KHORINTHEK
Shii Phaul Re-è Nyichiieng Pha Jigigam
Yaophi
Phaul ro din pha jigigam hì ne Khorinthek shii zey, ai nane Khorinth pha charch rog shii siangthang diig rey shii zey, charch pha giak branthek khagi rog shii Phaul suang shii bajo gang è jo, jishii ai è ò rek pha wie yang chiih-è ji rey mage shii, ò rai rone airo boh lubo doh yi.
Igobi pha ichua jigigam ne Phaul è awai ro Khorinth pha siangthang rog shii phak, charch hà mak nane makhak-riing rek pha ji yao pha chuh è chang, nyie rek ne chang pha ji shii yao, chiih-è airo bangchiie chang pha ji è nuii ne ò rai rone airo lubo doh yi. Chiihphado Judea hà rai pha chid pha Masipho shii yang ne nong phi pha ai è charch shii yao. Idohhè pha ithothek shii hanyie Khorinth pha giak branthek è awaithek ne izai guaphasamoythek rone yao chiih-è Phaul ne biidiie jia rone the shii, ji pha suang è Phaul è awai ro guaphasamoy shii ragia rek.
Iliing shii um pha ji
Yaophi (1:1-11)
Phaul nane Khorinth pha charch (1:12; 7:16)
Judea hà rai pha Masipho shii zid (8:1; 9:15)
Phaul ne awai ro guaphasamoy ro riichai shii ragia rek ne ruii. (10:1; 13:10)
Jongsha (13:11-13)
1
1 Phaul è, Masi Isu ro guaphasamoy Hamangkhung-aphuii è yang, chiih-è gethek ro khuiino Thimothi re-è,
Khorinth pha Hamangkhung-aphuii pha charch, chiih-è zab Akhaya pha Hamangkhung-aphuii pha branthek shii ro:
2 Gethek Aphuii Hamangkhung-aphuii chiih-è Ithong Isu Masi è nathek shii bushun nane liijiing phi.
Phaul è Hamangkhung-aphuii shii laso phi
3 Cho gethek de gethek ro Hamangkhung-aphuii shii chiih-è gethek ro Ithong Isu masi shii, chiih-è bushun pha Aphuii shii, hanyie è nong pha thog mua pha Hamangkhung-aphuii shii laso phi haro! 4 Ai è gethek ro zab pha diig shii nong phi, gethek Hamangkhung-aphuii è mua pha nong ji è gethek de gai ro zab pha diig shii nong mua phro. 5 Masi è bajo diigthek rek pha ji shii gethek è thang pha duiine, Masi chiang è gethek shii Hamangkhung-aphuii ro nong pha ji thang ro. 6 Gathek è diig mage arone, hì ne nathek shii nong pha nane giawo ro; gethek yi nong arone, chiihphado nathek shii nong mua ne gathek è zud mua pha ò diigthek shii chua phi ne jum è zud yi. 7 Ji-è gathek luthong pha ji ne nathek ne khuchung de asid phro; gathek ne thieg nathek è gathek miidiig jishii thang pha ji ne, jiè nathek de gathek è mua pha nong jishii de thang phro.
8 Ijakthek, Asia du-ùa shii gethek shii diig rey pha ji ne gathek ne now yi pha yang ro. Miihan yi bajo bo chiih-è bajo lei gethek lakhung shii thog ne, gethek ne sieng rai pha luthong pha ji shii de thoh muii. 9 Gethek lakhung shiine iy bsa hà phi muii pha than. Jishii hì è rey pha ji gethek shii gethek aluthong pha, jishii hanyie è iy bsa è hòi pha Hamangkhung-aphuii è rek bie. 10 Ai ne buiithek nane diig è iy pha ji shii de ai è gethek shii ragia rek, chiih-è ragia rek ruii chiih-è ai ne gethek shii dinne ragia rek ruii phrone ai lakhung shii luthong chid ne, 11 nathek è gathek shii nong phi pha gathek shii sia phi pha miyaosiu ro. Ji-è gathek shii sia pha bajo sia ji ne chang ruii phro, chiih-è Hamangkhung-aphuii ne gethek shii khirzey phi ruii phro, chiih-è bajo thek ne awaithek ro goh ne aishii ziak ruii ne aishii laso phi ruii phro.
Phaul ro phakthek lai
12 Ichiih pha sohjambling shii gethek ro siengthek ne chiih-è gathek ro nyie siangthang ne nathek rog shii um sbang pha ji ne, bran ro khani è asi pha ji shii Hamangkhung-aphuii ro liijiing pha blu è rone chiih-è Hamangkhung-aphuii è phi pha miang nane wie ji shii khoh rone gathek ne guithek è now pha ji shii yao srane wiangwe rek. 13-14 Gathek è nathek shii zey pha jine nathek nyatham ne nyagao pha ji ro. Jishii nathek thuh rang de gathek shii ichua ìujia ìd bie ara ro, gu nathek shii luthong nathek ne gathek shii zab ìd ruii phro, jiè Ithong Isu pha inai shii gathek è nathek shii wiangwe rek pha duiine, nathek de gathek shii wiangwe rek mua phro.
15 Hìthek zab thieg ne Gu ne igobi nathek shii wuii pha muphak rab, jiè nathek shii nyichiieng khirzey mua ruii phro. 16 Gu Mesidonia hà wuii ne chiih-è iidoh dun shii gu nathek shii de wuii phak phro, nyieliieshii gu Judea hà wuii shii nathek ro nong ne gu shii mua yi. 17 Hì pha muphak rek shii, gune hohiia rey bey? Gu ne gui muphakthek rab shii, gu ne gui shii phua pha muphak rab ne bey? Ishak ò shii “Oh, oh” chiih-è “Asi, asi,” rone saro ne rai pho duiine gui shii wie pha jithek rab ne bey? 18 Hamangkhung-aphuii izai yao pha duiine, gu è nathek shii sbang rek pha ji ne “Oh,” nane “Asi” ne asi ro; 19 Isu Masi, Hamangkhung-aphuii ro Dufuii, chiang shii Silas, Thimothi, chiih-è gu hì pha duchoi shii yua muii pha gathek de “Oh” nane “asi” rone asi ro. Ai ne Hamangkhung-aphuii ro “Oh” ro; 20 Chiih-è ai ne Hamangkhung-aphuii pha zab sbang ne “Oh” ro. Hì ne nyieliieshii Isu Masi chiang è gethek ro “Amen” yao pha ji ne Hamangkhung-aphuii pha biisiie yao. 21 Hì ne hanyie è gathek shii nathek rog shii ò rab pha Hamangkhung-aphuii awai ro, izai gethek ro chai ne Masi rog ò shii rek ne rai ne; hì ne Hamangkhung-aphuii awai ro hanyie è gethek yo rek ne, 22 hanyie è awai ro muspho pha nab ne gethek shii ruii phi ro, chiih-è ai ne gethek shii phi pha ne bajo um pha surua So Ragung ne gathek lubuthek shii phi ro.
23 Gui khagi duiine gune Hamangkhung-aphuii shii ho—Ai ne gu lubu shii thieg! Nathek shii ragia rek phi pha, gu Khorinth hà wuii pha aphak ro. 24 Gathek ne nathek è nyie migi rek pha ji shii bangchiie rek pha abidiang ro; gathek ne thieg nathek ne migi shii chuh è riu, ji phachiang shii nawaithek shii sang yi pha gathek ne nathek rog shii blia rek.