1 Chiihphado hamang hà boh nane bajoboh cheb agao mua pha jia doh. Thiisa hàne hò-amuii, hanyie yi hasiang guii srane hanyie shii ne ai lai iliing shii habie um chiih-è ai khrug shii ne dadiangthek snanyi pha rago um ro. 2 Ai ne khthiie ani giak bsa sha ro, chiih-è ani giak pha riie nane diig jine aishii choh yi.

3  12:3: Dan 7:7 Gai agao mua pha cheb jia yi hamang è khia. Thiisa hàne boh ishaig hakhliingmuii miley khrugthek rog chiih-è sua iriangthek um chiih-è airo zab pha miley khrugthek shii rago um ro. 4  12:4: Dan 8:10 Airo inyui re-è uomrang pha dadiangthek re-è jiarang hamang re-è ri srane ithek shii buzam sohnyiak hà fen muii. Ai yi hò-amuii ibi shii riu srane, airo ani ji khthiie giak dang shii chie pha rek. 5  12:5: Aij 66:7; Chng 2:9 Chiihphado ai è khthiie dufuii giak, hanyie ne zab sohthek shii shiiebang rog shii khoh ruii phro. Jimagunde ani shii ne riao srane Hamangkhung-aphuii nane airo biang hà noh dun. 6 Hò-amuii ne Hamangkhung-aphuii è aishii saro phi pha ithua bali hà yodun, thiisa hà aishii ne itham jia è wieng nyi sariig inaithek gayiig rek ruii phro.

7  12:7: Dan 10:13,21; 12:1; Jud 9 Chiihphado hamangkhung hàne mak rey ro. Machael nane airo hamangkhliiethek ne hakhliingmuii shii mak rek hanyie de awairo hamangkhliiethek rog ithek shii iidoh mak rek; 8 jishii dragon shii yang srane, hakhliingmuii nane airo hamangkhliiethek shii ne hamangkhung hà arai yi ro. 9  12:9: Igo 3:1; Lug 10:18 Boh hakhliingmuii shii fen muii—Ji pha ihèg pham, Sakhathong rone ho, hanyie è zab pha sohjambling shii khinrin pha ji ro. Ai nane awairo zab hamangkhliiethek shii ne ai rog shii sohnyiak hà fen muii.

10  12:10: Job 1:9-11; Zekh 3:1 Chiihphado hamangkhung re-è gang goh yao pha gu è yoi, “Thuh shii Hamangkhung-aphuii ro giawo ne wuiithok sha ro! Thuh shii Hamangkhung-aphuii è awai blu re-è Saja rone doh yi ro! Thuh airo Masaiya re-è ne airo riichai doh yi ro! Chiih-è hanyie jia yi gethek ro Hamangkhung-aphuii ibi shii riu ne gethek ro migiphothek shii inai nane habiu nin pho shii ne hamangkhung re-è fuang hà fen muii ro. 11 Ithek ne shiishaiduii ro ifai nane ithek è nyie yao pha izai è aishii ne yang ge ro; chiih-è ithek ne chaithek de thoh yang ne nya iy pha saro muii. 12 Chiih-è ji è, hamangkhungthek nathek, chiih-è zab thiisa rai pha nathek ne lised bo! Jishii sohnyiak nane khamuii ne khama diig ro! Chiih-è sakhathong ne nathek hà wuiiramuii ro, chiih-è ai ne bajo lijieg rog shii ro, nyieliieshii ai ne thieg aishii ne ìujia ishak khe sha bie ro.”

13 Hakhliingmuii è aishii ne buzam sohnyiak hà fen pha ji than mage shii, ai è hanyie yi dufuii giak pha hò-amuii shii sow. 14  12:14: Dan 7:25; 12:7 Aishii ne hakhliingmuii è luagieng pha ji shii ragia rek yi pha khi hà uom itham è khuyo gayiig rek pha ithua hà khey yi pha boh biichiing jia ro iyig nyi phi. 15 Chiih-è chiihphado aishii shau yi pha hakhliingmuii è airo sem re-è hò-amuii ro iidoh shii khokhed mage. 16 Jishii sohnyiak è hò-amuii shii nong phi; ji è hakhliingmuii sem è khia pha kho shii ne min muii. 17 Hakhliingmuii yi hò-amuii rog shii lijieg srane airo gai riingthek zab hanyie yi Hamangkhung-aphuii ro muyung shii nuii pho nane Isu è dong yi pha izai shii migi rekpho shii suang mak rek pha wuii dun. 18 Chiih-è hakhliingmuii* 12:18: Chiih-è hakhliingmuii è riu; giak jigizey shii um Chiih-è gu riu, hìpha jigi jine nyie è gieng pha ji shii chodo bo. yi khamuiiring shii riu dun ro.