1 Leanoŋ Jeikobwaa borata Daina meroti, iinoŋ kambaŋ moŋnoŋ Keinan emba saraŋ iŋiimambaajoŋ keno. 2 Keno baloŋ iikawaa eja poŋa Hamor iinoŋ Hiwi kanagesowaa ejaga laligoro. Iwaa meria Sekem iinoŋ Daina iima iikanondeeŋ iimanaaŋnaaŋ moma horoŋ meŋ kileeŋ muro. 3 Sekemnoŋ wombota Jeikobwaa borata Dainawaajoŋ pororogoŋ somoŋgoŋ uukaleŋanoŋ jopagoŋ muŋ kele qaayanoŋ jeŋ tutugoŋ muŋ laligoro. 4 Tutugoŋ muŋ laligoŋ maŋa Hamor kokaeŋ ijoro: “Ama, gii saanoŋ emba saraŋ koi noo embanaga koloowaatiwaajoŋ qaa gawoŋ mewa.”

5 Kambaŋ kanoŋ Jeikobwaa meraaŋuruta yoŋonoŋ baloŋ korianoŋ kema miriwaa orourugia galeŋ koma oŋoma laligogi Sekemnoŋ Daina meŋ kileero maŋa Jeikobnoŋ borataa buzu qaa ii kaeŋ moro. Ii moroto, ii mesaŋgoŋ merauruta mirinoŋ koubutiwaajoŋ qaaya bogoro mamboma raro. 6 Mamboma raro Sekembaa maŋa Hamor iinoŋ qaa gawoŋ memambaajoŋ Jeikobwaanoŋ karo. 7 Kaŋ raro Jeikobwaa meraurutanoŋ baloŋ korianoŋga kougi. Kouma iikanondeeŋ iwoi asugirotiwaa sunduya ii kokaeŋ mogi: Sekemnoŋ Jeikobwaa borata meŋ kileero Israel kanatuuru batugianoŋ sili gamuyawo kolooro. Sili ii mende aaŋaa so kolooro. Ii moma uugianoŋ kobooro wosobiri moma goroŋooso aŋgi.

8 Goroŋooso mokoloogito, Hamornoŋ kokaeŋ iŋijoro: “Merana Sekembaa uuwombotaa naaŋa ii oŋoo naamboragiaajoŋ mokotaaŋ raja. Kawaajoŋ saanoŋ jeŋ tegogi Dainanoŋ iwaa embia koloonaga. 9 Saanoŋ nonowo naamboraurunana utequte ama aoniŋ kema karo laligowoŋa. Kaeŋ saanoŋ qenaqena kolooŋ laligowoŋa. 10 Kaeŋ ama saanoŋ nonoo batunananoŋ rama laligowu. Nono balonana koi ii mende aŋgoŋ komboŋato, oŋo saanoŋ iikanoŋ laŋ kema kaŋ aiŋgiaa so baloŋ kitia kitia buŋa qeŋ aoŋ mirigia meŋ nonowo aŋguneŋ-qaŋguneŋ ama laligowoŋa.”

11 Kaeŋ jero Sekemnoŋ Dainawaa maŋnaaŋuruta ii kokaeŋ iŋijoro: “Niinoŋ oŋoo jaanoŋ kiaŋkoomu mokoloomambaajoŋ moma qisiŋ oŋonjeŋ. Kawaajoŋ ii me woiwaa qisiŋ nombuti, nii saanoŋ ii oŋomaŋa. 12 Emba sewaŋa ano kaleŋ meŋ kaŋ oŋomaŋati, iikawaa jaŋgoya ii saanoŋ aiŋgiaa so meŋ ubu. Ii me woiwaa qisiŋ nombuyagati, niinoŋ ii saanoŋ oŋomaŋa. Qaana kota koi: Oŋonoŋ mono jeŋ tegoŋ naamboragia noŋgi noo embanaga koloowaa.”

13 Sekemnoŋ naaŋgia Daina meŋ kileerotiwaajoŋ ama Jeikobwaa merauruta yoŋonoŋ osoŋkakale qaganoŋ Sekem ano maŋa Hamor meleema oroma 14 qaa kokaeŋ jegi mori: “Eja mombaa selianoŋ Anutuwaa aiweseya mende kotogiti, nono naamboranana eja iikaaŋa saanoŋ mende muboŋa. Kaeŋ aniŋ gamugamu qanananoŋ ubabo. Kawaajoŋ nono ii mubombaajoŋ amamaajoŋ. 15 Oŋo sili motooŋgo kokaeŋ aŋgi nono uumotooŋgo amboŋa: Wala Anutuwaa aiweseya ii ejaurugia kuuya oŋoo selegianoŋ kotogi tegoro nono laligojoŋi kaaŋa koloowuti eeŋ, mono naamboranana saanoŋ oŋomboŋa. 16 Kaeŋ aŋgi saanoŋ oŋowo naamboraurunana utequte ama aoniŋ kema karo laligowoŋa. Kaeŋ saanoŋ oŋoo batugianoŋ rama kanageso tuuŋ motooŋgo kolooŋ laligowoŋa. 17 Kaeŋ laligowoŋato, Anutuwaa aiweseya selegianoŋ kotowombaajoŋ uumotooŋgo mende ambuti eeŋ, nono mono naamboranana wama moŋgeŋ kemboŋa.”

18 Qaa kaeŋ jegi Hamor ano meria Sekem yoronoŋ qaa kaaŋa kawaajoŋ mori sokono.

19 Kaeŋ mori eja gbaworo Sekemnoŋ maŋaa sumaŋuruta yoŋoo batugianoŋ tosaaŋa uŋuuguŋ qabuŋa somata meŋ laligoro. Iwaa uunaaŋanoŋ Jeikobwaa borataajoŋ mamaga erotiwaajoŋ ama qaa jegiti, ii otaamambaajoŋ isinabisina mende ama kambaŋ mende qeŋ koriro uro.

20 Kaeŋ kolooro Hamor ano meria Sekem yoronoŋ Sekem taombaa eja alauruta yoŋowo qaa jewombaajoŋ taombaa nagu kosianoŋ ajoajoroo sombeŋgianoŋ kema kokaeŋ jeri: 21 “Eja koi yoŋonoŋ ananawo ala awaa meŋ aoŋkeju. Kawaajoŋ anana saanoŋ jeŋ tegoniŋ yoŋonoŋ ananaa balonoŋ rama lansaŋ kema kaŋ mirigia meŋ ananawo aŋguneŋ-qaŋguneŋ ama laligowoŋa. Yoŋonoŋ baloŋ kitia mewuwaajoŋ titiŋa mamaga eja. Anana saanoŋ yoŋowo naamboraurunana utequte ama aoniŋ kema karo laligowoŋa. 22 Anana sili motooŋgo kokaeŋ aniŋ eja yoŋonoŋ ananawo laligowombaajoŋ uumotooŋgo ambu: Anutuwaa aiweseya ii eja iyoŋoo selegianoŋ kotogi eji, iikawaa so ii wala kuuya ananaa selenananoŋ kaaŋagadeeŋ kotoniŋ tegoro anana saanoŋ yoŋowo kanageso tuuŋ motooŋgo kolooŋ laligowoŋa.

23 “Kaeŋ aniŋ yoŋoonoŋ miriwaa oro tuuŋgia ano esuhina iwoigia kuuya ii mono ananaa buŋa koloowuya. Kawaajoŋ qaa ninijogiti, ii saanoŋ moma wambelaaniŋ yoŋonoŋ ananaa batunananoŋ rara dunduŋgia mokolooŋ laligowu.”

24 Kaeŋ iŋijori taombaa kiropo naguyanoŋ kaŋ ajoroogiti, iyoŋonoŋ kuuya Hamor ano meria Sekem yoroo qaawaajoŋ uumotooŋgo ama jegi Anutuwaa aiweseya ii Sekem taombaa eja kuuya yoŋoo selegianoŋ kotodaborogi.

25 Kotodaborogi weemboria 3:a kolooro kanoŋ wijigiaa siimboboloya ii kaaŋiadeeŋ toroqeŋ moma ragi Jeikobwaa merawoita woi Simeon ano Liwai, Dainawaa naaŋwoita yoronoŋ manjawaa soogara somata meŋ taoŋ iikanoŋ saŋgabaŋga kema toogia mende moma ragi alanzaŋ manja qeŋ eja kuuya japaleleŋ uŋuri komudaborogi. 26 Hamor ano meria Sekem ii kaaŋiadeeŋ manjawaa soo somatanoŋ ururi komuri. Komuri Sekembaa mirinoŋga naaŋgara Daina ii horoŋ kamaaŋ wama keni.

27 Kaeŋ ani Jeikobwaa meraurutanoŋ Sekemnoŋ naaŋgia meŋ kileeŋ murotiwaajoŋ ama taonoŋ sararagoŋ kema eja qamogia iŋiima taombaa esuhina iwoiya luluuma qeŋ yoŋgoro megi. 28 Lama, meme, bulmakao ano doŋgi tuuŋa tuuŋa ano ilawoilagia kuuya taoŋ uutanoŋ ano baloŋ korianoŋ egiti, ii kuuya kalugoŋ medaborogi. 29 Esuhina iwoigia kuuya korama emba meraboraurugia kuuya uŋuama mirigianoŋ iwoigia tosaaŋa eroti, ii kololooŋ luluuma qeŋ yoŋgoro meŋ togoŋ keŋgi.

30 Kaeŋ aŋgi Jeikobnoŋ Simeon ano Liwai kokaeŋ irijoro: “Oro kaeŋ ani kakasililiŋ somataa qaayanoŋ mono noo qananoŋ uro laligomaŋa. Baloŋ kokawaa toya Keinan kanageso ano Periz kanageso yoŋonoŋ mono kazi moma noma laligowu. Nii oŋoo kanatuuruna nono afaaŋanoŋ laligojoŋ. Kawaajoŋ yoŋonoŋ manjaqeqe ejaurugia kululuuŋ oŋoma qotogoŋ nonoma manja qeŋ nombuti eeŋ, yoŋonoŋ mono saanoŋ japaleleŋ nuŋ nii ano kanatuuruna tiwilaaŋ nonombuya.”

31 Jeikobnoŋ kaeŋ irijoroto, iyoronoŋ qaa kokaeŋ ijori: “Moŋnoŋ nonoo naaŋnana kana somata emba tani ama muroti, nono mono iikawaa iroŋa meleema oŋoniŋ sokonja.” Kiaŋ.