EXODO
Kepurisnan et itueng Buuk neng Exodo
Ingin bersen “Exodo” na “Pegugad”. Nesurat itueng buuk et Exodo si Moises pasal et pegpeugad i Yahweh et mengeꞌ tawʼt Israel teyeg et bangsa et Egipto tagnaꞌ tiꞌ. Mengeꞌ uripen dye duntin et mengeꞌ tawʼt Egipto. Itueng kapitulo 20 maya ating Sempulung Ketehagan et Empuꞌ bekeꞌ ating Lelaging Pinegsulutan Kenye.
Ketulduan et itueng Buuk
Mengeꞌ Israelita Nepelayam teyeg Tawʼt Egipto 1:1—15:21
Pegpeliyut et mengeꞌ Tawʼt Egipto et mengeꞌ Israelita 1:1-22
Pegganak ki Moises bekeꞌ Kebiyagan Ye 2:1—4:31
Sinurungan i Moises bekeꞌ i Aaron dut Surutan et Egipto 5:1—11:10
Kenkaan et Neketalib 12:1-30
Pegugad mengeꞌ Israelita teyeg et Egipto 12:31—15:21
Panew Teyeg dut Meregang neng Dagat seked Bukid et Sinai 15:22—19:25
Sempulung Ketehagan et Empuꞌ 20:1-26
Ibang mengeꞌ Sara pasal et Pinegsulutan et Empuꞌ 21:1—24:18
Pengempuan neng Benwa 25:1—31:18
Ketulduan Pasal et Pengempuꞌ 32:1—40:38
20
Sempulung Ketehagan i Yahweh naꞌ Empuꞌ
1 Itue sinugid et Empuꞌ naꞌ beres ye, kwan ye, 2 “Aku si Yahweh naꞌ Empuꞌ myu naꞌ negpeliwan dimyu dut Egipto bekeꞌ nelayam dimyu dut pegkeuripen.
3 “Kasiꞌ myu pengempuen et ibang mengeꞌ empuꞌ selyu et daken.
4 “Kasiꞌ myu ne pemaal et empuꞌempuan etawa kepetusan et misan enung taaw dibuwat langit, etawa sanad atueʼt dunyaꞌ, etawa dut danum sanad et dunyaꞌ.
5 “Kasiꞌ myu pegselukuriꞌ etawa mengempuꞌ ating mengeꞌ empuꞌempuan, sabab Aku naꞌ si Yahweh neng Empuꞌ myu na meinimunen naꞌ Empuꞌ. Sabab dusaen Ku sebarang mendinan daken sampay mengeꞌ keyegangan dye seked iketlu sampay ikeepat naꞌ pengkatan. 6 Segwaꞌ, pegkesien ku et mepangger dut mengeꞌ ribu-ribung pengkatan naꞌ megkasi daken bekeꞌ mengeꞌ pegtumanen et tahag ku.
7 “Kasiꞌ myu pegusalen et meyaat ingaran ku naꞌ si Yahweh naꞌ Empuꞌ sabab dusaen et Empuꞌ sebarang pegusalen et meyaat et ingaran Ye.
8 “Rendemaꞌ myu ating Eldew et Kepeternan na daken, bekeꞌ ipeseririꞌ itue supaya pemengempuꞌ daken. 9 Seled enem naꞌ eldew mekekeradya kew apang tebsen pegbaalen myu. 10 Segwaꞌ, ating ikepitung eldew, atin Eldew et Kepeternan ipeseririꞌ ki Yahweh naꞌ Empuꞌ myu. Atin naꞌ eldew diki kew mekedyari megkeradya, misan mengeꞌ keyegangan myung kelelekian etawa kelilibunan. Kwantin gasi dut mengeꞌ uripen myung kelelekian etawa kelilibunan bekeꞌ mengeꞌ keayupan myu, sampay mengeꞌ tawʼt tumpang naꞌ meglelegdeng et seled lungsud myu. 11 Dut tagnaꞌ seled enem naꞌ eldew, Aku naꞌ si Yahweh, neguna et dunyaꞌ bekeꞌ langit, dagat sampay ginsan indeginis duntin. Segwaꞌ, ikepitung eldew pineternan Ku. Angkansa, ininunga Ku Eldew et Kepeternan. Pineseridiꞌ Ku et ibang mengeꞌ eldew.
12 “Esipaꞌ myu amaꞌ bekeꞌ induꞌ myu supaya kumebuwat umur myu atuʼt lugtaꞌ naꞌ pegibgey Ku dimyu.
13 “Kas kew pematey.
14 “Kas kew pegbeis.
15 “Kas kew penakew.
16 “Kasiꞌ myu pegtendesiꞌ sebayaꞌ myu baꞌ kaya banar.
17 “Kasiꞌ myu pegnepsuaꞌ benwa et sebayaꞌ myu. Kasiꞌ myu pegnepsuaꞌ esawa et sebayaꞌ myu etawa mengeꞌ uripen yeng libun lelaki, etawa sapiꞌ bekeꞌ asno, sampay enung pengartaꞌ ye.”
Metakut banar mengeꞌ Israelita
18 Nememigpig et takut mengeꞌ Israelita bekeꞌ nememayag dye lang et mereꞌrayuꞌ ganang nekingeg dye dedegurgur et duldug bekeꞌ beres et budyung neng tembuliꞌ, sampay nebiriꞌ dye kilat bekeꞌ tabuk dut bukid. 19 Angkansa, kwan et mengeꞌ taaw ki Moises, “Baꞌ ipesugid mu damen beres et Empuꞌ in kumingeg kay, segwaꞌ, endey meres damen Empuꞌ sabab kaluꞌ matey kay.”
20 Sinambag i Moises mengeꞌ taw, kwan ye, “Kas kew takut, sabab pegsulayan Ye lang kemyu apang daran esipen myu Empuꞌ bekeꞌ apang diki kew megsalaꞌ Kenye.” 21 Segwaꞌ, nemeneteg lang petitiyeg dut mereꞌrayuꞌ mengeꞌ Israelita. Si Moises lang nepekabiꞌ et Empuꞌ dut kunem neng melingeb na baꞌ embe ne Empuꞌ.
22 Dinaak i Yahweh naꞌ Empuꞌ si Moises na kwan, “Isugiraꞌ dut mengeꞌ Israelita, kwanaꞌ, ‘Nekingeg myu Akung si Yahweh neres dimyu teyeg dut dibuwat langit. 23 Kas kew pemaal et mengeꞌ empuꞌempuan misan et emas etawa bulawan. 24 Pemaal kew lang et bebgeyan naꞌ lugtaꞌ. Duntin tutungiꞌ myu et mengeꞌ bibili bekeꞌ kambing sampay sapiꞌ. Keredyanaꞌ myu gasi begey naꞌ kesenangan ki Yahweh. Dut lein-leing eensanan gasi neng ipebantug Ku ngaran Ku, sumurung Ku duntin apang inunganen Ku kemyu. 25 Baꞌ batu baalen myu et ating sisimayaan, kasi myu usalen batu na kineradya myu, sabab baꞌ paat myu gemitan myu, meririan myu atin na diki ne usalen Ku. 26 Baꞌ tumindal kew et sisimayaan, kas kew bayaꞌ et egdan, sabab taaw dut sirib kesilag dimyu.’ ” * 20:8 Eldew et Kepeternan - Dut Hebreo: “Sabbat”.