9
Ating Kepengdyarian neng Pegpiliꞌ et Empuꞌ
1 Maya ating pegsugiren ku in bekeꞌ pegsesewren i Kristo na keberbenaran. Na diki aku pengembut, bekeꞌ sewd gasi et Empung Nakem na maya kesenangen eset daken neng penedseled. 2 Kelaꞌ kerupukan ku bekeꞌ raas et pusuꞌ ku, sabab et kekempungan ku, na mengeꞌ keuned bekeꞌ keruguꞌ ku. 3 Sabab baꞌ mekedyari, aku sumpaen sampay meparak ki Kristo, alang-alang lang dut mengeꞌ ketipusdan ku bekeꞌ mengeꞌ kekempungan ku, ating mengeꞌ Israelita* 9:3 Israelita - Ibang ngaran et mengeꞌ tawʼt Judio.. 4 Dye na inampun et Empuꞌ bilang kenyeng yegang. Dut kedye pinebiriꞌ lebing ketaasan et Empuꞌ. Dut kedye gasi binggey ating mengeꞌ pinegmeupakatan bekeꞌ ating Keseraan. Dut kedye gasi binggey ating sugat naꞌ pegempuꞌ bekeꞌ ating mengeꞌ tangeꞌ. 5 Dut kedye mawaꞌ et mengeꞌ keupuꞌupuan na pegbetengan et Patriyarka, megdemikian gasi ating tutusan naꞌ minewanan i Kristo. Ating ketaas-taasang Empuꞌ na pegbentugen et kaya seskeran! Mepatut ne.
6 Diki lang tineglanduꞌ ating bebresen et Empuꞌ, sabab diki ginsan lulus na pengkatan et Israel† 9:6 Israel - Ibang ngaran et bangsa et mengeꞌ tawʼt Judio. in mengeꞌ Israelita banar. 7 Etawa sabab et pengkatan dye ne i Abraham lein lang ginsan dye in yegang ne i Abraham. Diki lang sabab sinugid dut Kesuratan et Empuꞌ, kwan,
“Sebarang mawaꞌ lang ki Isaak in, atin key mebilang na mengeꞌ yegang mu.”‡ 9:7 Tagnaꞌ 21:1.
8 Ibang retian, Diki lang ginsan ne yegang i Abraham in atin ne yegang et Empuꞌ, temed sebarang pinegyegang lang naꞌ kuyun dut tangeꞌ, atin key kilelanen na mengeꞌ tantung yegang i Abraham. 9 Sabab kwantin ating tangeꞌ ki Abraham, kwan,
“Peuliꞌ et Empuꞌ dut sugat na timpu samat kwantin negang timpu na si Sara megyegang et lelaki.”§ 9:9 Tagnaꞌ 18:10.
10 Diki lang et atin. Temed, sebarang yegang i Rebeka, sesembatu lang amaꞌ dye, ating keupuꞌupuan tyu tagnaꞌ neng si Isaak. 11-12 Segwaꞌ, sinugid et Empuꞌ misan mura ating kambar pinegyegang i Rebeka, etawa mura dye mekebuwat et menunga etawa meyaat, supaya megtiyag pegperuen pasal pegpiliꞌ et Empuꞌ asal ne lagi, sinugid ne lagi et Empuꞌ ki Rebeka, kwan ye, “Ating keukanan, atin sumukuꞌ dut kerinan?”* 9:11-12 Tagnaꞌ 25:23. Na banar ating pegpiliꞌ et Empuꞌ lein lang pasal eset keradya et taaw, temed pasal lang et Empuꞌ na meningkag kedye. 13 Samat nesurat gasi, kwan,
“Iningin ku si Jakob, segwaꞌ keinisgan ku si Esau.”
14 Enu tiban mebres tyu? Diki be metignaꞌ ukuman et Empuꞌ? Metignaꞌ selus ukuman ye! 15 Sabab sinugid et Empuꞌ ki Moises tagnaꞌ, kwan ye,
“Keingesian ku sebarang gay ku ingesian, bekeꞌ keseyangan ku sebarang geayen ku seyangan.”† 9:15 Exodo 33:19.
16 Angkansa diki lang sabab keinginan etawa pegtuyuꞌ et taaw, temed pasal et ingasiꞌ et Empuꞌ. 17 Sabab inantang dut Kesuratan et Empuꞌ na sinugid et Empuꞌ dut ki Paraon, Surutan et Egipto, kwan ye,
“Binwat ku ikew et Surutan supaya sabab mu mebunayag daken neng kepengdyarian bekeꞌ mepebunayag daken neng ingaran dut sengkelingkepaʼt lungsud.”‡ 9:17 Exodo 9:16.
18 Angkan iningesinan et Empuꞌ sebarang gay yeng ingesian, bekeꞌ pepeknel ye sebarang gaay yeng peknelan.
Kutuk bekeꞌ Ingasi et Empuꞌ
19 Maya meraliꞌ sembatu dimyu na megsugid daken, “Manu pegsusunen kityu et Empuꞌ? Sinu takuꞌ mekelaang dut kegeayan ye?” 20 Segwaꞌ sinu ke na menglaang dut Empuꞌ? Ating pinendyari be mekepegsugid dut negpendyari kenye na, kwan ye, “Manu mu binwatan aku et kwantin?”§ 9:20 Isaias 29:16; 45:9. 21 Diki be ating mememuwat et kuren maya pengdyarian supaya memuwat et mekeldam neng kuren tihad dut seng dekuten, sengmenu apang usalen dut piliꞌ neng pegpenyapan, iba in dut daran neng pegusalan?
22 Ating Empuꞌ, ganang maya kepengdeyan supaya ipebiriꞌ ye kenyeng kutuk bekeꞌ ipesewd kenyeng basag, samat pelan lulus na pegsendalan ye sebarang mengeꞌ taaw na meteup ne teyen na dusaen bekeꞌ tepuen. 23 Angkan binwat ye itue supaya ipebiriꞌ ye na kaya kekurangan pasal kenyeng kelang ketaasan dut mengeꞌ taaw neng keingesian ye, na asal pinenyapan ye kwit tiꞌ supaya megdingan dye meterima dut ketaasan et Empuꞌ. 24 Kityu, na kenye gasing tiningkag, diki lang dut mengeꞌ tawʼt Judio lang, segwaꞌ sampay gasi dut mengeꞌ ginsaʼt tawʼt lein Judio. 25 Samat sinugid et Empuꞌ dut buuk i Oseas, kwan ye,
“Ating mengeꞌ taaw lein lang daken, pegbetnganan ku ‘taaw ku,’ bekeꞌ ating mengeꞌ taaw na ingga peꞌ pegmerganen, pegbetnganan ku ‘pegmerganen ku’ ”.* 9:25 Oseas 2:23.
26 Bekeꞌ, kwan ye,
“Peinebuen ku dut atin negang lelegdengan neng sinugiran kedye na, ‘Kemyu lein lang daken neng mengeꞌ taaw’. Dye in pegbetnganan na mengeꞌ ‘Keyegangan et Empuꞌ na biyag.’ ”† 9:26 Oseas 1:10.
27 Tagnaꞌ tiꞌ ipinebunayag gasi i Isaias pasal et mengeꞌ Israelita, kwan ye, “Misan kumeldam manggid-anggid samat keldameʼt erit et dagat, isek-isek mene netitinda kedye in mekebawiꞌ.‡ 9:27-28: Isaias 10:22-23. 28 Sabab mesigpit bekeꞌ metikas pengukum et Begerar dut sengkelingkepaʼt dunyaꞌ.” 29 Megdemikian samat sinugid i Isaias in, kwan ye,
“Baꞌ ating Begerar neng mekepengdyarian et ginsan usa-usa diki netinda et kityung turubuanan, kityu negmendyaring samat lungsud et Sodoma bekeꞌ samat lungsud et Gomora na bininasa et Empuꞌ.”§ 9:29 Isaias 1:9.
Si Jesus Ating Batu neng Kesinimbekuran dut Israel
30 Enu tiban mesugid tyu? Atiʼt mengeꞌ taaw lein Judio na diki gayen et ketignaan, segwaꞌ dye in neketerima et ketignaan dut Empuꞌ sabab et pengandel? 31 Segwaꞌ ating mengeꞌ tawʼt Judio gayen negmendyaring metignaꞌ sabab dut keendelen et mengeꞌ saraꞌ, diki dye keterima et ating ketignaan dut Empuꞌ?
32 Manu? Sabab gayen dye ne dye megmendyaring metignaꞌ sabab dut buwat, diki sabab dut pengandel. Antangan dye samat taaw neng nesimbakud dut batu neng kesisimbekuran. 33 Samat nesurat dut Kesuratan et Empuꞌ, kwaʼt Empuꞌ,
“Nengdatun ku dut lungsud et Sion* 9:33 Sion - ibang ngaran et bangsaʼt Israel, bekeꞌ et Jerusalem, ating kabisera neng lungsud et Israel. Isaias 8:14; 28:16. maya batu naꞌ kesisimbekuran, kelang batu naꞌ mekepeugbaꞌ kedye, segwaꞌ baꞌ sinu-sinu mengandel kenye diki lang meglelew.”
*9:3 9:3 Israelita - Ibang ngaran et mengeꞌ tawʼt Judio.
†9:6 9:6 Israel - Ibang ngaran et bangsa et mengeꞌ tawʼt Judio.
‡9:7 9:7 Tagnaꞌ 21:1.
§9:9 9:9 Tagnaꞌ 18:10.
*9:11-12 9:11-12 Tagnaꞌ 25:23.
†9:15 9:15 Exodo 33:19.
‡9:17 9:17 Exodo 9:16.
§9:20 9:20 Isaias 29:16; 45:9.
*9:25 9:25 Oseas 2:23.
†9:26 9:26 Oseas 1:10.
‡9:27 9:27-28: Isaias 10:22-23.
§9:29 9:29 Isaias 1:9.
*9:33 9:33 Sion - ibang ngaran et bangsaʼt Israel, bekeꞌ et Jerusalem, ating kabisera neng lungsud et Israel. Isaias 8:14; 28:16.