1 Mu-ngoyurra gun-guwarr Wangarr gu-jarlapuna gun-nardiya rrawa waykin rrapa wupa. 2 Gun-nardiya rrawa gala gun-nga rrawa gu-jirrarna. Wurra minypa an-munya a-mayana a-ji rrapa gu-gonyinyjinga bugula wupa gu-yunya. Wurra Wangarr nipa an-mawunga waykin gun-gata gu-bugula gu-guyinda a-rrigirrgarra rrapa minypa jaga a-ganana.

3 Lika Wangarr a-wena, a-yinanga, “Gu-naya barra gu-ji,” lika a na-murna gu-nayana gu-ji. 4 Rrapa nipa gu-nana gun-gata gun-molamola. Lika gu-ngorrkorndanga; gun-gujayanaya ngardapa, rrapa an-munya a-maya ngardapa. 5 Gun-gata gun-gujayanaya nipa Wangarr gu-ngurrjinga gun-nelangga ‘rrengarrenga,’ rrapa gun-gata an-munya a-maya nipa gu-ngurrjinga ‘ana-munya.’

Ganapiya. Gun-nardiya minypa yi-rrana gu-ni rrapa nuwurra guna-gepana, nipa ngorrngurra gun-nelangga minypa gun-ngardapa.

6 Lika Wangarr a-wena, a-yinagata, “Gojilapa gu-lirrjiya barra, yanma bugula gu-ngorrkorndiya barra ngardapa ngardapa.” 7 Gu-gurda ngacha minypa Wangarr gu-jarlapuna gojilapa minypa gu-lirrjiyana rrapa minypa bugula gu-ngorrkorndiyana. Minypa bugula gun-nerranga wupa gun-gata gu-lirrjiya gu-jirra, rrapa gun-nerranga waykin. Ganapiya, lika gu-yinagata gu-ji. 8 Rrapa mun-gata minypa gu-lirrjiya gu-jirra, nipa Wangarr mu-ngurrjinga mun-nelangga ‘dach.’

Ganapiya. Gun-nardiya minypa yi-rrana gu-ni rrapa nuwurra guna-gepana, nipa ngorrngurra gun-nelangga minypa abirri-jirrapa.

9 Lika Wangarr a-wena, a-yinagata, “Bugula gun-gata wupa mun-gata dach mu-jirrapa, nipa bugula barra gu-gakiya barra ngardapa, barra yanma jel gu-bengga yarlanga.” Ganapiya, lika gu-yinagata gu-ni. 10 Lika gun-gata jel nipa Wangarr gu-ngurrjinga gun-nelangga ‘rrawa,’ rrapa bugula gu-gakiyana ngardapa gun-nelangga ‘gun-bachirra.’ Rrapa nipa Wangarr gu-nana gun-gata gun-molamola.

11 Lika Wangarr a-wena, a-yinagata, “Mun-jarlarla m-bengga barra, rrawa mu-rrima barra minypa gorrngunya rrapa gun-jong balaja mu-rrimanga, minypa mipila mu-jirra mun-guyinda ngardapa ngardapa mu-rrimanga.” Ganapiya, lika gu-yinagata gu-ni, 12 mun-jarlarla m-bena gorrngunya rrapa gun-jong balaja mu-rrimanga, minypa mipila mu-jirra mun-guyinda ngardapa ngardapa mu-rrimanga. Rrapa Wangarr mu-nana mun-gata mun-molamola.

13 Ganapiya. Gun-nardiya minypa yi-rrana gu-ni rrapa nuwurra guna-gepana, nipa ngorrngurra gun-nelangga minypa abirri-jirrapa gun-ngardapa.

14 Lika Wangarr a-wena, a-yinagata, “Waykin mu-dach gun-gujayanaya gun-guyinda gu-jayanaya barra gu-ji, minypa ngardapa ngardapa gu-nega barra gun-gata rrengarrenga rrapa mola ana-munya, rrapa minypa burr-gurdagurdarra barra gu-workiya gu-yinpa barra bugula guna-warrcha barra rrapa gu-yinpa barra guy-bawa barra, rrapa minypa gu-yinpa barra jemberr gu-ni barra rrapa gu-yinpa barra warlirr gu-ni barra, rrapa minypa gu-yinmiyapa ngorrngurra gu-ni rrapa a-yinmiyapa ran.gu a-ji, gu-gurda ngacha. 15 Rrapa barrwa minypa gu-jel aburr-nirra aburr-naya barra aburr-ni.” Ganapiya, lika gu-yinagata gu-ni.

16 Gu-gurda ngacha minypa nipa Wangarr ana-nyala bijirriny-jarlapuna abirriny-jirrapa abirriny-jata wana abirriny-jayanayarra abirriny-jirra. Minypa jin-gata wana jin-babalapa nipa barra jina-darrja jina-workiya, rrengarrenga gu-ni barra gu-workiya, rrapa minypa an-gata marr a-yinaga wana nipa barra a-jayanaya a-ji a-workiya, ana-munya gu-ni barra gu-workiya. Rrapa jin-gata gata jin-guyinda burr-guta nipa Wangarr jiny-jarlapuna. 17 Lika jiny-jarrana a-garrana gun-gata gun-gujayanaya gun-guyinda yi-gata mu-dach, ngarripa gu-jel arr-nirra barra arr-naya arr-ni. 18 Rrapa minypa barra a-jayanaya jiny-jayanaya minypa rrengarrenga rrapa ana-munya, rrapa ngardapa ngardapa gu-nega barra gun-gata gun-gujayanaya rrapa mola gun-gata an-munya gu-maya gu-jirra. Lika Wangarr gu-nana gun-gata gun-molamola.

19 Ganapiya. Gun-nardiya minypa yi-rrana gu-ni rrapa nuwurra guna-gepana, nipa ngorrngurra gun-nelangga minypa abirri-jirrapa abirri-jirrapa.

20 Lika Wangarr a-wena, a-yinagata, “Gu-bugula barra a-waywa jiny-yaywa jin-jaranga an-jaranga an-guwaywuya an-guyinda. Rrapa gu-jel waykin yi-gata mu-dach nipa burdacha an-guyinda burdacha jin-guyinda jin-digirrga a-rrigirrga barra a-workiya.” 21 Gu-gurda ngacha minypa Wangarr burr-jarlapuna aburr-gata wana aburr-bapala aburr-guyinda gu-bachirra minypa aburr-yurra aburr-workiya, rrapa mola an-jaranga an-gata an-guwaywuya an-guyinda gu-bugula a-yurra, rrapa burdacha burr-guta an-jaranga jin-jaranga nipa burr-jarlapuna. Lika Wangarr gu-nana gun-gata gun-molamola. 22 Lika burr-jalkakaja rrapa aburr-molamola burr-negarra, minypa a-yinanga burrwa, “Delipa nyibu-ma barra nyiburr-ni, nyiburr-jaranga nyiburr-ni barra nyiburr-bamba, garda gu-bugula minypa burr-guya nyiburr-jaranga nyiburr-ni barra. Rrapa burdacha aburr-guyinda abu-ma barra delipa, aburr-jaranga aburr-ni barra aburr-bamba gata gu-jel.”

23 Ganapiya. Gun-nardiya minypa yi-rrana gu-ni rrapa nuwurra guna-gepana, nipa ngorrngurra gun-nelangga minypa murna arr-jirra arr-ngardapa.

24 Lika Wangarr a-wena, a-yinagata, “Gu-jel barra a-rrigirrga jin-digirrga jin-jaranga an-jaranga minyjak an-guyinda, minypa an-gumurna rrapa an-mugat wana rrapa an-delipa.” Lika gu-yinagata gu-ni. 25 Minypa nipa Wangarr burr-jarlapuna an-gata minyjak an-guyinda an-mugat gun-nardiya rrawa a-rrigirrgnga a-workiya, rrapa an-gumurna an-guyinda minyjak an-gata minypa ana-gugaliya a-ganyja a-workiya, rrapa mola jarrka, nguymbula an-nga burr-guta gu-jel a-rriknga a-rrigirrgnga a-workiya nipa Wangarr burr-jarlapuna ngardapa ngardapa. Lika nipa gu-nana gun-gata gun-molamola.

26 Lika nipiya Wangarr a-wena, a-yinanga, “Ngatipa barra arrbi-jarlapa gu-galiya yerrcha minypa ngatipa arri-mawunga. Birripa barra wana aburr-ni barra minypa ngatipa, rrapa wana aburr-ni barra nula gun-nardiya rrawa. Minypa jichicha an-guyinda gu-bugula a-yurra a-boya rrapa burdacha an-guyinda waykin a-boya, rrapa mola minyjak an-guyinda rrapa an-nga burr-guta gu-jel a-rriknga a-rrigirrgnga a-workiya birripa gu-galiya yerrcha wana aburr-ni barra nula.” 27 Lika Wangarr bijirriny-jarlapuna gu-galiya yerrcha. An-nurra jin-gama bijirriny-jarlapuna nipiya an-mawunga.

28 Lika nipiya Wangarr burr-jalkakaja rrapa aburr-molamola burr-negarra gu-galiya yerrcha. Minypa a-yinanga burrinyjula, “Delipa nyirrbu-ma barra nyiburr-ni, nyiburr-jaranga nyiburr-ni barra nyiburr-bamba, gun-nardiya rrawa minypa gu-ngana nyiburr-maya barra nyiburr-ni rrapa rrapa nyiburr-ninyapa barra. Minypa wana nyiburr-ni barra nula jichicha an-guyinda gu-bugula a-yurra a-boya, rrapa mola burdacha an-guyinda waykin a-boya, rrapa an-nga burr-guta an-guwaywuya an-guyinda gu-jel a-rriknga a-rrigirrgnga, ana-goyburrpa barra wana nyiburr-ni nula.” 29 A-yinagata, “Minyja birriny-borrwa: Ngaypa ngu-barnjinga ana-gorrburrwa mun-jaranga gorrngunya rrapa gun-jong minypa mipila mu-jirra mu-rrimanga, mun-gata burr-guta gu-jong balaja mu-rrimanga, mu-gata ngacha ana-gorrburrwa balaja. 30 Rrapa minyjak an-guyinda gun-nardiya rrawa, rrapa burdacha an-guyinda waykin a-boya, rrapa jarrka, nguymbula, an-nga burr-guta gu-jel a-rriknga a-rrigirrgnga a-workiya, ana-nga an-gata an-guwaywuya an-guyinda, ngaypa ngu-barnjinga nuluwa balaja minypa gorrngunya mun-guyinda rrapa gun-jong mulu mu-jirra.” A-yinagata a-wena nipa Wangarr. Ganapiya, lika gu-yinagata gu-ni. 31 Rrapa Wangarr gu-nana gun-gata gun-bulapalawa nipa gu-jarlapuna minypa gun-narda gun-molamola warrpam.

Ganapiya. Gun-nardiya minypa yi-rrana gu-ni rrapa nuwurra guna-gepana, nipa ngorrngurra gun-nelangga minypa arr-ngardapa arr-murna rrapa gun-ngardapa.