1 Jesu kwian geru jwannga amage gdataboko giti gdaboke kadu mo lite ule ama ole, gire Jesu mo kiralla ketu ama ulitage dolla daga ngwale kagagda siere kwian jwligebanga dolla kotege kaire kira ketu kwian oga jingme daga ngwale ole dodagda. 2 Jesu mo kiralla ketu ene kwian geru jwanngage gire Jesu ama ulita kagu Chube gerua Jesu giti trage kwian ole, kaire Jesu kwian geru jwannga kagu kwian tanre oga dodade.

3 Kwian geru jwannga bebi joge Chube gerua dbe kwiange gire Jesu ama ulita ta gbu ama agedale giti ama joge chage geru dbe gire, Jesu gerudu ama ulita ole:

—Ba joge Chube gerua dbe gire ba me lle dbe mo alin, ba jogedale kole. Ba me glita chagegda dbe, ba me gde teru dbangwa dbe ni ba bligda dbe mo liullale jonkare ni ba igi dbe mo alin lle gigagda. Ba ñometra dbe modi alin, ba me ñometra na dbe mo ole llagli. 4 Una ulitage baini kaire ba joge chke ngwadi, ba u gbaitre alin gai toingwa, ba chege toi u e mauña ole gire ba Chube gerua dbe kwian una emuske. Ba joge dare una nage ba age ene una kaire kairege baini kare ba joge chke ngwadi. 5 Una ulitage baini kaire ba joge chke ngwadi, una e gwealege kwian me ba gai ngwange no, ba me tallade, ba jogedale siere una ege, ba me chege geru dbe kwian una emuske, ba joge siere una ege ba dbi mnuña skiennga mo serage kwian ene gwa giti, ene be suge kwian una emuge ama chege jiske tanre Chube gwa giti me ba gai ngwange no gdale Chube gerua giti.

6 Jesu gerudu ene kwian geru jwannga ulita ole gire kwian geru jwannga ulita jo una ulitage kaire kaire Chube gerua trage kwian ole kaire kwian tanre oga dodade.

7-8 E suiale kwian kada Herodes ama kwian nga Galileamu chugagwalla rey, Herodes ole kwian tanre geru tragu Jesu giti Jesu kle age giti ulita nga Galileage, e giti Herodes tañachugu tanre ni chku uñale amage kle boi mine. Kwian gweale gerudu Jesu giti Jesu amaña Juan-Bautista jogebada chkuni gwade. Kwian na gerudu Jesu giti Jesu amaña kwian Chube gerua ketanga unsuialin kada Elías chkuni. Kwian na gerudu Jesu giti Jesu amaña kwian gweale Chube gerua ketanga na nu jogebada unsuialin chkuni gwade. Kwian gerudu ene Herodes ole, Herodes me tachku gda uñale. 9 Herodes gerudu kwian ole:

—Cha agali kwian kagu Juan-Bautista chuga tkenga, ¿chema tra no kle chage nege, cha geru keruchuge tanre ama kle age giti?

Herodes gerudu ene gire ama mo ta gbu gwage mo gwagwa giti Jesudi blike.

10 Jesu nu kwian geru jwannga amage ulita kagaba chage una kaire kairege Chube gerua trage daba na ole, ama ulita chkuni Jesu kle ngwadige, ama geru tragu Jesu ole ama lle bo ulita giti. Bigire Jesu jo ama ulita ole sugekare kwian na ulitage jo nga gballage kodi una Betsaidage. 11 Kwian tanrege chku uñale Jesu jo nga gballage gire kwian e ulita jo Jesu nate, kwian jo chke Jesudi, Jesu kwian e ulita gau ngwange no, Jesu gerudu no trate kwian e ole Chube giti kaire Jesu kwian tanre oga dodadu.

12 Ngabi kodi nga jere ngnagu kwian geru jwannga ulita jo chke Jesudige gerudu Jesu ole:

—Nga ai che kle ngwadi nga gballa, nga aige bligda me kwian ulita ai alin gutadale, kaire u gbengwa me ama alin. Noare ba gbi kade bdagli kwian ulitage, ba ama ulita kage siere nga aige, ene ama ulita ñage joge nga gwealege o una gwealege bligda gige mo alin gutadale kaire u gbengwa jinade mo alin.

13 Jesu gerudu:

—Ba ulita agali bligda kete kwian ulitage gutadale.

Kwian geru jwannga gerudu Jesu ole:

—¿Che kwian ngle ulita ulle llemadi? Bligda me ngle che ole kwian tanre alin gutadale, che pan molen gdatigale alin ngwe gdabokle alin, bligda e me ñage kwiange ulita. ¿Ba takalin cha ulita joge bligda ngle ngle gige kwian ai ulita ullagda, ene che ñage bligda kete kwian ulitage gutadale?

14-15 Kwian geru jwannga Jesuge gerudu ene gire Jesu gerudu ama ulita ole:

—Ba kwian ngle ulita gbe toi dba kwian cincuenta mne kaire kaire.

Kwian geru jwannga kwian gbu toi dba ulita Jesu gerudu kare, kwian ene ulitaske kwian onbre ngle cinco mil kledu, kaire muinga ngle kirogwa ngle kledu ule kwian onbre ngle eske, agwa muinga, kirogwa me jo teanba. 16 Ama ulita toidu dba gire Jesu pan gdatiga ngwe gdaboke gau kote, Jesu gwagedu nga ngaña giti, Jesu gerudu Chube ole: “Cha Ñenua, noare ba pan ai ngwe ai ketu kwian ai ulita alin gutadale.” Jesu gerudu ene Chube ole gire Jesu pan skutunga ngwe uda junnga, Jesu ngwe uda pan bita ketu kwian geru jwanngage girabatadale kwian ngle ulita ole. Jesu bligda gbu jriennga kwian ngle ulita alin gutadale. 17 Kwian ngle ulita blidu no, kwian ulita unchku no bligdadi, gire bligda bita ngle cheguda, kwian geru jwannga Jesuge bligda bita e ulita litu ole ski kweri gbataboko giti gbaboke, ski e ulita chku ete bligda cheguda ole.

18 Chui gbaite Jesu jo sugekare kwian ngle ulitage gerule Chube ole, kwian geru jwannga alin allabi kledu ama ole gire Jesu geru kadu kwian geru jwannga ulitage:

—¿Kwian ulita kle gerule mine cha giti cha chema?

19 Kwian geru jwannga jaindunga:

—Kwian gweale kle gerule ba Juan-Bautista jogebakeda chkuni gwade, kwian na kle gerule ba kwian unsuialin kada Elías chkuni, kwian na kle gerule ba kwian Chube gerua ketanga dabage unsuialin gdaite chkuni gwade.

20 Kwian geru jwannga gerudu ene Jesu ole gire Jesu geru kadu dare ama ulitage:

—Kwian na kle gerule ene cha giti, ¿agwa ba gerule mine? ¿Cha chema?

Pedro jaindunga Jesu kalen:

—Ba Cristo, Chube ba kagu nga dba ai giti kwian kare kwian jwen siere ji chugege agedu me no gdale.

21 Pedro gerudu ene Jesu giti gire Jesu gerudu kwian geru jwannga amage gdataboko giti gdaboke ulita ole:

—Pedro gerudu trate, agwa ba me geru e cha giti trage ni kwian gdaite na ole —Jesu gerudu ene kwian geru jwannga amage ulita ole.

22 Jesu kwian geru jwannga amage ulita ta gbu Jesu be boi mine giti, Jesu gerudu:

—Chube cha kagu nga dba ai giti kwian kare, kwian tanre be age cha dollale cha gbe boi daga ngwale, kwian israelita chugagwalla juma ulita kaire kwian gerunga Chube ole daba alin chugagwalla ulita kaire kwian daba tkanga tangle Moisés chadalla giti ulita, kwian e ulita me cha gerua gai ulia, ama ulita be jainchke chadi cha gerua gdale be cha gbe boi daga ngwale, bdagli cha gwabeda agwa mongikege cha jaba be chkeni gwade.

23 Jesu gerudu ene mau giti gire gerudu dare:

—Kwian bai ta chagekalin ulia cha ole me tañachugadale dare mau giti alin allabi me agedale dare ama agali ta agekalin kare, chui gdale ama mo ta gbadale cha gerua gbe gdadi age cha takalin kare, kwian na ama gbe boi daga ngwale cha gerua gdale kaire kwian na ta ama gwakalinda cha gerua gdale, ama me mo talladale. Kwian bai mo ta gbe ene ñage chage cha ole. 24 Kwian bai tañachuge mau giti alin allabi toi no nga dba ai giti mo manade no me tañachuge age Chube takalin kare giti, bdagli kwian ene be jogenga sugekare Chubege be chege boi daga ngwale tanre diali chui tangle. Agwa kwian bai mo ta gbe chage cha ole mo chuge ngwadi boi daga ngwale nga dba ai giti cha gerua gdale, ama me mo tallade, ama tañachuge ma no age Chube takalin kare, bdagli kwian ene be toi no diali chui tangle nga ngaña giti cha ole cha Ñenua Chube ole. 25 Cha gerule ulia ba ole, ngwale kwian tañachuge tanre lle lite ole ngle giti ama kle toi nga dba ai giti gire. Kwian tañachuge lle lite ole alin allabi mau alin agwa ama me mo ta gbe ulia Chube ole, kwian e be jogenga ngwale, ama be chege sugekare Chubege diali chui tangle. 26 Cha gerule ba ole, Chube cha kagu nga dba ai giti kwian kare, chui bdaglige cha be chieni nakwaite cha Ñenua Chube kiralla giti, cha be chieni ule lle boanga Chube alin nga ngaña giti ngle ole, kwian ulita be gwage chadi cha noare cha kweri. Kwian nege tangle bai kaire cha gai ulia agwa ama ibule cha giti cha gerua giti, nga chie ibule amage gerule kwian na ole ama cha gai ulia giti, kwian bai ibule ene cha giti nege, kwian ene giti cha mi gerule no cha be chieni chuiage, chui ege cha mi gerule ama giti ama chanu. 27 Cha gerule ulia ba ulita ole, ba gweale kle aini cha ole cha keruchuge ba bebi jogeda gire ba gwa giti Chube be age no no cha ole ama kiralla giti, ba gwage chadi ene gire be suge trate bage cha noare cha kweri cha kwian ulita Chugagwalla —Jesu gerudu ene ulita.

28 Jesu gerudu ene ulita kwian ole, chui gbapa jo tangle gire Jesu jo jwichuga giti gerule Chube ole, Jesu kwian geru jwannga amage gdamaire alin allabi du ule, ama Pedro kaire Juan kaire Santiago du ule ama gatedi. 29 Jesu jo chke jwichuga giti, eni Jesu kle gerule Chube ole gire Jesu gwa jwlitedu Jesu ñometralla ulita jwlitedu kwian geru jwannga gdamai gwa giti, Jesu ñometralla chratigunga jutre jutre. 30-31 Kwian geru jwannga gdamai gwagedu Jesudi ene gire sugeti onbre nga ngaña giti boke chiu Chube kirallaske chku Jesu kle ngwadi, onbre edi tangle nga chratigunga, onbre e kada Moisés kaire Elías, ama boke chku geru trage Jesu ole Jesu be boi giti, ama gerudu Jesu ole:

—Ba be boi dagale tanre, ba gwabeda una Jerusalénge Chube gerudu unsuialin kare.

32 Kledu boi ene ulita gire Pedro kaire kwian geru jwannga na boke gbigachiu tanre, agwa ama jagedu gwade gwagedu nga chralladi nga chratigunga Jesu kle ngwadi kwian boke kle Jesu ole. 33 Moisés kaire Elías jo jogeni siere Jesuge gire Pedro gerudu Jesu ole:

—Cha tkanga tangle geruge, nga suga noare chadi che ulita chku aini. Cha be u soli gbe gbamai aini toingwa sugetidale, u gbaite ba alin, u gbaite Moisés alin, u gbaite Elías alin.

Pedro gerudu ene ngwale, Pedroge me uñale ama kle gerule llema giti. 34 Pedro kledu gerule ene u giti gire bogakwa chku amadi tangle kaire ama skatemanalla bokedi tangle, ama ulita chegu bogakwaske gire ama kwachiu tanre. 35 Gire bogakwaske Chube kerua sugedu ama ologe gerule: “Ai cha Kirolla, cha no no ama ole, ba ulita ama keruchugadale no, ba mo ta gbadale ama kerua gbe gdadi diali.” 36 Chube kerua sugedu ene bogakwaske gire Pedro kaire Juan kaire Santiago gwageduni Jesudi Jesu kle gballa. Ulita gwagedu Jesudi boi ene me su gerule kwian na ole gdaite Jesu boidu giti, ama chegu kamne, gerudu modi alin allabi gwagedudi giti.

37 Nagbietege Jesu ule kwian geru jwannga gdamai ole jo chkeni jwichuga gdoge dba, gire kwian geru jwannga Jesuge na ulita kaire kwian na tanre tendu Jesu ngwange jonke. 38 Gire kwian onbre gdaite kle kwian ngleaske ngautu Jesuge:

—Kwian tkanga tangle geruge, ba cha keruchuge, cha gerule ba ole cha takalin ba tai dage chage, cha kirolla gdaitre alin cháge ama oga, cha takalin ba ama dodade. 39 Dolla kle age me no cha kirolla ole diali, chui gwealege ama kle no, chui gwealege ama kle boi tirare dolla kote, dolla kle cha kirolla gbe ngaute kweri, kaire kle nga kagenga kirogwa giti, kle kirogwa gbe trateda dba tangle gire kirogwa jolo tanre mlienga kate dolla kote, dolla age tanre me no cha kirolla ole, dolla me ta kirogwa chugakalin ngwadi ngwedige. 40 Cha gerudu kwian geru jwannga bage ulita ole chudaboi kade amage dolla kage siere cha kirollage, agwa ama ulita me ñadu, malen cha chiu ba nate ba cha kirolla dodade.

41 Jesu kirogwa ñenua keruchugu gerule ene gire Jesu gerudu kwian ulita kle eni ole:

—Ba ulita me kle mo ta gbe cha gai ulia, ba ta me no. ¿Ngaminegire ba be mo ta gbe cha gai ulia, ene Chube ñage kira kete bage age ulita cha kle age kare? ¿Ngaminegire ba be kle kian gbe chage cha ba chudaboadale?

Jesu gerudu ene kwian ulita ole gire Jesu gerudu kirogwa ñenua ole:

—Kirogwa du chage aini.

42 Ñenua jo mo kirolla dbe Jesu ngnagu gire blike dolla kirogwa mliudba, dolla nga kagunga kirogwa giti, kirogwa tratuda dba tangle dolla kiralla kote, Jesu ka bo mno dolla ole:

—¡Joga siere kirogwage blike!

Jesu gerudu ene gire dolla jo siere kirogwage, sugeti kirogwa jo chkeni noni, Jesu kirogwa ketuni noni ñenuage manadale.

43 Kwian ulita gwagedu Jesudi dolla kage siere kirogwage kwian ta me jo sugano Jesu agedu Chube kiralla gitidi. Gire Jesu gerudu kwian geru jwannga gdataboko giti gdaboke ole:

44 —Ba ulita geru ai keruchuge ba gbe mo chugadi, ba me geru talla kagenga mo giti. Chube cha kagu nga dba ai giti kwian kare, kwian cha dollale be cha gai be age me no cha ole ama takalin kare.

45 Jesu gerudu ene kwian geru jwannga ole, agwa kwian geru jwanngage geru e me sugedu, Chube me ama ta gbu chke uñale malen ama tale ama kledu nga jereske kare, ama ulita ibudu geru kade Jesuge Jesu kle gerule llema giti.

46 Kwian geru jwannga Jesuge gdataboko giti gdaboke kledu mo ka dodadeda ongoru ongoru ama ulitage bai be chege ma kweri Chube gwa giti. 47 Chku uñale Jesuge kwian geru jwannga ulita kle tañachuge mine mo tale gire Jesu kirogwa soli gdaite kle eni gau gbu gdate mo ngena, 48 Jesu gerudu kwian geru jwannga ulita ole:

—Kwian bai kaire no cha ole ulia, kwian ene kle kirogwa ai kare gai ngwange no kle age no ama alin, kwian age ene me kle kirogwa alin allabi gai ngwange no, kaire ama kle cha gai ngwange no kle age no cha agali alin kare. Ene kaire kwian bai kaire cha gai ngwange no, kwian ene kle Chube cha kaganga nga dba ai giti gai ngwange no kaire. Kwian kle baske aini nga dba ai giti bai mo gbe soli daba na chudaboangale, kwian ene kweri Chube gwage —Jesu gerudu ene kwian geru jwannga amage ulita ole.

49 Gire Juan gerudu Jesu ole:

—Cha tkanga tangle geruge, cha ulita gwagedu kwian gdaitedi dolla kage siere kwian jwligebangage, kwian e gerudu ama kledu dolla kage siere dabage ba kiralla giti. Ama me kle chage che ole malen cha gerudu ama ole ama me ñage age ene dare.

50 Jesu gerudu Juan ole:

—Ba me gerule ama ole ama me ñage age ene dare, ba me ñage mo gbe ma kweri amage. Ulia kwian bai me kle age che dollale kwian ene kle age che bale kle che chudaboi, ba me ka boi ama ole —Jesu gerudu ene Juan ole.

51 Chui chege kodi Jesu ngeru Jesu be jogeni nga ngaña giti, gire Jesu mo ta gbu joge una Jerusalénge. 52 Jesu jo chage una Jerusalén ngnagu gire ama kwian gweale kagu mo ngeru u jinade nga Samariage, kwian e jo chke una gdaitege nga Samariage u jinade Jesu alin chegedaleda sugetidale. 53 Bigwa Jesu chku una ege, chku uñale kwian toinga una ege Jesu be joge una Jerusalénge malen ama me Jesu gau ngwange no me u ketu amage gbengwa, kwian toinga nga Samariage me no kwian una Jerusalénmu ole. 54 Kwian geru jwannga Jesuge boke kada Santiago kaire Juan gwagedu kwian nga Samariamu me Jesu gau ngwange no, Santiago kaire Juan gerudu Jesu ole:

—Cha Chugagwalla, ¿ba takalin cha jita nga ngaña giti kade kwian una aimu gugagda ulita?

55 Santiago kaire Juan gerudu ene Jesu ole kwian nga Samariamu giti gire Jesu gwagedu ama bokedi ka bo ama ole, Jesu gerudu:

—¿Ni uñale bage cha talla mine kwian ole? 56 Chube cha kagu nga dba ai giti kwian kare, cha me chiu kwian gwangaleda, cha chiu kwian jwanngale siere ji chugege age me no gdale.

Jesu ka bo ene Santiago kaire Juan ole gire Jesu jo ule ama ole una nage.

57 Jesu kle chage jonkare gire kwian gdaite gerudu Jesu ole:

—Kwian chugagwalla, cha ta mo ta gbakalin chage ba ole baini kaire ba be joge ngwadi, cha be chage ule ba ole geru jwen bage.

58 Jesu gerudu kwian e ole:

—¿Ulia ba be ñage mo ta gbe chage cha ole baini kaire cha be joge chage ngwadige? Bliski ugara molen gbengwa kaire bdada ugara molen gbengwa, agwa cha me dale. Chube nu cha kagaba nga dba ai giti kwian kare, cha me u molen agali toingwa kaire gbengwa.

59 Jesu gerudu ene gire chagedu dare, jonkare Jesu gerudu kwian na gdaite ole:

—Bai chage cha ole geru jwen chage.

Kwian e gerudu Jesu ole:

—Kwian chugagwalla, cha chagekalin ba ole geru jwen bage agwa nege nege cha me ñage, cha be manade, cha ñenua be jogeda cha be ama jaba tke dbige gire cha be ñage chage ba ole.

60 Jesu gerudu kwian e ole:

—Ba ta chagekalin cha ole me ñage manade, ba chie chage cha ole nege. Ba mo ta gbadale ulia chage cha ole cha gerua nate, ba bitalla ulita me Chube gerua gai ulia ba ama jige ba ñenua jaba tke dbige, agwa ba chiedale chage cha ole Chube gerua jwen Chube gerua dbe kwian ulitage, ba geru Chube giti tragadale kwian ole.

61 Jesu gerudu ene gire kwian na gdaite chku Jesudi gerule Jesu ole, ama gerudu:

—Kwian chugagwalla, cha ta chagekalin ba ole, agwa cha takalin ba cha chuge ngwadi ngeru basale bdagli cha bitalladi, gire cha be chage ba ole.

62 Jesu gerudu kwian e ole:

—Kwian joge deage nga bate, ama nga bate sidri alin allabi gire blike ama ta jogekalinni gudegu, kwian ene me mo ta gbu lle boi no ulia, kwian ene me ñage lle boi no. Ene kaire kwian ta chagekalin cha ole lle boakalin no cha alin me ñage mo ta gbe tañachuge ngeru lle na giti, kwian tañachuge lle na giti ngeru, kwian ene me ñage Chube gerua dbe trage kwian ole.