1 Itue listaan et mengeꞌ ingaran et mengeꞌ keupuꞌupuan i Adan. Ganang neguna ne et Empuꞌ Elohim mengeꞌ taaw, ginuna ye dye et samat dagbes ye neng Empuꞌ. 2 Ginuna ye dye na lelaki bekeꞌ libun, pegketbes, ininunga ye dye sampay ngineranan yeʼt ketaawan. 3 Senggatus telumpulung teun ne umur i Adan ganang pinengyegang kenye sembatung yegang neng lelaki na siminunsun et rurupanan et amaꞌ ye. Set ngineranan kenye i Adan. 4 Walung gatus neng teun nega dinugang et umur i Adan teyeg et kepenggenakan i Set. Seled et itueng timpu nekeyegang dye negaʼt kelelekian bekeꞌ kelilibunan. 5 Siyam neng gatus telumpulung teun sinkeran et umur i Adan, indyari natey ye.

6 Senggatus limang teun umur i Set ganang pinengyegang si Enos. 7 Walung gatus pitung teun nega dinugang et umur i Set teyeg et kepenggenakan i Enos. Pinengyegang kedye gasi mengeꞌ kelelekian bekeꞌ kelilibunan. 8 Siyam neng gatus sempuluꞌ duwang teun sinkeran et umur i Set, indyariꞌ natey ye.

9 Siyam neng pulung teun umur i Enos ganang pinengyegang si Kenan. 10 Walung gatus sempuluꞌ limang teun sinkeran et umur i Enos teyeg et kepenggenakan i Kenan. Pinengyegang kenye gasi mengeꞌ kelelekian bekeꞌ kelilibunan. 11 Siyam neng gatus limang teun sinkeran et umur i Enos, ganang natey ye.

12 Pitumpulung teun umur i Kenan ganang pinengyegang si Mahalalel. 13 Walung gatus epat neng pulung teun nega dinugang et umur i Enos teyeg et kepenggenakan i Mahalalel. Pinengyegang kenye gasi ibang kelelekian bekeꞌ kelilibunan. 14 Siyam neng gatus sempulung teun sinkeran et umur i Kenan, indyari natey ye.

15 Enem neng puluꞌ limang teun umur i Mahalalel ganang pinengyegang si Jared kenye. 16 Walung gatus telumpulung teun nega dinugang et umur i Mahalalel teyeg et kepenggenakan i Jared. Pinengyegang gasi ibang mengeꞌ kelelekian bekeꞌ mengeꞌ kelilibunan. 17 Walung gatus siyam neng puluꞌ limang teun sinkeran et umur i Mahalalel, ganang natey ye.

18 Ganang senggatus enem neng puluꞌ duwang teun si Jared, pinenganak ne yegang neng lelaki na si Enok. 19 Walung gatus neng teun nega dinugang et umur i Jared teyeg et kepenggenakan i Enok. Pinengyegang kenye gasi mengeꞌ kelelekian bekeꞌ kelilibunan. 20 Siyam neng gatus enem neng puluꞌ duwang teun sinkeran et umur i Jared ganang natey ye.

21 Enem neng puluꞌ limang teun umur i Enok ganang pinengyegang si Metusela kenye. 22 Mura kepenggenakan i Metusela ki Enok seked telung gatus neng teun pinenep ye Empuꞌ Elohim. Ganang atin neng timpuꞌ pinengyegang nega kenye mengeꞌ kelelekian bekeꞌ mengeꞌ kelilibunan. 23 Telung gatus enem neng puluꞌ limang teun umur i Enok. 24 Diminaran pegpenep i Enok dut Empuꞌ Elohim seked megtuy lang ya netinep sabab insiꞌ ya et Empuꞌ Elohim.

25 Senggatus walumpuluꞌ pitung teun umur i Metusela ganang pinengyegang si Lamek kenye. 26 Pitung gatus walumpuluꞌ duwang teun nega dinugang et umur i Metusela teyeg et kepenggenakan i Lamek. Pinengyegang kenye gasi mengeꞌ ibang kelelekian bekeꞌ kelilibunan. 27 Siyam neng gatus enem neng puluꞌ siyam neng teun sinkeran et umur i Metusela, indyari natey ye.

28 Senggatus walumpuluꞌ duwang teun umur i Lamek ganang pinengyegang kenye lelaki neng ukaꞌ. 29 Ngineranan yeʼt Noe. Kwan i Lamek, “Ya mibit kityu dut kepeternan et keliyutan et keradya tyu bekeꞌ et keradya et keremut tyu sabab tinerwanan i Yahweh lugtaꞌ.” 30 Limang gatus siyam neng puluꞌ limang teun nega dugang et umur i Lamek teyeg et kepenggenakan i Noe. Pinengyegang gasi ki Lamek ibang mengeꞌ kelelekian bekeꞌ mengeꞌ kelilibunan. 31 Pitung gatus pitumpuluꞌ pitung teun sinkeran et umur i Lamek, indyariꞌ natey ye.

32 Limang gatus neng teun umur i Noe ganang pinengyegang kedye si Sem, si Ham, bekeꞌ si Japet.