3
Si Jesus Lebing Metaas kasga ki Moises
1 Angkansa mengeꞌ tipused, mengeꞌ pasek metignaꞌ bekeꞌ maya bagiꞌ dut pegpiliꞌ et Empuꞌ, rendemaꞌ myu si Jesus neng Apostol* 3:1 Apostol - ingin bersen Bibilinan, etawa “Mengengabar et Empuꞌ”. Betsaen “apostol” eset Diksyunario. bekeꞌ Metaas neng Pariꞌ† 3:1 Metaas neng Pariꞌ - pengibuten et mengeꞌ pariꞌ et Empuꞌ dut egama neng mengeꞌ Judio. neng pegpebunayag tyu. 2 Si Jesus mebentel dut Empuꞌ neng negpesurung kenye samat ki Moises gasi na negmendyaring mebentel dut ginsaʼt mengeꞌ taaw et Empuꞌ sampay benwa ye. 3 Segwaꞌ si Jesus nebiriꞌ ne lebing metaas set ki Moises, samat mememaal et benwa lebing metaas dut atin naꞌ benwa. 4 Sabab pesi ginsaʼt benwa maya taaw negbaal, segwaꞌ Empuꞌ negpendyari et ginsaʼt indeginis. 5 Si Moises negmendyaring mebentel dut mengeꞌ taaw et Empuꞌ, bilang megsukuꞌ na negpesebanar et ginsaʼt indeginis dut leyd ne dumateng. 6 Segwaꞌ bilang Yegang et Empuꞌ, si Kristo‡ 3:6 Kristo - ingin bersen atin taaw piniliꞌ et Empuꞌ apang mengmilik dut ginsan neng ginsan. Dut bebresan et Hebreo, “Mesias”., na mebentel na pegmilik dut sengbinenwa et Empuꞌ. Na atin kityu kenyeng sengbinenwa, baꞌ tumeteg dut pegandel bekeꞌ dut mepangger neng pegarap tyu ki Jesus.
Pebtiꞌ Pasal Pegsagkaꞌ dut Kaya Pengandel
7 Angkansa sabab et pegsugiren et Empung Nakem, kwan ye,
“Tiban baꞌ mekingeg myu kenyeng pengluluwaan,
8 kasiꞌ myu pegpektulaꞌ dimyung pusuꞌ samat pegmuriseg mengeꞌ kegurang-gurangan myu dut eldew pegsulay dut kelnangan.
9 Na baꞌ embe mengeꞌ kegurang-gurangan myu pegsulayan dye aku angkan set seled epat naꞌ pulung teun nebiriꞌ dye baꞌ enu inluꞌ ku.§ 3:9 Mengeꞌ tuturan pasal et pegsulayan et mengeꞌ Judio Empuꞌ, dut Exodo 17:1-7; Bilang 14:1-13.
10 Angkansa kinutukan ku ating pinengkatan bekeꞌ sinugid ku, ‘Tatap dye megpesuwey, bekeꞌ kaya dye ne mekesewran pasal daken neng dalan.’
11 Angkansa sabab et iseg ku sinuknaan ku dye, ‘Na misan ingyan diki dye ne kesled dut kepeternan ku neng tinangeꞌ na ibgey kedye.’ ”* 3:11a Kanta 95:7-11; Bilang 14:21-23.
12 Mengeꞌ ketipusdan, ingtiꞌ myu na endey megkesalaꞌ sinu-sinu dimyu bekeꞌ meugaran et pengandel seked metelikuran ye ating Empuꞌ naꞌ biyag. 13 Segwaꞌ megperendeman kew eldew-peldew sasat maya nega timpu, supaya sinu-sinu diki merundingan bekeꞌ meuripen et keselaan. 14 Sabab ginsan tyu kebayaꞌ i Kristo, baꞌ daran tyu tumeteg dut pengandel tyu kenye seked kepuspusan et timpuꞌ. 15 Itue pesi pegsugiren et Kesuratan, kwan,
“Baꞌ myu endelen tiban beres et Empuꞌ, kasiꞌ myu pegpektulaꞌ dimyung ulu, samat pegsagkaꞌ keupuꞌupuan myu kwit tiꞌ dut Empuꞌ.”† 3:15 Kanta 95:7, 8. Pasal si Korah neng pegsagkaꞌ ki Moises tagnaꞌ tiꞌ.
16 Sinu takuꞌ ating suminagkaꞌ dut Empuꞌ misan ne nekingeg dye beres et Empuꞌ? Diki be ginsaʼt pineliwan i Moises mawaꞌ dut Egipto? 17 Bekeꞌ dut kinu niseg ating Empuꞌ set seled et epat ne pulung teun? Diki be takuꞌ dut mengeꞌ taaw sebarang negkesalaꞌ, indyariꞌ kedyeng bilug nemematey dut kelnangan in? 18 Bekeꞌ sinung pegtutudyuen et Empuꞌ et kenyeng suknaꞌ na diki dye mekesled bekeꞌ mekepetaren dut lungsud na ibgey et Empuꞌ kedye? Diki be takuꞌ atiʼt mengeꞌ meliu? Eꞌ be, dye in! 19 Angkan sewd tyu diki dye nekesled dut lugtaꞌ na meketaren neng netangeꞌ sabab lang et kaya pengandel dye dut Empuꞌ.
*3:1 3:1 Apostol - ingin bersen Bibilinan, etawa “Mengengabar et Empuꞌ”. Betsaen “apostol” eset Diksyunario.
†3:1 3:1 Metaas neng Pariꞌ - pengibuten et mengeꞌ pariꞌ et Empuꞌ dut egama neng mengeꞌ Judio.
‡3:6 3:6 Kristo - ingin bersen atin taaw piniliꞌ et Empuꞌ apang mengmilik dut ginsan neng ginsan. Dut bebresan et Hebreo, “Mesias”.
§3:9 3:9 Mengeꞌ tuturan pasal et pegsulayan et mengeꞌ Judio Empuꞌ, dut Exodo 17:1-7; Bilang 14:1-13.
*3:11 3:11a Kanta 95:7-11; Bilang 14:21-23.
†3:15 3:15 Kanta 95:7, 8. Pasal si Korah neng pegsagkaꞌ ki Moises tagnaꞌ tiꞌ.