1 Naꞌ, itueng seli gasi landuꞌ mependey et ginsan neng ayup neng ginuna i Yahweh Elohim neng Empuꞌ. Kwan et seli dut libun, “Banar takuꞌ sinugid et Empuꞌ Elohim kwan, ‘Kasiꞌ myu pegkanaꞌ misan enung buaꞌ et kayu dut luluwakan’?”

2 Sinambag et libun dut seli, “Mekekaan kay buaꞌ et mengeꞌ kayu dut luluwakan, 3 erapun atin lang et buaꞌ et kayu dut tengaꞌ et luluwakan diki kay mekekaan. Sabab binilin damen et Empuꞌ Elohim kwan, ‘Kasiꞌ myu pegkanaꞌ etawa pegkutewaꞌ buaꞌ et atin kayu, sabab matey kew baꞌ keredyanen myu atin.’ ”

4 Segwaꞌ, kwaʼt seli dut libun, “Diki lang. Diki kew matey. 5 Sinugid dimyu et Empuꞌ Elohim atin sabab nesewran ye baꞌ mengaan kew et ating buaꞌ, megkesewd kew ne ginsan, bekeꞌ sumaliꞌ kew ne kenye sabab meretian myu ne menunga bekeꞌ meyaat.”

6 Pegkaꞌ nebiriꞌ et libun menunga buaꞌ et ating kayu, sampay keireg-ireg dut pemiriꞌ ye bekeꞌ menunga kanen sampay megkesewd gasi taaw, angkansa, nupuꞌ ya et buaꞌ bekeꞌ kinaan ye. Binggeyan ye gasi ye sampay kiminaan ya gasi. 7 Ganang nekekaan dye ne, duwa dye nesewran dye meglelbas dye. Angkansa, nengisiꞌ dye et deun et igus. Pinegretreit dye bekeꞌ binaal dye et tapis.

8 Ganang mapunapun ne, nekingeg et lelaki kukulindeg i Yahweh Elohim neng Empuꞌ, megpepanew ya dut luluwakan. Pineteguan dye nega dut kekeyuan dut luluwakan apang diki dye mesusup i Yahweh Elohim neng Empuꞌ.

9 Segwaꞌ, tiningkag i Yahweh Elohim neng Empuꞌ ating lelaki, kwan ye, “Adan, embe ke?”

10 Kwaʼt lelaki, “Aniꞌ ku petetaguꞌ sabab nekingeg ku kukulindeg mu megpepanew dut luluwakan. Timinakut ku sabab meglelbas ku, angkansa, nepetaguꞌ ku.”

11 Kwan i Yahweh Elohim neng Empuꞌ, “Sinu negsugid dimu meglelbas ke? Nengaan ke takuꞌ et buaꞌ et kayu neng kaya pepekaan ku dimu?”

12 Kwaʼt lelaki, “Binggeyan aku et libun neng pineiba mu daken bekeꞌ kinaan ku.”

13 Sinugid i Yahweh Elohim neng Empuꞌ dut libun, kwan ye, “Manu binwat mu itue?”

Kwan gasi et libun, “Rinundingan aku et seli, angkansa, nengaan ku.”

14 Kwan i Yahweh Elohim neng Empuꞌ dut seli, “Sabab et kineradya mu itue, itue pengrega ku dimu. Terwanan ku ikew lebi nega et ginsan neng meklag bekeꞌ meguep neng ayup. Beteng mu ipanew mu, lugtaꞌ kanen mu kwit pebibiyag ke. 15 Ikew bekeꞌ libun megbanta. Tutusan mu bekeꞌ tutusan ye megbanta gasi. Runteken ye ulu mu, sampay tinduken mu gasi teneb ye.”

16 Kwan et Empuꞌ gasi dut libun, “Punsabab et nebaal mu, dugangan ku keliyutan mu eset pegbeteng mu sampay dut pegyegang mu. Gaayen mu nega esawa mu bekeꞌ ya memegbeg dimu.”

17 Kwan ye ki Adan, “Sabab et kiningeg mu esawa mu, kinaan mu buaꞌ et kayu neng kaya pepekaan ku dimu, terwanan ku lugtaꞌ sabab mu. Subaliꞌ megkeradya ke mura kekaan ke kwit pebibiyag ke. 18 Tumuhuꞌ suksukan dut lugtaꞌ. Luluwakan dut kebebengleyan kanen mu. 19 Pelinget ke mena muda ke kekaan et kekanen seked peuliꞌ ke eset lugtaꞌ sabab duntin minewanan mu. Sabab eset lugtaꞌ minewanan mu, eset lugtaꞌ ke gasi muliꞌ.”

20 Ngineranan i Adan esawa ye et si Eba, sabab induꞌ ya et ginsan neng pebibiyag. 21 Itueng megesawa binalan i Yahweh Elohim neng Empuꞌ et pekayan neng kulit bekeꞌ pinebadyuꞌ kedye.

22 Sinugid i Yahweh Elohim neng Empuꞌ, “Itueng lelaki saliꞌ tyu ne. Mekesewd et menunga bekeꞌ meyaat. Kaluꞌ tiban mengaan et buaꞌ et kayuʼt biyag bekeꞌ megbiyag et kaya keskeran.” 23 Angkansa, pineugad ya i Yahweh Elohim neng Empuꞌ dut Luluwakan et Eden apang umanen ye lugtaꞌ neng minewanan ye. 24 Pegpeugad i Yahweh Elohim neng Empuꞌ et lelaki, dinatun ye mengeꞌ dereakan neng kerubim dut tampar emihan et Eden sampay tukew neng megdedleg bekeꞌ pebengbelising dye et misan embe apang dyeganan dalan pesurung dut kayuʼt biyag.