23
Ashiriya, na kamanchintspa yuwaatssha Balam Israelchichee wanasir tsiyatarangu anootsi
1 Balamsha tárangiya; Nish patumbich 7 xanateerush, anumun wakar wip karupanawari 7, misha opeejsha karupan cietitam pachayarush muchingi, tárangu, 2 kuraksha Balak anuritam ayu táyaru, yuwaa Balam kamachtarangu anoo tuminurangiya. Maacheetsi chinuzee wip karupanawaatsiri waya waya ashiranganaya. Sheersin, muchiranganaya. 3 Muchiramchusin, Balam kurakaa Balakaa tárangiya; Musápa. Shiy neetsiritamapa. Nishuri kutapandama. Nuwaanitarisha minumarishti naachima. Pangatamasima. Apaz Apanll nuwangaz chamayangati átu naataranu. Ashiri yasatamasima. Na yasaramchuri, shiyaatssha kamanchinllpa yuwaa waana Apanll nuwaa kamachtakachu anootsi, tárangiya. Táyaranllu, Balam ambirisha machip apusapsha, yap tputs ndunari amb, machip káreeru naatarangiya. 4 Anush machish kuskamchu, Apanllsha Balamash yakarangiya. Balamsha Apanllee parangu, tárangiya; Shiyaam Apaa, maacheetsi muchpani táranguni, 7 patumbchee xanataranganiya. Sheeruni, wakaraa, misha opeejaatstam karupan minam, minam sheeruni, wayaranginiya. Ichingaru yuwash 7 xanatarangani anush ashpari wayaranginiya, tárangu. 5 Apanllsha: Balamaa, shiyshat waptam kurakpitam Balakap kanapeerush, kamanimancha. Yuwari nuw shiyaa táyachi anuritam nuwaa kuki kamanishini, Apanll Balamaa tárangiya. 6 Balamsha anuritam kanapeeranllu, yusur Balakaa chamayangarangiya. Balaksha anshuritam tiptsirpa Mowabshuchpa tputs Balamaam kutaksin, shanee ashiranganaya. Balak kutaku, xixeew ashirangiya. 7 Ashiri Balamsha tárangiya.
Nuw tsapunshish, yap zar yaku amb, Aramush taaranguri, kurak Balak Mowabshuch tputs nuwaa kuruzurangiya. Ning nuwash kusangcha. Kuseerush, nee tputs Israelchichee zutayaru kasachpa, tárangu, Akoparinchichee tputs mantsir tsiyatamaam zandarangiya, tárangiya.
8 Itaru, nuwsha ¿Tamari amb sheeruri, tputssee zutambeeruri kasachee? ¿Antaati nuwaa Apanll; Tputssee zutambeerush ksangi, ateeja? nuw amb ashtapi. ¿Antaati Apanll nuwaa mantsirimash chinamaam kamachtakeeja? Apanll nuwaa wanasirimshireetsima kamachtarangiya. ¿Tamari nuw Apanllee kuk kapeetchee? 9 Nuw machimand káreeruri, naparanguri parangtana. Tputs wazapansincha. Nuw ashpa tputs patareezi. Waanapa Apanll tiptsiriya. Napa, ashpisin taarana minpicheewtampasinaya tsapuranas tputsiya. 10 Izuuru ashpiri tsap puyumboo, ¿tamari ashpa tputs taachchich? Ashirucha, nuwsha anungaz támarakuri, tamangsinda tsipapi nuwsha ambitam ashtapi túri támarakshina, Balam Balakaa tárangiya.
11 Kuraksha Balak Balamaa tárangiya; Nuw shiyaa kundarareemi tuztamaam kuruzurangina. Shiyshat nish ¿tamakshasha? ¿mangutaritashuwa pakatush kusarangshawa? Napa; anoow tputs shiy kis chinampatari tsiyataksha. Nuw anoomaja shiyaa kuruzurangi, tárangiya. 12 Tárangu, Balamsha; Zuraksha. Nuw tárangina shiyaatsi; Yuwamaritam Apanll nuwaa kamachtaku anootsiritam nuw tsiyatkina, tárangiya. 13 Itaru, Balaksha anoo nda kis mazinamaam zandarangu; Ashiri pzaya. Yusur nuwapasha ipuneeruni, piyamsha mach naayani. Iturpiyaruni pakeeni. Amb naayaruch, pamaam waritartamparee. Itaru, nda ashparta tputsi nda pangachchee. Chawpimaritaa zutayarush ksangi atina, tárangiya. 14 Táyaranllu, kurak Balak Balamaa piyamsha mach machirangiya mach sur Pisgapshita. Ambiri machimun káriranganaya. Anumun káreersin, ambirisha yusur, maacheetsi muchpani, atusin, patumbchee yáyarusin, arangich tsimbun matayaru xanatarangana. Sheersin, wakar wip, opeejaatstam karupan Apanlleem muchiranganaya. 15 Ashiramchusin, yusur Balam kurakaa Balaka tárangiya; Ashiri shiy musá neetsiritamapa nishuri patumbchirishish xanatamash kutapandama. Nuwma nuwaanitarisha naayaruni, pangatama, yapeeja Apanll nuwaa yusur chamayangachinda, tárangiya. 16 Táyaranllu, waanitarisha naatarangiya. Anushsha apus Apanll Balamaa chamayangayaru tsiyatarangiya. Natu wapitam kanapeerush, kamanishini kurakaa Balakaatsi yuwaa shiyaa tsiyatarangi anootsi. Ashpari tatsamooru kamaningcha. Yaptam shiyaa tárangi anooritam kamaningcha, Apanll Balamaa tárangiya. 17 Balamsha wapitam kanapeeranllu, yusur Balakaa chamayangarangiya. Balaksha anshuritam tiptsirpa Mowabshuchpa tputs Balamaam kutaksin, shanee ashiranganaya. Balak kutaku, xixeew ashirangiya. Balak anush yusur masharangiya; ¿Natuwa, Apanll shiyaa amkimta? tárangiya. 18 Balamsha ashparitam yuwaa Apanll tárangu anoo kamanirangiya. Shiy Balakaa, Siporarini wipaa, nuwaa kuki kaapa mazinangandama; 19 ¿Nitaati Apanll chiy tputssich tamapari ashireeja? Apanll nllitari chinamaam nda yasariya. Nduntam ngichimaam yasariya. Yuwaatsimari tsiyataku anootsimari payukiya. Urutamari kukoo tumineernand kasatariya. 20 Apanll nuwaa itsinsaru kamanirangiya; Ambchee tputs kapungtanda nuw chinaki, tárangtanda. Átu anoo ¿nuwshat tamayareezee? Watsta Apaa, ambcheem tputs istamaama ¿tamaree nuw táchee? 21 Ichingaru Israelchichee tputs yutaritshishirini tachingeeru, ngichiz ndunarsha kasarangiya. Ambich tputs ichingarusin Akoparinchichinandari wachinllinu. Waana Apanlltam Taarashipan anshuchee kapung ksutkiya. Ashirucha, anshuch tputs ichingarusin Apanllee; Iycha kurakarini, atusin, urkareem ínakanaya. 22 Tor watarimash witspatari waanaatsi tapachindaru ashikpaz ashiru Apanll Israelchicheem ksutkiya. 23 Waana Apanll tiptsiree Ijiptosh tsap tashitungarangu, anshuch tputs ichingarusin kizpurinandaritssin taaranaya. ¿Tamamaja tputs anoo kasiku kasich? ¿Tamayareezich anshuchee tputs zutaychich? Zutamaam pinasa, watam Apanll waana ksutkuwa. Ashirucha, chiy Israelchichee tputs támaam waritariya; ¿Siyaamam wanip Apanll istaranga? Urutamari ambiri ashishtar ashtachiya, táchchi. 24 Ashirusincha, anshuch tputs Israelchich ichingarusin kizpurinandaritssin taakanaya. Tumuz ashiru yáyachu, nda kapamaam waninda. Izuuru zamari zayaru, kapunguri katungkeeru, tazazayaru, ursiree wayaru, mapiysha maamawamach ashtaru, an tamaparee ashiritamsin, nda nizimaam yasaranaya. Ashirucha, ambchee tputs kasimaam wanindaja táshina, mang ántar ashirangiya kurakaa Balakaatsi.
25 Balaksha tsiyantayaru; Zamangi, Balamaa. Shiy zutamaam pinasakush, ¿mayaamshtaja wanasir tsiyataksha? Ashiriya, zamayarush taangi, tárangiya. 26 Balamsha; Nda, amb tárinllpa. ¿Mayaamshitaja Apanll nuwaa nda kamachtaru, nuwshat nuwaanitari msangeeri amb ashtachee? tárangiya. 27 Ashiriya, yusur Balak nda sambaytarangiya. Naani, yusur piyamsha machchinllpa minupsha machi. Apaz amb naakchuni, Apanll shiyaa kamachtakachshita Israelchicheem tuztamaama. Pzaya, ambsha yachani, mang tárangu, 28 kurak Balak Balamaa minupsha mach machtarangiya. Mach sur Peyorapsha amb tsap puzap machimand ichingaru tsapoo pamaam waritarangiya. 29 Yusur Balamsha kurakaa Balaka kamachtarangiya; Na yusur patumbich tsimbun matayaru xanatangi. Sheerush, wakar wip karupanaw 7 pchangi. Opeejshat karupan ashpatam pchangi. Amb sheeruni, yusur mucheeni, mang tárangiya. 30 Ashirucha, Balaksha Balam táyaru anuritam wakaraa wip 7 pachayaru, opeejaa karupanaatssha ashpatam pacharangiya. Sheeru, patumbchishshat yusur minum, minum sheeru, xanateeru muchirangiya.