6
1 Inkoo, dandiray ti yondimiisee sliimaa haa Iliitleemu, hangu tlaatlaqasana hhanti ⁄imbiday hhamisa diitiray hhoinaykira gu didiru gu Iliitleemu, gwaa oodiri daqa dosaa. 2 Maꞌaana Iliitleemu kakaakana tuba,
“Qatlay guraa hiiboo⁄uge, hagwaa akhasi.
Kara baloo da ilabuꞌuruuge, hagwaa iliiay ugu.”✡ 6:2 Yuꞌudii kitaabuu gu Isaaya 49:8.
Yuꞌudiyaa, hiĩ na qatlay gu Iliitleemu guraa hiiboo⁄u, inkoo na baloo da ilabuꞌuru.
Pawlo labaꞌasu gosi
3 Dandiray hhanti tlaa⁄u gu hiitatafimidu tleehhidana gimba sliimaa gu amoo da heedi lenge see, yondu goori duguma may ilawaamisu. 4 Teesaaqay see, hangu laqanee amamu sliimaage tuba, gu lou dandiray ti yondimiisee da Iliitleemu. Dandiray hoóyi kaasana naraꞌa qatlay gu labaꞌasuge, maanage, haa khoslongorage. 5 Dandiray dandii difi, dandii khiidimi, haã gauusani, haã yondiidani yondu gwaa karahhu, haã guulani haa gi ibiidani hari qori. 6 Hangu laqanee dandiray ti yondimiisee da Iliitleemu, hhoinay gu muunainge, caahharaage, hiikaasage haa hhoinay gu didiruge, Muuna gu Iliitleemuge haa slaꞌamuu gu lou. 7 Dandiray haã kakaani ya⁄aboo da loi haa haã laqani ⁄uuru gu Iliitleemu. Ibinaa daa tafaꞌadi na khasima goori dandiray kilakoti gimba sliimaage gu bara da daba gu ⁄uya haa gu bara da daba gu basa.
8 Dandiray hanti yondiidani sa Iliitleemu qatlay gu hhoinay gu wanqamee da didirige haa ilamureege, ilawaamisuge haa hhaꞌaleemisuge. Dandoóti ilatahhi tuba, hiicorimiisee, kaslenkwaa hoóti kakaana gimba gu lou. 9 Danditi hhidina pahha, kaslenkwaa dandi khui hari khisla. Goóti kaka⁄ee pahha, kaslenkwaa ti slafana. Dandoó difi kaslenkwaa dandoó cu⁄iyaaba. 10 Dandiray ti hida hhakaꞌa pahha gu koomee slahhaaꞌamee, kaslenkwaa balalu sliimaa ti kona hhaꞌaloo. Ti kwaeeli pahha, kaslenkwaa hoótii hindaqaruudisana hida wa⁄a. Kara, dandoóti arina hida hhakaꞌa pahha guba idoo, kaslenkwaa kona idadu sliimaa.
11 Ye hhiee gu Korinto! Dandiray hanti cocoani pandataa daqa doogunay, haa sanguti pooisani muunaiĩ koti sumuku. 12 Dandiray hangu maynaaba slaꞌamuu unkuray, unkuray loi naa maydiri slaꞌamuu dandiray. 13 Inkoo, gimaamisa haa unkuray yaꞌay koi pahha. Unkuray see tlaaꞌasa sumuku muunaiĩ kokuna.
Dangu hhanti ilagaasi tongaiimaage ⁄⁄ sliimaa haa hida gooba ⁄imba
14 Hangu hhanti ilagaasiday tongaiimaage sliimaa haa hida goóba ⁄imba. Maꞌaana gu lou, ibinaa daa tafaꞌadi pandaa da Iliitleemuge haa tlakwaroo hingoó wariiakhasiyaaii? Baku wantaa ilagaasa tla⁄aã da cencee haa hhantee? 15 Kara, wariiakhasoo mala na wanta tla⁄aã gu Kristu haa Sataanimoo? Baku ina goó ⁄imba ilagaasaraa mala kona haa hiĩ goóba ⁄imba? 16 Slime, wariiakhasa mala na wanta tla⁄aã gu mara gu didiru gu Iliitleemu haa sanaamuu? Maꞌaana dandiray ti mara gu didiru gu Iliitleemu gu slafa. Iliitleemu gooay giyaa ilii kaay tuba,
“Ha ibiida sliimaa haa inay haa khookhocima tla⁄aã gooinay,
ana ti Iliitleemu gooina tleehhida, inay see hida koi tleehhidiyay.”✡ 6:16 Yuꞌudii kitaabuu gu Gimba gu Walaawi 26:12; Esekeeli 37:27.
17 Sa gimbakee Taataa Iliitleemu yaa kaay tuba,
“Inkoo, ca⁄aruu tla⁄aã gooinaa, hangu tlintiꞌisidee haa inay.
Hhanti nangusiday idoo lensee da tlakwi, ana hangumaa kwahhasuusa unkuray.”✡ 6:17 Yuꞌudii kitaabuu gu Isaaya 52:11; Esekeeli 20:34.
18 Gi kara kaay tuba,
“Ana hamaa Taataa googuna tleehhida,
unkuray see hamaa yaꞌay koi tleehhitay gu hhawatee haa gu tigay,
ti ana Taataa Iliitleemu gu kooma ⁄uuru na kakaakama.”✡ 6:18 Yuꞌudii kitaabuu gu 2 Samweeli 7:14.