22
Phiyiy michie pha najang
(Lug 14:15-24)
1 Isu è dinne najangthek è branthek shii yao. 2 Hamangkhung pha Sajathua ne hì duiine ro: Luang jia shii, saja jia è awuii dufuii pha phiyiy michie saro phi. 3 Ai è awai khiaothek shii phiyiy hà wuii yi pha biwenthek ho pha thoh ge, jimagunde ithek ne awuii yang phi. 4 Ji-è, ai è gai khiaothek shii hì pha mua rog biwenthek hà thoh ge: Thuh shii gu michie ne ideb sha ro; Guro rawoithek nane igong um pha suwuiiduiithek ua jong muii ro, chiih-è zab ne ideb sha ro. Phiyiy pha michie shii wuii mage bo! 5 Jishii, ho pha biwenthek ne ji anuii pha awaithek pha chongjai hà wuii dun; jia yi awai raig hà wuii marui, gai jia è awai chongjai hà wuii marui, 6 giak è ai khiao shii zum srane zuang ne ua muii. 7 Jipha saja ne bajo lijieg dun, ji-è, ai ne awai siphahithek thoh ne hanyiethek è rek jipho shii ua ne ithek rajanthek de zab ziao muii. 8 Chiihphado, ai è awai khiaothek shii ho srane ithek shii yao, guro phiyiy michie ne ideb sha ro, jishii gu è ho pha bran ji shii phi mua sapho asi ro; 9 thuh shii boh lumuiithek hà wuii ne khama pha bran ithek è doh pha ji shii ho mage. 10 Ji-è, khiaothek è fuang wuii srane lumuiithek hà khama pha bran doh muii pha ji, wie awie miapho shii khrab ne, chiih-è, phiyiy hò shii bran è zab ley ched dun.
11 Saja ji è bucho wuii ne biwenthek ji shii riig ne, chiih-è ai ne bran jia ne phiyiy yungthek aguii pha doh ro. 12 Saja ji è sai, “Gu ijak wo! Na ne phiyiy yung aguii pha ichiih shii nyie rek ne wuii phlei?” Jishii bran ji è nyie de ayao phi. 13 22:13: Mth 8:12; 25:30; Lug 13:28 Chiihphado Saja ji è awai khiaothek shii yao, “Aishii ne lai nane wad joi mua bo, chiih-è fuang pha igiia hà fen muii bo. Thiisa hà ai ne choh ne shinyin khriieg ruii phro.”
14 Isu è yao ched, “Bajo shii ho, jimagunde gua pha ji ne ìujia bie ro.”
Mijinthek phi pha chiang è musai
(Mrg 12:13-17; Lug 20:20-26)
15 Pharisithek dun srane musaithek rog Isu shii phang pha phak rai. 16 Ji-è ithek è awaithek ro samoythek nane Herod ro branthek shii ai hà thoh ge. “Masdo,” ithek è yao, “Gathek ne thieg nane izai yao. Na ne Hamangkhung-aphuii ro yang pha izai ji yua phi, gai munow shii ne nyie de samadiig ro, nyieliieshii nane gaithek shii boh ìu ariig ro. 17 Gathek shii yao bo, chiihphado, nane nyie now ga? Roman saja shii mijin than pha ji ne gethek Iphey shii gidieg ba, asi ba?”
18 Isu, ithek ro awie pha muphak ji thieg, chiihphado ai yao, “Nathek lawasdai! Nathek gushii nyie um ne ibongbong phlei? 19 Mijin shii phi pha sikhi ji gushii riig yi bo!”
Ithek è sikhi ji aishii yi ne phi, 20 chiih-è ithek shii sai, “Hìthek ne hanyie mizia nane ibeng lei?”
21 Ithek è chang. “Bisiu ro.”
Ji-è Isu è ithek shii yao, “Wie, chiihphado, nyie Bisiu ro ji Bisiu shii phi mage bo, chiih-è nyie Hamangkhung-aphuii ro ji ne Hamangkhung-aphuii shii phi mage bo.”
22 Ithek ji yoi mage shii, ithek ne wiengphleg dun; chiih-è ithek aishii thoh marui ne dun dun.
Iy ne hòi din pha chiang è musai
(Mrg 12:18-27; Lug 20:27-40)
23 22:23: Blk 23:8Jipha ò inai shii giak Sadusithek Isu shii wuii ne iy pha bran ne ahòi din phrone yao. 24 22:24: Iphy 25:5“Masdo,” ithek è yao, “Moses è yao hò-aphuii hanyie è ani agiak pha iy dun arone, awai khuiino misiungmuii shii yiy chid srane ani giak pha ji ne iy dun pha hò-aphuii ro ani rey bo. 25 Thuh shii, khuiino miley ichiih shii rai. Abam ji è yiy srane ani oi pha iy dun, jiè misiungmuii jine ikhuii shii thoh marui. 26 Ji duiine din pha ikhuii shii de irey, chiih-è uom pha khuiino shii irey, chiih-è mileynoi pha khuiino shii de irey dun. 27 Idohhè shii zab irey dun. Jipha hò-amuii de iy dun. 28 Thuh shii, iy pha ji è chai hòi inai shii, ai ne hanyie yiy rey phlei? Ithek zab è aishii yiy.”
29 Isu è ithek shii chang, “Nathek ne khama adunmey pho ro nyieliieshii ithek ne jigigam nane Hamangkhung-aphuii ro blu athieg ara ro. 30 Chiih-è iy pha ji chai sieng mage shii, ithek ne hamangkhliiethek duiine chiih-è ayiy rai phro. 31 Thuh shii, iy pha ji chai sieng ruii pha chiang shii: Hamangkhung-aphuii è ithek shii nyie yao pha ji ne nathek atham riig bey? Ai è yao, 32 22:32: Mul 3:6‘Gu ne Abraham ro Hamangkhung-aphuii, Isakh ro Hamangkhung-aphuii, chiih-è Jakhob ro Hamangkhung-aphuii ro.’ Ai ne isieng Hamangkhung-aphuii ro, chiih-è iy pha Hamangkhung-aphuii ro asi ro.”
33 Iphiing è ji yoi mage shii, nathek ne ai muyua jishii wiengphleg dun.
Boh muyung
(Mrg 12:28-34; Lug 10:25-28)
34 Isu è Sadusithek shii aro yiedang pha rek muii rone pharisithek è yoi mage shii, nathek ò wuii, 35 22:35-40: Lug 10:25-28chiih-è nathek è jia, Iphey yua pha Masdo jia yi, musai rog aishii phang yi pha bidiang. 36 “Masdo,” Ai è sai, “Iphey shii zab è boh muyung nyie lei?”
37 22:37: Iphy 6:5Isu è chang, nawai Ithong Hamangkhung-aphuii shii nawai lubu è miie bo, nawairo zab ragung rog è miie bo, chiih-è nawairo zab khani rog è miie bo. 38 Jine zab è boh nane zab è mugak muyung ro. 39 22:39: Lew 19:18Din pha zab è boh muyung hì ro: Nawai shii miie pha duiine nawai hadung-haluii pho shii miie bo. 40 Moses ro Iphey nane chaigthek muyua jine hì pha muyung nyi è luthong phro.
Masaiya chiang musai
(Mrg 12:35-37; Lug 20:41-44)
41 Giak Pharisithek ò shii khrab mage shii, Isu è ithek shii sai, 42 “Masi chiang shii nathek nyie now lei? Ai ne hanyie ro riing lei?”
“Ai ne Dawid ro riing ro,” ithek è chang.
43 “Chiihphado, nyie,” Isu è sai, Dawid shii Ithong ho phane Dawid shii ragung è thoh ne bey? Dawid è yao,
44 22:44: Chng 110:1 Ithong è gu Ithong shii yao:
Gu è na shuangthek shii naro lai iliing hà aruii sapho shii ne
Ichiih gu phazoi shii dug bo.
45 “Chiihphado, Dawid è aishii ‘Ithong,’ rone ho arone, nyie khi-èrek Masaiya ne airo riing rey mua phlei?”
46 Hanyie jia è de Isu musai ji achang mua, chiih-è ji pha idoh è hanyie de aishii musaisai pha lubu boh arek mua.