Nehemaiya Dedena
Liba Famahata
Diuda dodogadi haisa sidohana be Babilon yai sa miya yo sa fuyo edi nuꞌu bena Yaubada ena Dubu Tabuna Yelusalem yai sa ginauli fuyoi dededi mate Esela yo Nehemaiya edi buka yai sa ulidi.
8
Esela Laugagayo ya Fatili Dodoga Lebedi yai
Nehemaiya 8:1-10
1 Dodoga mahudoꞌidi sa faꞌoigogo esegama dobidobi yai, Hoꞌowa Edaꞌedana Hafohafona yai. Laugagayo tau lau faꞌataenna Esela sa faliba bena Mose ena Laugagayo Bukana ya fakalamahanoyama.
2 Nawalahi fafaligigi-luwagana yai na lahai bwaꞌibwaꞌina mate tau antalasam, Esela, Laugagayo Bukana ya leyama tatau, wawahin yo tau atahi lobahina mahudoꞌidi lebedi. 3 Dobidobi yai, Hoꞌowa Edaꞌedana Hafohafona yai mate Esela Laugagayo Bukana ya fatili falaꞌi tatau, wawahin yo tau atahi lobahina hahaisa lebedi yai. Ya ifi tatatali mate ya fatubu ya fatili ee–, lahai laꞌi.
4 Faꞌoigogo fatafatana lofalofa sa ginauli mate hewana yai laugagayo tau lau faꞌataenna, Esela ya mwaito. Nima sibana yai sa mwaito mate: Matitaiya, Sema, Anaiya, Ulaiya, Hilikaiya yo Maseiya. Na seuseulina yai mate: Pedaiya, Miseli, Malikiya, Hasum, Hasibadana, Sekalaiya yo Mesulam.
5 Laugagayo Bukana ya soꞌe mate dodoga mahudoꞌidi sa itaꞌita hasa be sa ita, paꞌana in hewa yai. Maihalana, Laugagayo Bukana ya kalasi, mahudoꞌidi sa obiyo.
6 Esela iye,
Guyau hesana E lau hitin! In Yaubada Adiꞌadidilina!
Dodoga mahudoꞌidi nimadi sa lau hitindi tiyen,
“Moꞌisa! Wananaha!”* Amen Hebelu alinadi yai aniyona mate Wananaha alinada yai.
Habahim sa hoba lidi tanohi yai na Guyau sa fadebasae.
7 Sulu Lewi Laugagayo Bukana tau liba faneganegana hesadi mate: Diyesuwa, Bani, Selebiya, Diyamin, Akubu, Sabetai, Hodaiya, Maseiya, Kelita, Asiliya, Diyosabada, Hanan yo Pelaiya. Na dodoga edi aba obiꞌobiyo yai sa ataꞌatahi. 8 Somo ya fatifatili, aniyona sa liba famahata be dodoga sa nuwatuhu lobahi.
9 Fuyana dodoga, laugagayo libadi ni sa atahi mate, sa tan, be Gawana Nehemaiya, yo Esela, (in tau antalasam yo laugagayo tau lau faꞌataenna) yo Sulu Lewi, iti laugagayo tau liba fanegadi, mahudoꞌidi sa falibadi tiyen,
“Guyau, emi Yaubada matana yai lahai te, mate tabuna. Be tabu au tan!”
10 Na Nehemaiya iye,
Au lau be anꞌan loholohodi ami au an, yo nomnom amꞌamnadi ami au nomdi. Na salumadi hige somo adi ti nonohai mate adi au feledi. Lahai te, Guyau ena lahai fafatabuna. Guyau ena kwade mate emi adidili be tabu nuwamiu ti heyaya.