1 Na polotoluna parava, e Moses i gale palupu e Aron turana e huriki e tuna bakovi, e huriki a gare ne Israel. 2 Lakea i takia e Aron i ta maea, “O bolea tara bulmakau karaba a toga, a sipsip a toga ru gavutuvutu, o habi ne BAKOVI DAGI. A bulmakau ge a nihabi na naro hale, a sipsip ge a nihabi gutu-vuro. 3 O taki e huriki a Israel ri gi bolea tara meme a toga, ge a nihabi na naro hale, a tuna bulmakau, a tuna sipsip, ru pida takutaku, ru gavutuvutu, ge a nihabi gutu-vuro. 4 Muri e huriki ri gi habi a bulmakau, a sipsip a toga, ge a nihabi na nivalemu. A nihabi na vit ni vuli turana namona oliv, ia tara ni gi habi ne BAKOVI DAGI. Ri gi rata a maki nga, a vuhuna mona e BAKOVI DAGI ge bele, ri gi masia na matane ria.

5 E huriki ri bole valai na matana Kape na Vaponga a maka maki e Moses i vakuku ria vona ri gi bole. Muri e huriki lobo ri valai tabukoi ri pesi na matane BAKOVI DAGI. 6 Lakea e Moses i taki ria, i ta maea, “E BAKOVI DAGI i taki mua mu gu ratea a nihabi, muri bara mu masia a bagetua vona.”

7  * Hib 7:27Muri e Moses i takia e Aron i ta maea, “O valai na dede o ratea a nihabi na naro hale vomu, a nihabi gutu-vuro vomu. O rata a nihabi ge rua, ne vona ni kavitagu ioe, ne vona ni kavitagu e huriki, i ramaia a ngava e BAKOVI DAGI i vakuku.”

8 Lakea e Aron i valai na dede i rabalakia a bulmakau karaba, ra nihabi na naro hale vona. 9 Muri e huriki e tuna, ri bole valai vona a dara, lakea i lutua a kukulimana na dara, i ravu na tupi i va na dede. Muri i guru tala paru na taruna dede a dara i tababana. 10 Pali i gutu-vuro na dede a vina, a vuanalipi, a kinake i kavitagu a hate, i ramai a ngava e BAKOVI DAGI i vakuku e Moses vona. 11 Pali a bobona, a kulina bulmakau i bole tala, i gutu-vuro polovavo na mada.

12 Muri e Aron i vakalobo a leho nga, i rabalakia tara kanirau ge a nihabi gutu-vuro. E huriki e tuna ri bole a dara ri habi vona, i voro tamali langa na gagana dede i va. 13 Ri habi vona a mapana, a maka balena kanirau, i gutu-vuro langa na dede. 14 Muri i loi a maka mahalana, a vahana i rua, i gutu langa na dede turana nihabi gutu-vuro.

15 Muri e Aron i bole a nihabi ne huriki, i rabalakia a meme, i habia, ge a nihabi na naro hale ne huriki, i manga a nihabi muga. 16 I bole valai tabu a nihabi gutu-vuro, i habia, i ramaia a nita na vinara. 17 I bole valai tabu a nihabi na vit, i ragamu tala ranga, i gutu-vuro na dede. I gutu turana a nihabi gutu-vuro ni rata na hatelanga.

18  * Levi 3:1-11Muri e Aron i rabalaki a bulmakau a sipsip a toga, ge a nihabi na nivalemu ne huriki. Lakea e huriki e tuna ri bole a darana sipsip, a bulmakau, ri habi vona, i voro tamali na gagana dede i va. 19 Pali e Aron i bole a vina sipsip, a bulmakau nga: a vina kuna, a vuanalipi, a kinake i kavitagu a hate. 20 I bole a vina i ru langa na siana sipsip, a bulmakau nga, i gutu-vuro na dede. 21 Pali a siana, a pona bulmakau a sipsip, e Aron i tabari e BAKOVI DAGI vona, i manga a nihabi na nitabari, i ramai a ngava e BAKOVI DAGI i vakuku e Moses vona.

22  * Gi 6:22-26Na tahuna e Aron i habi lobo a nihabi na naro hale, a nihabi gutu-vuro, a nihabi na nivalemu, i toto langa a limana ne huriki, i gamai ria. Muri i pea a dede i puru.

23 Muri e Moses e Aron ru dili na Kape na Vaponga. Na tahuna ru pagitala ru gamai e huriki. Muri ri masia a bagetua ne BAKOVI DAGI i bele kavakava. 24 Malaviriri kunana a kanono i pagitala valai ne BAKOVI DAGI, i vakalobo liu a maka nihabi gutu-vuro, turana a balena vina kanirau. Na tahuna e huriki ri masia a naro iea i bele, ri haloho, ri tabuli bararapuru na malala.