10
1 Hhiee koi, gu lou idoo ga slae hari khisla muuna gooii haa firoo dooii pandaa da Iliitleemuge, ti sa hida koi Waisraeeli, digima ilabuꞌumi. 2 Ana hiidahhasa ilatlawa pandataa tuba, inay konay maguuma da dabiidu gu Iliitleemu. Teesaaqay see, maguuma dooina yoó kontaaba caahhamuu gu lou. 3 Inay hhidinay, idoo Iliitleemu giyoó ilii faadiye hida, ma slayri ibinaa daa tafaꞌadi. Inay yoóti dabiidiyay ibinaa daa tafaꞌadi pandaa da Iliitleemuge hari yondu gooina. Inay yaa siꞌiri amotee da Iliitleemu, daroó khawa ibinatee daa tafaꞌadi. 4 Kristu yaa hiigaasi yondu gu sariyaa, kila heedi gu ⁄imba ina duguma faadi kona ibinaa daa tafaꞌadi pandaa da Iliitleemuge, sirakooma da sariyaa see hhaka.
Ilabuꞌuru ti sa hida sliimaa
5 Musaa yaa handikimi tuba, amoo heedi duguri faadiye konay ibinaa daa tafaꞌadi pandaa da Iliitleemuge, ti hari amoo da iliikooma sariyaa. Ina yaa handikimi tuba, “Heedi goó sirakooma gimba goõ gu sariyaa, hiti ibiidi hari amoo da sariyatee.”✡ 10:5 Yuꞌudii kitaabuu gu Gimba gu Walaawi 18:5. 6 Inkoo, hida gu koomee ibinatee daa tafaꞌadi doó daqa ⁄imba dahha, yoóti kaayay tuba, “Hhanti kaada muuna googuu tuba, ‘Miyaa na day rawaa gu raw naqatloo?’✡ 10:6 Yuꞌudii kitaabuu gu Hiislaslaw gu Sariyaa 30:13. ” (Hari amotee haraagi khay Kristu hhapeege). 7 Kara, hhanti kaaday tuba, “Miyaa nii⁄eeti khonsleebaa naqatloo?”✡ 10:7 Yuꞌudii kitaabuu gu Hiislaslaw gu Sariyaa 30:13. (Hari amotee haraagi khay Kristu daqa tuueenaago).
8 Gu lou, Handikaa da Iliitleemu yoóti kaada tuba, “Ya⁄aboti da Iliitleemu ilaciyaa kokuu wanta, afa googuu haa muuna googuu wanta.”✡ 10:8 Yuꞌudii kitaabuu gu Hiislaslaw gu Sariyaa 30:14. Ya⁄aboti da ⁄imba Yeesu ganoó kakaana. 9 Sa gimba, bere kaada hari afa googu loi tuba, “Yeesu ti Looimoo gu Goõ,” haa gi iliipaꞌanta muuna googuu tuba, Iliitleemu gwaa slafisi ina ayisago, dugu ilabuꞌuna. 10 Heedi yoóti ⁄imbi Yeesu hari muuna gosi, sa gimbakee Iliitleemu gu tosaa faadi kona ibinaa daa tafaꞌadi pandaa dosii. Kara, yoóti kaay hari afa gosi, dugu tosaa ilabuꞌuna.
11 Handikaa da Iliitleemu yoó kaada tuba, “Kila heedi gu ⁄imba ina, etaa dugu muriidisiyaaba.”✡ 10:11 Yuꞌudii kitaabuu gu Isaaya 28:16. 12 Gimbaki laqaaqana tuba, paslimisu hhaku tla⁄aã gu Wayahuudige haa hida gu hhapapu wakinay. Looimoo gu Goõ ti leẽ kilesi, ina yoóti ⁄aafi hari khisla hida goõ goó ilii⁄aa⁄ee ina. 13 Handikaa da Iliitleemu yoóti kaada tuba, “Kila heedi gumaa ilii⁄aa⁄aa uma gu Taataa Iliitleemu, dugumaati ilabuꞌuna ha ina.”✡ 10:13 Yuꞌudii kitaabuu gu Yoeeli 3:5.
14 Teesaaqay, inay gu malee ilii⁄aa⁄iyay ina, tay gu kahhiyay ⁄imba? Kara, inay gu malee ⁄imbiyay, bere kahhiyay akhasaraa gimba gosi? Kara, inay malee akhasiyayi gimba gosi, bere heedi gu kakaaru hhaku? 15 Kara, hida malee kakaanay, bere digiba ya⁄aboo? Idoo daa ilii handikimi gooay Handikaa da Iliitleemu tuba, “Ti gimba guraa hiiboo⁄u hari khisla, khawaraa da hida hhakaꞌa goó kakaamee Gimba gu Hhou!”✡ 10:15 Yuꞌudii kitaabuu gu Isaaya 52:7.
16 Teesaaqay see, hida goõ gooba gwaa ⁄imbee Gimbakee gu Hhou. Tletimiisay Isaaya yaa kaay tuba, “Ye Taataa Iliitleemu, ti miyaa naa ⁄imbi ya⁄aboo gaa kakaani?”✡ 10:16 Yuꞌudii kitaabuu gu Isaaya 53:1. 17 Teesaaqay, ⁄imba yoóti itatiimisu gu ya⁄aboo da Iliitleemu dahhada. Kara, itatiimisukee yoóti daqa ya⁄aboo da Kristu dahhada. 18 Inkoo, maasa ambee, inay gwaabaslii slawaraa gimbaki? Gu lou, giyaa slayri. Handikaa da Iliitleemu yoó kaada tuba,
“Afoo dooina* 10:18 Afoo dooina: Tiꞌii dati laqaaqana, idoo khooroo haa raw giyoó ilii kakaanee gimba gu Iliitleemu. Yuꞌudii kitaabukii 1:19-20. hindii qonti daqa hida gu khooroo sliimaa,
kara gimba gooina hiĩ day digimi gu khooroo goõ.”✡ 10:18 Yuꞌudii kitaabuu gu Daareesoo 19:4.
19 Kara, ana Pawlo slaꞌa maasa ambee, gu lou Waisraeeli gwaabaslii caahha gimbaki? Da pandaa Musaa yaa kaay tuba,
“Hangu ⁄isima unkuray, ma antiri tloomu daqa hida hhakaꞌay gu hhapee gooba.
Kara, unkuray hangu slahhaaꞌasa hari amoo da hida gu hhapee daa bawti.”✡ 10:19 Yuꞌudii kitaabuu gu Hiislaslaw gu Sariyaa 32:21.
20 Kara, tletimiisay Isaaya hari ⁄atlimaa gu didiri, gi kaay tuba,
“Hida hhakaꞌa gwaaba dabimaamidu ana, hinigi slayri.
Hangunii tlaaꞌasi daqa hida gwaaba maasaraa ana.”✡ 10:20 Yuꞌudii kitaabuu gu Isaaya 65:1.
21 Teesaaqay see, Isaaya gi kaay daqa Waisraeelige tuba,
“Iliitleemu kakaakana tuba, ‘Baloo goõ haã tafaꞌasi dabaiĩ koi,
daqa hida goóba akhamisu haa goó kanimisee gimba gooi.’✡ 10:21 Yuꞌudii kitaabuu gu Isaaya 65:2. ”
✡10:5 10:5 Yuꞌudii kitaabuu gu Gimba gu Walaawi 18:5.
✡10:6 10:6 Yuꞌudii kitaabuu gu Hiislaslaw gu Sariyaa 30:13.
✡10:7 10:7 Yuꞌudii kitaabuu gu Hiislaslaw gu Sariyaa 30:13.
✡10:8 10:8 Yuꞌudii kitaabuu gu Hiislaslaw gu Sariyaa 30:14.
✡10:11 10:11 Yuꞌudii kitaabuu gu Isaaya 28:16.
✡10:13 10:13 Yuꞌudii kitaabuu gu Yoeeli 3:5.
✡10:15 10:15 Yuꞌudii kitaabuu gu Isaaya 52:7.
✡10:16 10:16 Yuꞌudii kitaabuu gu Isaaya 53:1.
*10:18 10:18 Afoo dooina: Tiꞌii dati laqaaqana, idoo khooroo haa raw giyoó ilii kakaanee gimba gu Iliitleemu. Yuꞌudii kitaabukii 1:19-20.
✡10:18 10:18 Yuꞌudii kitaabuu gu Daareesoo 19:4.
✡10:19 10:19 Yuꞌudii kitaabuu gu Hiislaslaw gu Sariyaa 32:21.
✡10:20 10:20 Yuꞌudii kitaabuu gu Isaaya 65:1.
✡10:21 10:21 Yuꞌudii kitaabuu gu Isaaya 65:2.