1 Na shanitaa chinangcha. ¿Nitaati shanitaa wanumbimun zangamchimun mangasis xatayaruch yuseecheezich? Mishat, ¿kuku taxipungayaruch, wasikpa tusiseecheezich? 2 Mishat, ¿kamiranartaja shipaa wasikpa kamuriychich? Yungashishpasha ¿kamirnatamtaja wanutsee tip sheechich? nduni.

3 ¿Antaati shiyaa, kamiyaku, shiysha mangish kis shanitpa wanasir tsiyatstangat ashcheezish? ¿Nayaningandama. Nuwaa kiyung yacharishpa, tsiyatkush, táycheezish? 4 ¿Anoo m'chachureemish ínayarush, yuwaa kamachtakish anoo tuminku, shiyaa urutamari taacheeja? 5 ¿Tsiripichpa michitatar ashtarich shanitpa sheecheezish? Mishat, ¿anoo wats wasikpa kamuriyarush, iparshitish anpa michiteecheeja?

6 ¿Tputssha anoo kamiranartaja pachayarusin, wanutsi pakchiw ktsup, ktsup sheersin, tupaxanxaychinllina?

7 Anoo tas ¿wasappa kamiranartaja kayungkush tuseech? Mishat, ¿k'chirpungpa muchush kayungkush tuseechtamtaja? nduni. 8 Ashiriya, shiy anoo putakatush, uwsha kizpur tsiyantakachu, shiyaa waratataru, kiyung yachayaru, kasakchu, ayamtaatiya nda annung yusur káyamamtachsha. Ayamtaati anoo mbizacheezish. 9 Anoo tputs pakchusin, puniksin, itsipamaam waritachiya. Kapung punichinllinaya, watam wamari ichingaru kasiru wizpuriwa. 10-11 Wanari min tputs, Nuwaatsina ashimaam wanindaja, atinaariya, ¿tamari anpa wizpuririni tatsamooch? ¿Chakaja anpa wizpur tatsamooru, waratatarangsin, nda wanguytaku, matambshiritam kasayach? Tsapurunasish tputs minumtiyam anpa tatsamaam wanindaja.

12 Ichingaroo wizpur kasiriya. Wats mbamawaru, nda maachi tusamaam waritariya.

13 ¿Chakaja anoo tas ngusamb tamapari ashiru, anoo tuchingayach? K'chirpasha ¿chakaja mangoo kayungeech? Zap tuwapeeru, nda tusamaam waninda. 14 Mishat, ¿chaka nda punima yasaru, kukoo taxipungayaru, wanas kapunguw taaru anoo napeech?

15 Ush kireeru pshkurutariya. Patumbich tamapari ashiru kizpur mbama. Nda anoo k'chir tusamaam waninda. 16 Zap tazumuru, pakchiyam nda karariya. Izuuru tstsutariya. 17 Tstsutaru pshkurutaru, nda anush maachi tusamaam waninda.

¿Antaati pakchiyam karariwa anush pshtupu?

18 An ksheetku, kariy tamapari ashiru kizpur zunganeekiya. Wachsha zar puturi yáyashinu, kizpur chumbeep kurakurtar ashtaru ashiriya. 19 Kukushsha sumas ashiru kurakurtaru, shitungta, shitungta ashishtangat ashkiya.

20 Shipushsha, msas kpayaruch kaputku, mzeeziztar ashtaru ashiru, msas mzeetar ashkiya. 21 Kukushsha sumas ashiru kizpur puj shitar ashkiya.

22 Tputs anoo ichingarusin, punichinllinaya, watam wizpuriwa. Watsurarish wizpur kapung taariya.

23 Wazturursha yuwash watungamar taaku, an kizpur mbama. Ngusamb tamapari ashiru kayungitaatich, nda tusamaam waninda.

24 Mangsha wich tamapari ashiru kizpur mbamatamta. Patumbich tushish tamapari ashiru mbama.

25 Wanari an tsiyantaku, chiyzayachu, tputs yuwataa, Nuwamaricha ichingaru wizpuri taaki átu, antaa puniku, suwachiya.

26 Wandtaati k'chirpung, m'chittam, wasaptam payukinaariya, nda anpa pachamaam waninda, watam wanuts kizpur mbamawa.

27 ¿Tamaree ngusambpa mbamashpa pachayani, atitaateechi anpata pachachich? Waam ngusamb mbamash tirikpaz zapi ashiru nda ksachiya. Mishat, ngusambaa bronsi karipan kuchar tamapari ashiriya.

28 Wasappa kayungkitaateechi, wasuree táchakchu, nda suwakiya. Patumbichpasha tpaw ashkitaatich, masharootspaz ashiru nda táchachiya.

29 Yasinpa tpaw ashkuch, wirupapaz shinambkuch ashiru nda táchachiya. Tputs zapan k'chirpungpa tiyanta, tiyanta ashkusin, shanit k'chirpung yusaku, anoo mazinaku, stachiya.

30 Tsapumun pshiyrakchu, titkurish mbamaw kitsirutaru, anpasha tsapoo kanutataraa ashkiya.

31 Musashsha imurish pshtukchu, kpam kaputku tamatarpari ashiru, puz, puz shitaraa ashkiya.

32 Arangeemsha, uship kung kizpur mburash wir isingungamach ashkiya.

33 ¿Antaati minumtiyam tsapurunasish ashim wanindaja? Anumaritcha ashiru taarsha. ¿Mayaatseeja puniku punich? Punimaam wanindaja.

34 Anootsimaritcha ichingarumand maachee wizpur kasiru tinarangashina. Yuwaatstaa tputs wizpuri anootstaa wamari kasiriya, Apanll Jobaa tárangiya.

Ashiriya, kamaneena yuwaa arangeem yusur Apanll Jobaa tsiyatarangu anootsi.