15
S'uwori fayuwotsi detsdek'ts melakiwotsi
1 K'osho eenonat adits milikito darotse t bek'i, Ik'i fayo boats b́ wotit s'uwaatsik wotts shawat fayuwotsi detsdek'ts shawat melakiwotsi tbek'i.
2 Maniyere il tawo biitse eeh wutsts mastayti k'arok'o artso tbek'i, mank'o s'ootsonat s'ootso aro, b́shúútsonowere tawi milikito da'adek'tswotsi tbek'i, Ik'o boosh b́'imts begena eteefo detsdek't mastayiti aats k'ari ganoke need'dek'tni botesh. 3 Ik' guutso Muse duubonat mereero duubono hank'o ett boduubfera botesh,
«Jam falts doonzo Izar Izewero!
N fino eenonat adike,
Ashuwotssh nugúsono!
nweero kááwonat arikee,
4 15:4 Erm. 10:7; Dub. 86:9 Doonzono!! neen sharawonat
nshúútso mangirawo kone?
ns'uz S'ayin neene,
N kááw angsho b́be'eetsotse
ash jamo wáár nshinatse sagaditwee.»
5 15:5 Kesh. 38:21 Maniyere il ts'iili, eshe hamb gawosh wotit dunkani wottso Ik'i S'ayin moo darotse k'eshe b́wutsi, 6 shawat fayuwotsi detsdek'ts shawat melakiwots Ik'i mootse bokeshi, goliru s'ayin taho tahdek'tni botesh, bogeratsowere awntsi edon eddek'kno botesh. 7 Awd s'ootswotsitse iko shawat melakiwotssh dúre dúron beyiru Ik'i fayo bín s'eents shawat awntsi wanc'uwotsi b́'imi. 8 15:8 Kesh. 40:34; 1 Naash. 8:10-11; 2 Zen. 5:13-14; Isa. 6:4 Ik'i moonúwere Ik'i mangonat angotse keshts s'uwoon s'een b́wutsi, shawat melakiwots bodetsts shawat fayuwots s'een bowtsefetsosh konúwor Ik'i moots kindosh falraats.