THIMOTHI
Shii Phaul Re-è Igobi Pha Jigigam
Yaophi
Thimothi ne, Asia Minor pha filiao masipho ro, airo amuii ne Jewish ro chiih-è airo aphuii ne Grekh ro. Ithong ro blia shii ai ne Phaul ro nongpho ro, Igobi pha Phaul ro jigi Thimothi shii zey pha ji ne miigak um miyao rog shii isiie rek ne zey.
Hì pha jigi shii igobi ne charch shii biidiie yua pho shii suang phriie ne zey ro. Hì pha muyua ne Jewthek nane Jewthek asi pho ro malaomajiao pha biidiiethek ji ro. Hì pha sohjambling ne awie rone migi rek, chiih-è ug pha khani ji ìd pha jia shii giawo mua bie, chiih-è chieniing pha ji thoh ne chiih-è ayiygey pha rek pho shii ne giawo muii ruii phro ne ji pha chiang shii yie srane biidiie muyua ji yua. Ji pha jigi shii de charch pha gayiig nane misiasia pha chiang shii yao ro, charch dumuiithek nane nongthek shii ziig pha ichua um chid phro ne dumdum shii yao muii ro. Idohhè shii, nyie khi-è-rek ne Isu Masi ro wie khiao rek chid chiih-è yoh-yoh ibrog migiphothek rog hà gajathek chiang shii Thimothi shii yua.
Iliing shii um pha ji
Yaophi (1:1-2)
Yao pha jithek shii charch nane ophisphothek now yi (1:3—3:16)
Hì pha blia chiang Thimothi shii yao (4:1—6:21)
1
1 Phaul re-è, Masi Isu ro guaphasamoy Hamangkhung-aphuii ro gethek shii ragia rek pha nane gethek ro luthong Masi Isu re-è ro,
2 1:2: Blk 16:1 Thimothi shii, migi pha guro zai dufuii: Aphuii Hamangkhung-aphuii nane Masi Isu gathek ro Ithong re-è na shii ne bushun, nane liijiing phi ro.
Biidiie yua pho shii phriie
3 Gu Mesidonia hà wuii shii gu è na shii khung ne yao pha ji duiine, gu ne na shii Iphisus hà rai bone yang muii ro. Giak bran è thiisa hàne biidiie pha muyuathek yua muii ro, chiih-è na ne ithek shii gak bo. 4 Ithek shii, jithek pha phaluiithek chiih-è blangthek ibengthek nyie ji ne khnaingthek rey khlei pha ji shii thoh yi pha yao bo; ithek ne Hamangkhung-aphuii ro phak nyie migi re-è thieg pha ji shii ne nyie blia oi ro. 5 Hì pha muyung chiang è igang lubu, sang munow, chiih-è isbang migi re-è khia pha miie shii dong khlei. 6 Giak bran ne ji re-è khid din chiih-è awie pha bi-ìe muphak pha lumuii hà san dun ro. 7 Ithek ne Hamangkhung-aphuii ro iphey pha masdothek rek yang, jishii ithek ne awaithek miyaogamthek shii agao ro chiih-è awaithek è nyie shii migi rog shii yao pha miyaothek chiang shii agao ro.
8 Gethek ne ìd Iphey shii wie re-è khoh arone Iphey ne wie ro. 9 Ji arone hì ne nowkhlei yi, iphey ji ne bran wie shii arab phi ro, jishii iphey chuipho shii nane suruii rek pho shii, chiih-è Hamangkhung-aphuii oi pho shii nane layogthek shii, chiih-è hanyie yi giang asi pho shii din ne ragung oi pho shii, chiih-è hanyie è awaithek aphuiithek amuiithek shii ua pho nane sgoh rek pho shii de, 10 chiih-è awie pha, chiih-è siulao rek pho, chiih-è zumphothek chiih-è biidiie yao chiih-è biidiie khagi rek chiih-è wie yua pha ji shii suang rek pho shii rab phi ro. 11 Ji pha muyua ne muawie shii doh muii ro, Hamangkhung-aphuii ro biisiie pha Mua Wie nane khirzey Hamangkhung-aphuii re-è gu shii yao bone phi ro.
Hamangkhung-aphuii ro bushun shii chiong
12 Gu ne hanyie è gu blia shii chua phi pha gathek ro Ithong Masi Isu shii lasothek phi. Gu ne aishii laso phi nyieliieshii ai è gu shii airo blia rek mua sapho jo phi ne gu shii gua phi.
13 1:13: Blk 8:3; 9:4-5 Dohbi hàne gu è aishii awie pha yao ne diig phi ne makhak-riing. Jishii Hamangkhung-aphuii gu shii bushun rek phi nyieliieshii gu ne migi de oi ba chiih-è gu ne nyie rek pha ji ne gu ne athieg ba ro. 14 Chiih-è gethek Ithong ro bajo bushun gu lakhung shii phi chiih-è gethek ro Masi Isu rog shii ò rek pha ji re-è migi nane miie ne gethek shii chodang pha phi. 15 Hì ne zai yao, zab nuii ne migi rek chid phro: Masi Isu ne layogphothek shii ragia pha sohjambling shii wuii ro. Gu ithek è de buii ro, 16 jishii Masi Isu ro jum ne ley gu rog shii um rone Hamangkhung-aphuii ne gu shii bushun rek phi, layog è de bajo layog gui shii, doh hà hanyie re-è aishii migi rek ne chiih-è idang chai mua pho shii de miiriig rey dun phro. 17 Idang pha Saja, isieng nane adoh pha, Hamangkhung-aphuii bie, aishii ne idang pha idang ilab nane biisiie ro! Amen.
18 Thimothi, gu ani, nyie yi chaigthek re-è dohbi hà na chiang shii yaojong pha duiine hì pha muyung ne na shii phi phro. Ji pha miyaogamthek shii migiang duiine kho srane mak rek bo, 19 chiih-è nawai migi nane sang now pha ji shii ruii bo. Giak bran ne ithek ro now pha ji shii anuii chiih-è ithek ro migi shii mua maphi ro. 20 Ithek duchoi shii ne Hemenius nane Alezendar, hanyie shii gu è sakhathong pha blu shii phi srane lago phi; hì ne ithek ro makhak-riing pha ji shii gak yi pha yua ruii phro.