1 Wala eeŋanoŋ baloŋa baloŋa kuuya yoŋonoŋ qaa motooŋgo jegi iikanoŋ mindiriŋ oŋono laligogi. 2 Kaeŋ laligoŋ mesaoŋ weeŋ koukoutanoŋ baageŋ kema Babilon uutanoŋ baloŋ koria somata moŋ mokolooŋ kanoŋ mirigia meŋ ragi. 3 Kanoŋ rama iyaŋgiodeeŋ kokaeŋ amiŋ mogi: “Mono kawu. Anana mono gbakoŋ meŋ mozozoŋgoŋ gerenoŋ ooniŋ kotakota koloowaa.” Kaeŋ jeŋ miri sopaya mewombaajoŋ jamo kowonjiŋ qaagoto, birik ama batugianoŋ namo saposapo qandoŋ kaaŋa aŋgi iikanoŋ birik ii mokotaaŋ oŋono. 4 Gawoŋ kaeŋ meŋ toroqeŋ kokaeŋ jegi: “Mono kawu. Anana mono ananaajoŋ siti moŋ meŋ iikanoŋ miri koriga totooŋ (taua) meniŋ waareŋanoŋ sombiŋ oosiriwaa. Kaeŋ oosiriro mende deeŋqeema baloŋ kuuya sokoma laŋ kema laligowombotiwaajoŋ mono anana qabuŋananawo koloowoŋa.”

5 Kaeŋ jeŋ gawoŋ megito, Poŋnoŋ ejemba siti ano miri koriga megiti, ii iimambaajoŋ kamaaro. 6 Kamaaŋ ii iima kokaeŋ jero: “Yoŋonoŋ siiŋserereŋ qaagoto, kanatuuru areŋgia motooŋgo qaagia motooŋgo jeŋ nama iwoi koi kanaiŋ mejuti eeŋ, kanageŋ ii me woi mewombaa areŋgia ambuyati, ii mono iikawaajoŋ mende amamaaŋ osiwuya. 7 Ayo, anana mono balonoŋ kemeŋ qaagia meŋ sooniŋ tuuŋ moŋ yoŋonoŋ tuuŋ tosia yoŋoo qaagia mende moma asariŋ laligowu.”

8 Poŋnoŋ kaeŋ jeŋ ejemba kanoŋ mendeqendeema oŋono gomaŋ kuuya sokoma kema kaŋ siti memewaa gawoŋa somoŋgoŋ mesaogi. 9 Poŋnoŋ ejemba kuuya yoŋoo qaagia meŋ sooroti, iikawaajoŋ gomaŋ iikawaa qata Baabel (eŋkaloloŋ sisau) jegi. Iikanoŋa Poŋnoŋ ii mendeqendeema oŋono deema baloŋ kuuya sokoma keŋgi. Kiaŋ.

10 Seembaa gbiliuruta yoŋoo qa areŋgia koi. Gboulu gematanoŋ yambu woi tegoro Seemnoŋ yambuya 100 tegoro kambaŋ kanoŋ meria Arfaksad kolooro. 11 Arfaksadnoŋ kolooro kawaa gematanoŋ Seemnoŋ toroqeŋ yambu 500 laligoro kambaŋ batuya kanoŋ meraborauruta tosaaŋa koloogi.

12 Arfaksadnoŋ yambuya 35 tegoro meria Sela kolooro. 13 Selanoŋ kolooro kawaa gematanoŋ Arfaksadnoŋ toroqeŋ yambu 403 laligoro kambaŋ batuya kanoŋ meraborauruta tosaaŋa koloogi.

14 Selanoŋ yambuya 30 tegoro meria Eber kolooro. 15 Ebernoŋ kolooro kawaa gematanoŋ Selanoŋ toroqeŋ yambu 403 laligoro kambaŋ batuya kanoŋ meraborauruta tosaaŋa koloogi.

16 Ebernoŋ yambuya 34 tegoro meria Peleg kolooro. 17 Pelegnoŋ kolooro kawaa gematanoŋ Ebernoŋ toroqeŋ yambu 430 laligoro kambaŋ batuya kanoŋ meraborauruta tosaaŋa koloogi.

18 Pelegnoŋ yambuya 30 tegoro meria Reu kolooro. 19 Reunoŋ kolooro kawaa gematanoŋ Pelegnoŋ toroqeŋ yambu 209 laligoro kambaŋ batuya kanoŋ meraborauruta tosaaŋa koloogi.

20 Reunoŋ yambuya 32 kolooro meria Serug kolooro. 21 Serugnoŋ kolooro kawaa gematanoŋ Reunoŋ toroqeŋ yambu 207 laligoro kambaŋ batuya kanoŋ meraborauruta tosaaŋa koloogi.

22 Serugnoŋ yambuya 30 tegoro meria Naahor kolooro. 23 Naahornoŋ kolooro kawaa gematanoŋ Serugnoŋ toroqeŋ yambu 200 laligoro kambaŋ batuya kanoŋ meraborauruta tosaaŋa koloogi.

24 Naahornoŋ yambuya 29 kolooro meria Tera kolooro. 25 Teranoŋ kolooro kawaa gematanoŋ Naahornoŋ toroqeŋ yambu 119 laligoro kambaŋ batuya kanoŋ meraborauruta tosaaŋa koloogi. 26 Teranoŋ yambuya 70 tegoro meria Abram, Naahor ano Haran koloogi.

27 Terawaa gbiliuruta yoŋoo qa areŋgia koi. Terawaa merauruta Abram, Naahor ano Haran koloogi. Harambaa meria Loot kolooro. 28 Haranoŋ Kaldia yoŋoo balonoŋ laligoŋ iyaŋaa kolokoloo gomaŋa qata Uur iikanoŋ komuro Harambaa maŋa Teranoŋ toroqeŋ laligoro.

29 Abram ano Naahor yoronoŋ ororoŋ emba meri. Abrambaa embia qata Saarai kolooro Naahorwaa embia qata Milka. Milkanoŋ Harambaa borataga kolooro. Haranoŋ Milka ano Iska yoroo maŋgaraga. 30 Saarainoŋ emba aruŋaga meria qaa eeŋ laligoro.

31 Teranoŋ meria Abram, esia Loot Harambaa meria ano eŋaroya Saarai, meria Abrambaa embia ii uŋuano motooŋ Kaldia balombaa gomaŋ qata Uur mesaoŋ Keinan balonoŋ kembombaajoŋ keŋgi. Kaeŋ keŋgito, Haran gomaŋ balonoŋ kaŋ nama kanoŋ mirigia meŋ ragi. 32 Ragi Teranoŋ yambuya 205 kolooro Haran gomaŋ kanoŋ rama komuro. Kiaŋ.