5
1 Amoli edi babaꞌisa Diyodan tefa leuleuna yai yo Kanana edi babaꞌisa Gabogabo Laꞌilaꞌi tefana yai, wasa sa atahiyen sidohana Yaubada Diyodan Hoꞌowana ya fatede, na Isalaela mahudoꞌidi sa lau tefa. Yo fede, Amoli yo Kanana edi babaꞌisa nuwadi sa belubelu. Ya famala edi ꞌwasabu.
Somo-Somo Isalaela lisidi yai ya Tubu, Giligala yai
Diyesuwa 5:2-12
2 Fuyanna yai, Yaubada ya libalau Diyesuwa lebena, iyen,
Emi wauꞌoya au oipididi, be Isalaela tataudi mwagisadi dududi ꞌwapidi au ibo fahidi.* Beyabeyana, wauꞌoya o nabuꞌa ya fafuyo edi nigo. Umeꞌehu hesa yai sa oipididi. Ibo-fahi aniyona doha ite: fuya ouꞌouli wawaya tatau afaꞌafa mwagisadi matadi ꞌwapidi sa ibo-fahidi. Laugagayo te ya famala edi fagabi o fatabu. Yesu ena fuya yai hinaga doha. (Luka 2:21)
3 Yo fede, sidohana Yaubada ya fatalaha, ya ginauli watan, be Isalaela tataudi mwagisadi dududi ꞌwapidi sa ibofahidi. Tuꞌana ni hesana sa tole, “Mwagisa Dududi ꞌWapidi Aba Ibofahidi.”
4-6 Fuyanna Isalaela Idipi sa lau afulen, tatau mahudoꞌidi mwagisadi dududi ꞌwapidi haꞌa sa ibodi. In moho, fuyanna nuꞌu pitapitalina yai sa laulau, boliman 40 ganahewana yai, nanatudi mwagisadi ꞌwapidi hola hige ti ibofahidi, yo hinaga saluma hiyala tataudi Idipi sa lau afulen, paꞌana Yaubada ena liba hige ti lau watan, yo fede ya kaumananaedi, be nuꞌu pitapitalina yai haꞌa sa peꞌi, doha iyen,
Tabu au lau Nuꞌu Mahumahulana yai, haꞌa hiti bwaꞌibwaꞌidi lisidi yai E liba fasunumaꞌedi.† Sidohana sa uli TEV ganahewana ꞌe famuli watan “Nuꞌu Mahumahulana” o “promised land.”
7 Tatau wa, nanatudi hola hige mwagisadi dududi ꞌwapidi ti ibo papadi. Logedidi, iti Diyesuwa ena tau paisowa ya fatalahadi, be mahudoꞌidi mwagisadi dududi, ꞌwapidi sa tomofahidi. 8 Mulina yai, Nuꞌu mahudoꞌina sa miya edi palai yai, ya lau ee–, omatadi sa mwafo.
9 Na Yaubada ya libalau Diyesuwa lebena, iyen,
Beyabeyana afa wahamiu Idipi yai sa fakamkamnadi, be aho te emi taumayamaya E ibo afulen. (Auꞌaulaha 1:11; 5:4-20)
Itete sidohana nuꞌuna te hesana sa tole Giligala. ‡ Giligala, alinadi yai aniyona mate aba kamfahi.
10 Fuyanna Giligala yai sa miyamiya, Diyeliko Gonna yai, nawalahi lahaina 14 maimailafina yai, Bayawa Anꞌangogona sa ginauli.§ Bayawa anꞌangogo o pasowa, aniyona mate: fuyanna Anelu ya lau Idipi bena nanatudi tau-baguna ya lau-funuhidi, na Isalaela tataudi edi hafohafo tapi duhuduhudi yai yo lau-fabala yai, ꞌwasina sa fahoihoiyedi, be anelu wa ya bayawaidi. Hige gonowadi pasowa ti an, ena hige mwagisadi ti ibo-papadi. Auꞌaulaha 12:48 ami ita hinaga. Aho te, ema Kalenda yai, fuyanina mate doha Easter fuyanna yai. (Auꞌaulaha 12:13)
11 Bobonna, mate fuya bwaꞌibwaꞌina Kanana adi kalahe sa andi: fwalawa tumadi nefanefadi, yo fwalawa hige siusiuna, tegategadi. 12 Yo fede, fuyana Diyesuwa Isalaela ya lawedi Kanana yai mate, Kanana dodogadi adi gabu anꞌandi sa kalakalahe, na ma esega, mena ya beꞌutau, hige ti abi.
Sidohana Diyeliko sa Eli halaen
Diyesuwa 5:13–6:27
13 Diyesuwa ya sigilau Diyeliko sadaina yai, na matana ya lau hitin yo fede, taumoho hesa ya ita nuwanuwana yai, ya obiꞌobiyo, ma kepakepatana.
Diyesuwa ya hasai, ya fatiꞌo iyen,
Um hidamai, o ama waiyunu?
14 Alinana ya bui, iyen,
Higeꞌe. Yau mate Yaubada ena Hiyala Tau Lau kulukuluwena.
Na Diyesu wa ya hoba lidi, be ya faꞌatitiyen, na iyen,
Egu Baꞌisa, yau em tau paisowa. Somo wa fanuha, haba E ginauli.
15 Baꞌisa wa, iyen,
Ahem sumadi u abifahidi, paꞌana tanohi fafagabina yai wa obiꞌobiyo.
Yo fede, ena liba Diyesuwa ya lau watan.
*5:2 Beyabeyana, wauꞌoya o nabuꞌa ya fafuyo edi nigo. Umeꞌehu hesa yai sa oipididi. Ibo-fahi aniyona doha ite: fuya ouꞌouli wawaya tatau afaꞌafa mwagisadi matadi ꞌwapidi sa ibo-fahidi. Laugagayo te ya famala edi fagabi o fatabu. Yesu ena fuya yai hinaga doha.
†5:4-6 Sidohana sa uli TEV ganahewana ꞌe famuli watan “Nuꞌu Mahumahulana” o “promised land.”
‡5:9 Giligala, alinadi yai aniyona mate aba kamfahi.
§5:10 Bayawa anꞌangogo o pasowa, aniyona mate: fuyanna Anelu ya lau Idipi bena nanatudi tau-baguna ya lau-funuhidi, na Isalaela tataudi edi hafohafo tapi duhuduhudi yai yo lau-fabala yai, ꞌwasina sa fahoihoiyedi, be anelu wa ya bayawaidi. Hige gonowadi pasowa ti an, ena hige mwagisadi ti ibo-papadi. Auꞌaulaha 12:48 ami ita hinaga. Aho te, ema Kalenda yai, fuyanina mate doha Easter fuyanna yai.