PHITHAR
Ro Igobi Pha Jigigam
Yaophi
Phithar ro igobi pha jigi è Masiphothek shii zey phi pha hanyie yi Asia hakhoi hanyie yi dayiingdayang rey pha, “Hamangkhung-aphuii è gua pha bran shii ho phro.” Hì pha jigi pha miyaosiu è ne thampho shii lububo rek phi ro. Nyieliieshii ithek ne diigkhui shii diig ne ithek ro migi shii diig rek ro. Zeypho è thamphothek shii Mua Wie Isu Masi chiang hanyie yi iy ne hòi ne wuii ruii phro ne ithek shii luthong pha sbang phi pha ji nowkhlei yi pha rek. Hìthek chiang è migipho ne diig shii choi rone zud chid, chiih-è hìne now chid jine awaithek ro migi khama zai chuh lei ne chai riig pha ji ro, chiih-è “Isu Masi khia ruii pha Inai shii” ithek ne lasen mua ruii phro ne now chid.
Diig pha ishak shii airo lububo rek phi pha ji ne, zeypho è de awairo thampho shii hanyie yi Masi ro branthek duii ne sieng bone khung phro.
Iliing shii um pha ji
Yaophi (1:1-2)
Hamangkhung aphuii ro giawo shii nowkhlei yi (1:3-12)
So sieng pha ji yua (1:13—2:10)
Diig pha ishak shii Masipho ro gaja (2:11—4:19)
Masipho jum nane blia (5:1-11)
Jongsha (5:12-14)
1
1 Isu Masi ro guaphasamoy Phithar re-è—Hamangkhung-aphuii è gua ne ruii pha bran hanyie yi dayiingdayang rek ne gai branthek duiine Phonthus, Galathia, Khaphadosia, Asia, chiih-è Bithynia rai pha zab shii. 2 Hamangkhung-aphuii pha Aphuii chiang è nathek shii ne gua ro. Ragung re-è nathek shii ne so branthek rab ro, nathek ne Isu Masi shii nuii chid, chiih-è airo ifai è nathek shii sud phi ro.
Bushun nane liijiing nathek shii ley um bo.
Isieng luthong
3 Cho Hamangkhung-aphuii nane gethek ro Ithong Isu Masi ro Aphuii shii laso phi bo. Nyieliieshii Isu Masi Iy ne hòi pha ji è airo boh bushun è gethek shii chai iwo rab phi phro. Ji re-è gethek ro isìeng luthong pha ji ley rek phi, 4 chiih-è gethek ne ibi riig srane Hamangkhung-aphuii è awai bran shii ruii phi pha bukho khirzey shii mua pha rek bo. Ai è ji pha khirzey ne nathek chiang shii hamangkhung hà ruii, jihà ne ashong, amua chiih-è asand pha jihà ruii phi. 5 Jithek ne nathek ro ro, nawaithek migi re è Hamangkhung-aphuii ro blu re-è iidohè hà khia pha giawo shii deb rek ne ruii pha ji shii nathek shii ragia rek ruii phi ro. 6 Hì pha chiang shii sang mage bo, nathek shii thuh ìujia ishak duhug rek pha miigak ro, nyieliieshii bajo ichuathek chuajan pha ji nathek è diig rek ro. 7 Ithek è rek noh jine nathek ro migi ne jichak rone khagi rek phi pha. Nyie nyamua mua pha san shii rangde bai shii chai; chiih-è nathek ro migi ne san è de igong bajo muna ro nyie shii ne chai chid phro, ji-è hìne zud mua, chiihphado nathek ne Isu Masi khia pha inai shii chiong nane biisiie chiih-è ilab mua ruii phro. 8 Nathek ne aishii adoh, jimagunde nathek ne aishii miie, nathek ne thuh adoh ba jimagunde nathek aishii migi rek. Ji-è nathek ne nyie miyaogamthek è ayao mua pha boh biisiiethek pha lubo shii nathek sang ro, 9 Nyieliieshii nathek ro nyie migi aishii um pha chiang è nawaithek ro luruakthek pha giawo mua ro, 10 Hì pha giawo chiang shii chaigthek bajo gayiig ne sow ne ìd, nyie Hamangkhung-aphuii è nathek shii phi pha lasen chiang shii ithek è chaig marui. 11 Ithek ne ji pha ishak ne khuchung chiih-è khi-èrek ne thog ruii pha bidiang ne sow marui.* 1:11: ishak thog magey shii chiih-è jine khi-è rek ne thog ruii; din bran hanyiega chiih-è ai wuii ruii shii. Hì pha ishak ne Masi ro Ragung ithek shii um pha ji è hìog ro, Masi ne biisiie shii luagieng pha chiang diig shii zud phro ne yao. 12 Hamangkhung-aphuii è ji pha chaigthek shii khia ne ithek blia ne awaithek shii phua pha arek ro, hamang è thoh pha Ragung So pha blu è Hamangkhung-aphuii ro Mua Wie ne muapho è yao pha jine thuh nathek è yoi pha chiang, ithek è yao marui pha manathek ne nathek ro ro. Hìthek pha manathek shii ne hamangkhliiethek rangde gao pha yang.
So sieng pha ho
13 Ji-è chiihphado, nathek khani ne blia rek pha saro bo. Isu Masi khia mage shii nathek shii phiramuii pha khirzey shii nowbthan ne nawaithek ro luthong shii zab khriig rek ne ruii bo. 14 Hamangkhung-aphuii shii nuii bo, chiih-è nathek sieng pha jine nathek è athieg ba shii chidthek shii um pha jihà arab yi rabo. 15 Ji phachiang shii, nathek shii ho pha Hamangkhung-aphuii ne so duiine, nathek è nyie rek pha jine so rek bo. 16 1:16: Lew 11:44,45; 19:2 Jigigam shii yao, “So rek bo nyieliieshii gune so ro.”
17 Nathek è Hamangkhung-aphuii shii sia mage shii, Nathek ne aishii Aphuii rone ho, hanyie è zab pha bran shii ne zab è nyie rek pha ji shii ò è chua; ji-è chiihphado, nathek ichiih sohnyiak shii sieng pha jine aishii ilab rek bo. 18 Nathek ro blangthek è nathek shii adunmey pha lumuii chai hà phi muii pha ji è ichad rek phijong rone nathek ne thieg; hìne muadun pha liiman nane san è asi ro. 19 Hì ne igong khlem hanyie ne shiishaiduii duiine ichiig oi pha Masi ji ro. 20 Aishii ne Hamangkhung-aphuii è sohjambling azen ba pha ibi gua chiih-è iidohè pha inai shii nathek chiang shii khia phi ro. 21 Ai chiang è nathek hamangkhung-aphuii shii migi rek, hanyie aishii iy pha ji è hòi yi ne aishii biisiie phi; chiih-è ji-è nathek ro migi nane luthong ne Hamangkhung-aphuii shii um ro.
22 Thuh shii nathek ro nuii pha zai è nathek ne nawaithek shii igang rek ne chiih-è gai migiphothek shii isiie è miie bo. Nawaithek lubu rog shii wiang ne nawaithek chung miie rai bo.† 1:22: zab nathek ro lubu re-è; giak jigi zey shii um lubu sang rog. 23 Hamangkhung-aphuii ro isieng nane idang pha miyaogam è nathek shii ne hanyie è iy pha ji è asi pha a-iy pha aphuii-amuii ani duiine chiih-è giak din phi phro. 24 1:24,25: Aij 40:6-8 (LXX) Jigigam shii yao,
“Zab pha bran ne saing duiine ro,
chiih-è zab ithek ro biisiie ne jabiing pha iibuathek duiine ro.
Saing ne gohdun, chiih-è iibuathek ne chiihdun,
25 Jishii Ithong miyaogam ne idang raidun.”
Hì pha miyao ne nathek shii yaojong pha Mua Wie ji ro.