1 Segwaꞌ, ganang timpu nega et liyud, megpipikir daran Empuꞌ Elohim pasal kede Noe bekeꞌ ginsan neng mengeꞌ meklag bekeꞌ meguep neng ayup neng iba ye dut kelang kapal letew. Angkansa, pinedresan et Empuꞌ Elohim liyud apang mebas. 2 Netimbunan mengeꞌ buwal bekeꞌ diriguangan et langit, indyariꞌ timinngew ne delek mewanan dut langit. 3 Megati masi danum. Pegtalib et senggatus limampulung eldew nebas ne. 4 Angkansa, dinegsaꞌ kelang kapal letew dut mengeꞌ bukid et Ararat et ikepitung bulan bekeꞌ ikesempuluꞌ pitung eldew et pegliyud. 5 Pelahyun pegkisek et danum seked ikesempulung bulan. Megunang eldew et ikesempulung bulan timinbuꞌ ne erimpuru et mengeꞌ ibang bukid.

6 Pegtalib et epat neng pulung eldew tinukasan i Noe sembatung lelengewan et kelang kapal letew. 7 Nepelpad ya et sembatung uwak. Pepeꞌpeuliꞌ lang seked netian lugtaꞌ. 8 Sunud pinelpad ye gasi kelepatiꞌ apang birinen ye baꞌ metuug ne banar lugtaꞌ. 9 Segwaꞌ, kaya nekeugpaꞌ kelepatiꞌ sabab tegedanum nega. Angkansa, pegpeuliꞌ dut kelang kapal letew inalew i Noe bekeꞌ pinesled peuliꞌ. 10 Pegtalib et ikepitung eldew pinelpad ye peuliꞌ kelepatiꞌ. 11 Pegmapun, negpeuliꞌ kenye kelepatiꞌ megtetangag et biyag neng deun et olibo. Angkansa, neretian i Noe na metuug ne lugtaꞌ. 12 Timinagey nega ya et ikepitu negang eldew apang ipelpad ye peuliꞌ kelepatiꞌ. Pegpelpad ye, kaya ne nuliꞌ kenye kelpatiꞌ.

13 Enem neng gatus seng teun ne umur i Noe. Pegtalib et unang eldew et megunang bulan et ating teun, timinuug ne danum et dunyaꞌ. Inukaben i Noe lelengewan et kelang kapal letew. Nemegmayag ya bekeꞌ nebiriꞌ ye metuug ne lugtaꞌ. 14 Ikeruwang puluꞌ pitung eldew et ikeruwang bulan et ating teun, timinuug ne sengkedunyaan. 15 Sinugid et Empuꞌ Elohim ki Noe, kwan, 16 “Liwan kew ne et kelang kapal letew iba mu esawa mu bekeꞌ keyegangan mung kelelekian sampay kesewanan dye. 17 Peliwanaꞌ ne gasi ginsan neng mengeꞌ ayup sampay mengeꞌ begit apang megbeꞌbayaꞌ dye bekeꞌ kumeldam dye atuʼt dunyaꞌ.” 18 Angkansa, nemengliwan de Noe, mengeꞌ yegang ye bekeꞌ esawa ye sampay mengeꞌ esawa et mengeꞌ yegang ye. 19 Nemengliwan gasi mengeꞌ ginsan ginisan et mengeꞌ ayup neng meklag bekeꞌ meguep bekeꞌ meglempey sampay mengeꞌ kebegitan.

20 Pegliwan dye ginsan, nemaal si Noe et sisimeyaan ki Yahweh. Nisiꞌ si Noe et tegsembatu-sembatung ginisan et mengeꞌ ayup bekeꞌ begit neng kaya meridiꞌ, gay bersen, mengeꞌ ayup neng mekedyaring simayaꞌ dut Empuꞌ. Tinutung ye dut sisimeyaan bilang begey ki Yahweh. 21 Ganang nebu ne i Yahweh menungang ebu teyeg dut begey, kwan ye dut pengrendem ye, “Diki ku ne peuliꞌ terwanan lugtaꞌ sabab et pegkeredyanen et taaw. Sabab, meyaat pikiran ye mawaꞌ negaʼt sengkeyegang kenye. Diki ku ne gasi binesanen mayang indeginis neng megbibiyag samat kineradya ku tiban. 22 Sasaʼt maya nega dunyaꞌ, ingga tumngew pemumuaan bekeꞌ pengengeygan etawa pengreremigan bekeꞌ pemumulagan. Minit bekeꞌ dumlek nega sampay gasi meldew bekeꞌ gumbi nega daran.”