pahpahàmti ton to ame papa.
20 Ne hanea ne Pahpãm kaj na, pahnõ te amji mã mepahpãm cahàc krekà cupa me,
pahte me pahkwỳ to hy to amji kam me pajapac to me papa me,
pahte me ajpẽn curê me,
pahte me pajarkwa to ajpẽn mãn kên me,
pahte me pajõxỳ to me papa me,
pahte ajpẽn kam me pancryc me,
amji to pit mã amji kam me pajapac to me papa me,
pahte ajpẽn cuna mã ame amji jakrã me,
21 pahte ajpẽn jũ na ampo kĩn me,
pahkõm ne me papipãn me,
amji kĩn kam, me kam mare mã me pahkõm catia me,
me ampo kwỳ jàhtôa pê itajê pyràcti atajê me.
Ỹhỹ, he mam pahte amji kam me pajapac xà tũm kên itajê, ihtỳj pahte ampokên itajê cunea ton na me pahto, cu ton to me papa. Ne pom ite mam ramã me amã ampo cawpa atajê, wa ha hipêr me amã ihcawpa. He cute me ampo kêanreitajê ton catêjê, quê ha nee jũ caxuw Pahpãm himpej xà krac ri hàr, necatyt kam, cumã amji kĩnti jakryti kam ipa nare.
Pahpãm Carõ Pejti te amji kam hapac xà tuw pejti atajê te hajỹr
22-23 Ne quêt Pahpãm Carõ Pejti te amji kam hapac xà ajteare mã. Quê ha me Pahpãm Carõ Pejti te me pamã amji jõr na, cu ha me pahte ampo pejpit ton xà itajê te hajỹr he:
me pamã ajpẽn kĩnti me,
me pajakryti me,
ajpẽn mã me pampejti ne me pahcarĩcti na me pahkrĩ me,
ampo te me pahto kên mã me pajũcanãr me,
ajpẽn mã me pahcaprĩ me,
pahte me ajpẽn to impejti me,
cute amji mã me pahto hajỹr me,
ajpẽn mã me ampejti me,
ampo kên tête pahte me amji jiprõn to me papa me,
cute amji mã ampo na prãm atajê na amji jamãr peaj me.
Ỹhỹ, Pahpãm Carõ Pejti ihtỳj pahte ampo pejti ton xà itajê cunea na me pahto, cu me ton to me papa. Na ri nee jũm xũmre te me hapackre xà te ampopejti ita tête me pajiprõn xà hamreare. 24 Ne me papê Jeju Crixtô tekjê atajê te, ramã ihhêj ne mam me pahte amji kam me pajapac xà tũm kên atajê cunea jipej, mãr cu nee hipêrihkôt ame papa nare. Na cu ha nee hipêr me pamã ampo kên ton prãmti atajê na me amji jamãr, ne me ton nare.
Cu ha Carõ Pejti te amji kam hapac xà tuw pejti ata kôt me papa
25 Ne me Pahpãm Carõ Pejti ata pê me pajõ Pahhiti, cu carôat kôt me papa. Mã taa, me pahtoihhimpej, ne pahte ampo pejti ton na me pahto, cu ha me ton to me papa. 26 Na cu ha nee ajpẽn jirôa pê amji to me pahcati prãm nare. Cu ha pahte me hajỹr na, cu ha cama me ajpẽn cyt kam tẽ, ne cama ajpẽn jũ na amji to prãm kam me tẽ.