4
Yandamaam nuwaa kamachtarangu, anumunsha musásiri nuwaa yámandarangiya yuwaa Apanll ashtachu anootsi. Ashiri yuwaa yámandarangu anoo kamanchintspa
1 Anumunsha, kanind tawatatara ashkachu anush wantsush parangina. Wakar wits tamapari ashiru kizpur kimarangiya. Ichtaru mazinarangi an ashiritam nuwaa kamanirangiya. Wangaa, naani ningeema; tárangu. Sheerush, nuw shiyaa zapan yámandachinllpa. Yuwaa Apanll zapish ashchu anoo kamanchinllpa, tárangiya. 2 Táyaranllu, Apanllsha kaneetsi tunaringarangiya.
Kanindash kuseeruri, kurakaa watsirari kapungu parangi. Tputs ashiru* Esekiyela 1.26 tsiyatsis nipta tatsamooru taaritamta. anumun kuxinarangiya. 3 Paranguri 'sineerangiya. Mburash ashiru, misha kizpur chumbeep ashiru kurakurtar ashirangiya. Tsung ashiru itureerangiya; kawamban kizpur 'sineerangiya. 4 Waanungi kurak watsirari 24 iturpirangiya. 24 tputs wachin anumun kuxinaranganaya. Wachinsha mburshinandari kamartaranganaya; orootstam tutayarangana. 5 Annungiri mamaru maracharangiya. Kariy kizpur kariytarangiya. Yapari tasasasawu ambiri tuzaz* Esekiyela 1.13 tsiyatsis nipta tatsamooru taaritamta. ashiru kurakurtangattu parangina tsimbun matayaru. An watacha Apanll Wani. 6 Mishat, yapari tasasasawu ambiritam mus tamapari ashiru taarangiya. Mus isping' ashiru 'sineerangu. Apanlleetsiri wasundurur ipunpunaru iturpiptangat ashirangiya. Wasundursha wach* Esekiyela 1.22 tsiyatsis nipta tatsamooru taaritamta. wazapan taarangiya. Wanutsimunsha wachu shuneeru taarangiya; mangunung taaru, ushinung taar ashirangiya. 7 Min tumuz manginshuch tamapari ashiru, misha wakar tamapari ashiru, misha wachsha tputs tamapari ashiru, misha yáyarur* Esekiyela 1.10 tsiyatsis nipta tatsamooru taaritamta. tamapari ashiru mangaktar ashirangiya. 8 Ichingurusin wazitpungchi minam matayaru taarangiya. Wachu* Esekiyela 1.18 tsiyatsis nipta tatsamooru taaritamta. ashiritam wazitpungchimuntam ztatariya; wazitpungach zapan taarangiya; iwaz taaru, wantsush taaru ashirangiya.
Uwshtisin kaschiritam, psaantam ungirtakanaya.
Apaa, shiyamari wanasirtishcha; shiyamari kasirish;* Isáysa 6.3 tsiyatsis nipta tatsamooru taaritamta. shiy kizpurtishcha, tárangana. Shiyamari kuraktishcha. Urutamari taaksha, Apaa. Sirú uru taarangush, ayamta urutamaritam taachsha;
ántangat ashiranganaya. 9 Apanlleetsimari yaseeranganaya. Apanllimari urutamari taaratartar ashkiya. Ashirucha, Apanllsha wasundurur ántarusin, 10 wachinsha ichinguru ungirtarangitamsina Apanlleetsi. Tútiyachee Apanllinung wayayarusin, timuchta ashirangana, watam Apanllimari urutamari taataruwa.
11 Apaa, shiy kizpurtishcha. Shiyaa iycha kurakarini; iycha Aparini. Shiyamari ichinguru tinarangsha. Shaana zandarangush, ichinguru wayarangush wanindarangiya. Shiyamun ichinguruni taakaniya. Shiyaatsimari ungirtakani. Shiyaatsimari chinakani,
ántar ashiranganaya wachinawa, ántarusin mazinarangina.
*4:2 Esekiyela 1.26 tsiyatsis nipta tatsamooru taaritamta.
*4:5 Esekiyela 1.13 tsiyatsis nipta tatsamooru taaritamta.
*4:6 Esekiyela 1.22 tsiyatsis nipta tatsamooru taaritamta.
*4:7 Esekiyela 1.10 tsiyatsis nipta tatsamooru taaritamta.
*4:8 Esekiyela 1.18 tsiyatsis nipta tatsamooru taaritamta.
*4:8 Isáysa 6.3 tsiyatsis nipta tatsamooru taaritamta.