22
Deibida ilauyoi Adulami yo Mowabe
1 Kabo Deibida yanuwa Gata ilogabaen mwa iyabubu ilau dupa lalakina esana Adulami. Na tamana ana nume kana tomiyayao yo tabe kanakavao wasana sibenalan mwa silobi sipatu koina mekalikava simiyamiya waya. 2 Yo meuloili miyapolowe silobai tupwaliyao kali yagayaga nige siyayamaisali mwa meuloili nuwali sinae kabo silogogo silobi Deibida koina iya sipei kali tobaguna mwa tomone kali baibaiwa powa andeledi (400). 3 Muli mena Deibida ilau Mowabe kana kin yanuwa Mispa koina iba, “Kategu kowa tem kutalam sinagu yo tamagu silaoma koliwo mekamikavao bwaite koina kwamiyamiya kanasiga yakatai kani Yeoba tawae iginauli kaiwegu.” 4 Kabo ipei-gabaegili Mowabe kana kin nimana mena na iya ilau Adulami dupana yabo koina ikeno-wadam yo imiyamiya waya bwaine koina. 5 Muli mena palopita yabo esana Gada ilau Deibida koina yo iwaloba, “Tabu bwaite koina kumiyamiya. Kutolo kulau Yuda dedeina koina.” Mwa Deibida itolo yo ilau yanuwa Eledi gunuwalana mena ilusae yo imiyamiya.
Saulo topwaoli iunuili Nobi koina
Kin Saulo me ana topaisowao simiyamiya Gibeya koina. Yo iwalo kolili iba, “Tawae kaiwena komiu Deibida kwasagusagui na wakalomagigi-lagau?” Kabo tomo yabo esana Doegi tomo Idoma iwalo Saulo koina iba, “Eimileki Deibida isagui yo ineli Yeoba koina tawae kani iginauli. Beledi yo tabe Golaiyadi ana kaleya kelepana iwolegili Deibida koina.”
Tomna 6-10
Kabo Saulo iwalo Eimileki yo ana boda silaoma koina iba, “Tawae kaiwena komiu yo Deibida ami nuwatu kwapei-kaigedai na wakalomagigi-lagau? Kwasagui kabo isanasana ana solasola na iunuiyau.”
Tomna 11-13
Eimileki kainana iyamaisa iba, “Am topaisowao meuloili kaloli mena Deibida inamwanamwasosi yo sowasowana am meli kupei koina. Na tabu yakewa yabo kuwawalowen meyagu bodao kolimai.”
Tomna 14-15
Kabo muli mena Saulo iwalo ana tokaleyayao Eimileki yo ana bodao siunuyamateli na sisikote. Kabo Saulo iwalo Doegi koina, “Kowa kuunuyamateli.” Kabo Doegi ilau na topwaoli kali baibaiwa eiti paibi (85) iunuyamateli kaliyatenane koina. Na Eimileki natuna esana Ebayada ibomamo iyabubu ilau imiyamiya Deibida mekanakava. Deibida iwalo koina iwaloba, “Mekaukava kowa tamiyamiya kaiwena tomone nuwanuwana kowa te yau iunuila.”
Tomna 16-23