1 Yang kumpurming pananged ang ti Jesus ya ra yang pag̱aningen ang Cristo bilang yang Mananapnay ang pinilik yang Dios, asan da ta taung inana ra yang Dios ig yang kumpurming paggegma tung Dios ang yay naana tung anya, paggegma ka tung putul nang inana ka yang Dios. 2 Maning taa masiguru ta kung nag̱apaggegmaita rang matuud tung mga aruman tang inana ra ka yang Dios kung yang Dios ya ray nag̱agegmaan ta ig yang nag̱ipanuw̱ul na tung yaten ya ra kay nag̱atuman ta. 3 Ay kipurki ya taa yang kamtangan yang paggeregmaen ta tung Dios ang ita pagtuman yang nag̱ipanuw̱ul na tung yaten* 5:3 Ikumpalar tung inaning na Jesus ang isinulat ni Juan tung 14:15, 23, 24.. Dispuis belag̱an masyadug liwag ang tumanen ta tia. 4 Ag̱aningenung belag̱an masyadug liwag ang tumanen ta ay natetenged kumpurming tinu pay inana ra yang Dios, indi ra pagpadeeg tung sistimang pangkaliw̱utan ang kuntrang pisan tung Dios. Ekel tung pagparanangeren ta ang ti Jesus talagang ya ra yang pag̱aningen ang Ana Yang Dios bilang paglinukutay tanira yang Dios tung pagkadios, indiita ra nagpadeeg tung sistimang atia† 5:4 Ikumpalar tung inaning ni Jesus ang isinulat ni Juan tung 16:33.. 5 Tinu pay indi madeeg̱an yang sistimang pangkaliw̱utan, kung indi, suluminti ilem yang taung pananged da ang ti Jesus ya ra yang pag̱aningen ang Ana Yang Dios bilang paglinukutay tanira tung pagkadios.

6 Ti Jesus ang naang pag̱aningen ang Cristo ya ra ka man taang ipinangay yang Dios taa tung kaliw̱utan ang naa ang para magtalus tung ipinagpiar yang Dios tung anya. Atiing primirung paglua na tung publiku, napruibaan da ang tanya ka man yang pinilik yang Dios ekel tung pagpabenyag na tung wai‡ 5:6a Yang ipinaingmatuud na tung pagpabenyag na, ya ra yang kabilug yang isip nang mag̱usuy tung planu yang pag̱aningen nang Ama na para tung anya ang ya rang ya rang mag̱impisa. Purisu yang nadapatan na aparti tung nag̱adapatan yang pagpabenyag yang sasang tumatalig.. Ig tung kauri-urian da nagpailala ra ka sigun tung katuyuan na ekel tung pagpaturuk na yang dug̱u nang nagpakugmatay. Yang pagpailala na belag̱an ilem ekel tung pagpabenyag na, kung indi, pati tung pagpaturuk na yang dug̱u na. Dispuis pa, pati yang Espiritu Santo pagpaingmatuud ka tung yaten natetenged tung mga bag̱ay ang atiang durua§ 5:6b Atiing pagpabenyag ni Jesus, duun da ka nagpakeen tung anya yang Espiritu Santo (Juan 1:33). Pati atiing pagpaturuk ni Jesus yang dug̱u na, duun ka mismu yang Espiritu Santong nagpaktel tung anya (Hebreo 9:14).. Talagang matalig̱an ta yang nag̱ipagpaingmatuud nang atia ay natetenged pulus matuud yang nag̱ipag̱aning na. 7-8 Kapurisu tulu yang pagpaingmatuud tung yaten natetenged tung ni Jesu-Cristo kung unu pa enged ay pagkabetang na. Ya ra yang Espiritu Santo may yang pagpabenyag ni Jesus tung wai may yang pagpaturuk na yang dug̱u nang nagpakugmatay. Ig yang tulung atia sasa ilem yang nag̱ipagpaingmatuud nira. 9 Kung yang sasang nag̱ipagpaingmatuud yang aruman tang tau yay nag̱apananged ta, ya pa yang ipinagpaingmatuud yang Dios ang atia natetenged tung pag̱aningen nang Ana Na, indi ta pa ka enged panangeren? Ay kipurki mas pang matalig̱an ta yang ipinagpaingmatuud nang atia tung yaten kay tung maskin unu pay nag̱ipagpaingmatuud tung yaten yang aruman tang tau ka ilem. 10 Purisu yang kumpurming pagtalig yang sadili na tung pag̱aningen ang Ana Yang Dios, nag̱asiguru na rang pisan ang talagang matuud yang ipinagpaingmatuud yang Dios ang atia. Piru kung tinu pay indi pag̱impurmi tung ipinagpaingmatuud yang Dios ang atia, asan da nga ipaimukliay na natetenged indi ra nananged tung ipinagpaingmatuud na natetenged tung pag̱aningen nang Ana Na. 11 Ya taa yang linuaan yang pagpananged ta tung ipinagpaingmatuud yang Dios. Asanita ra pinaeyangan na ta baklung pagpangabui tang atu tung pagpangabui nang anday pagtapusan na ekel tung pagtaralig̱en ta tung pag̱aningen nang Ana Na. 12 Kung tinu pay may kaampiran tung Ana Na, yay may pagpangabui nang baklu ang anday pagtapusan na. Piru kung tinu pay anday kaampiran tung anya, anda pa kay pagpangabui nang baklu.

13 Yang mga bag̱ay ang atia, isinulatu ra tung numyung kumpurming pagtalig tung pag̱aningen ang Ana Yang Dios ug̱ud asan da nga siguruay mi ang naeyanganamu ra ka man ta ipagpangabui ming baklu ang anday pagtapusan na* 5:13 “pagtalig tung pag̱aningen ang Ana Yang Dios” tung Giniriego “pagtalig tung aran yang pag̱aningen ang Ana Yang Dios.” Balikan ta yang pasanag tung 3:23 natetenged tung bitalang ‘aran’.. 14 Purisu kung magpalengetita ra nganing tung anyang mag̱ampu, may kumpiansa ta ra ang kung unu pay ingalukun ta tung anyang kumpurming uyun tung kalelyag̱an na, pamatienita ra anya. 15 Bilang kumus nag̱askean ta ra ang kung unu pay ingalukun ta tung anya pamatien na, ig disir nag̱askean ta ra ka ang binuat na ra yang iningaluk ta, maskin indi pa nag̱aita ta.

16 Katulad da asan ang kung may sasang putul tang tumatalig ang yay maita tang pagbuat ta kasalanan, piru belag̱an yang kasalanan ang makanayan ta ipagkablag na tung Dios ang asta tung sampa, simpri ipag̱ampu ta tung Dios ang para maulikan da yang pagpakigkapulit na tung ni Jesu-Cristong nawaldang da. Atia, uliken da yang Dios basta yang pag̱abuat na belag̱an yang makanayan ta ipagkablag na tung Dios ang asta tung sampa. Piru may dumang pagbuat ta kasalanan ang yay makanayan ta ya tii. Kung natetenged tung mga taung maning tia, indiamu ka ag̱aningenu ang ya pay ipag̱ampu mi tung Dios† 5:16 Kung unu pang kasalananay tia, puiding ya ra yang pagpakuindi yang sasang tau tung ni Jesus ang indi ra enged mananged ang tanya yang pag̱aningen ang Cristong pinilik yang Dios ang mag̱ing Mananapnay ig indi ra ka enged magtalig yang sadili na tung anyang magpatapnay. Katulad tung mga taung pamagpakigkuntra tung ni Jesus ang sinambit ni Juan tung 2:18, 22-23 may yang mga manigtulduk ta kabuklian ang pamag̱ambu ang tanira unu mga manigpalatay yang bitala yang Dios buat ang yay sinambit na tung 4:1-6.. 17 Kung tung bag̱ay, yang tanan ang pagburuaten ta malain purus kasalanan tung pagterelengen yang Dios. Piru may kasalanan ang indi makanayan ta ipagkablag yang tau tung Dios ang asta tung sampa.

18 Dispuis nag̱askean ta ang kumpurming tinu pay inana ra yang Dios, indi ra pagpadayun tung pagpakasalak na, kung indi, ti Jesus ang ya kay maning pa tung inana yang Dios atiing pangingtau na taa tung kaliw̱utan ang naa, yay pagmanada tung anya ug̱ud indi mageesan ni Satanas‡ 5:18 Tung pagsambit ni Juan natetenged tung ni Ginuung Jesus ang tanya maning pa tung inaana ka yang Dios, yang gustu nang pabilug̱an ya ra yang pagpakiunung ni Ginuu ta tung yaten ang mga tumatalig ang ita kag anaay yang Dios. Ug̱aring ilem yang pagkaana na tung Dios aparti tung pagkaana ta. Tanya puiding ag̱aningen ni Juan ang inana yang Dios natetenged yang pagmatung ni nanay na tung anya liit tung kagaeman yang Dios. Ta yaten ag̱aningenita ka ni Juan ang inana ra yang Dios, belag̱an natetenged ang yay natauan ta, kung indi, itag paeyangay na ta irinsiang baklu ang liit tung anya bilang maning pa tung ipinanganaita rang uman sigun tung pag̱irimakluen yang Espiritu Santo tung mga kinaisipan ta (Juan 3:3, 5). ang yay pinangapunglan yang tanan ang malalain. 19 Nag̱askean ta ka ang ta yaten, yang may anya tung yaten ya ra yang Dios ig yang tanan ang mga tau ang pamagpaguyud tung sistimang pangkaliw̱utan yay nag̱akemkem ni Satanas. 20 Yang sam bilug pa kang nag̱askean ta ang yang pag̱aningen ang Ana yang Dios nag̱ingtaung bilug ig pinaeyanganita ra ka anya ta ipag̱intindi ta tung kamatuuran ug̱ud asanita ra magkatinir ta kaampiran ta tung matuud ang Dios. Bilang magrarampilanita ra yang ultimung Dios durua yang pag̱aningen nang Ana Na ang ti Jesu-Cristo. Ay tanya ka man yang matuud ang Dios ig yay pagpaeyang tung mga tau ta ipagpangabui nirang baklu ang anday pagtapusan na.

21 Kapurisu ta numyung agkaw̱ig̱enung mga anaw, kumus ti Jesus yang matuud ang Dios, magbantayamu ra ta mupia tung mga sadili mi ang indiamu enged magtalig tung maskin unu pang bag̱ayay ang nag̱ipakli yang mga tau tung Dios ang nag̱apagamenan.

Ya ra ilem tia ay masulatu tung numyu,