1 “O ratea na kai a akas a dede na nihabi gutu-vuro a nipesina ge 1 mita 30 sentimita. A harena i va ge palupulupu, ge 2 mita 20 sentimita. 2 O kau a tupi ge va na tabekena kai a akas iea, o ru na nimodo na dede i va, o naviria a dede na bras. 3 O bole ranga bras o rata a ulo ne vona a habulo, a maka nikuri, a maka tavila, a maka mego, a maka mola. 4 O ratea na bras a mola ge kabelabela ne vona ni tunu a kanono. O rata a halui ge va na nimodo na dede, ne vona ni rodo polo a binole. 5 O bolea a mola o ru pololiloa na kurukuruna hini polomeli, a hini polotano na dede. 6 O bole a tabekena kai a akas o kau kamumu, o naviri na bras ge a binole. 7 Na tahuna a dede ni kaloho, a binole ni gi rodo dili na halui nga. 8 O ratea a dede ge ngava lokaloka na mavilana kai, ge manga a naro a vakasiri ioe vona na lolo.

9 “O rahia a kala ge ola ni gi kapi halui a mailo na kape. Na tabeke mule puru a niolana kala ge 44 mita ni gi kapi a nure vona. 10 O bolea a kala o vakatavorea na butu i ravulu rua ni rata na bras. Ra butu nga, o vakapesi langa na vuhu-butu i ravulu rua ni rata na bras. O rata na silva a kinau na kala, a karona nure. 11 O rata mavongea a nure na tabeke mule sike. A niolana kala ge 44 mita ni gi kapi a nure vona. O bolea a kala o vakatavorea na butu i ravulu rua ni rata na bras. Ra butu nga, ge pesi langa na vuhu-butu i ravulu rua ni rata na bras.

12 “Na tabeke na nirolona haro mu vakatavore vonga a kala, a niolana ge 22 mita. O vakapesi vonga a butu ge ravulu, a vuhu-butu ge ravulu ni rata na bras. 13 A nure na tabeke na nirikena haro na hini i vona a logo, a niolana ge 22 mita. 14 Na tabeke tara polovavo na logo o vakatavorea vonga a kala, a niolana ge 6 mita 60 sentimita. O vakapesi langa vonga na vuhu-butu ge tolu, a butu ge tolu. 15 Na tabeke tara na logo ge mavonga kunana.

16 “Na matana kape o vakatavorea tara kala kamumu a niolana ge 9 mita. O rahi dili a maka bagetua vona na maka hotu gomagoma, na hotu vururu, na hotu kuakua ni rata na vuna sipsip. O vakapesi a butu ge va na vuhu-butu ni rata na bras o vakatavorea a kala. 17 O rata na silva kinau, o varaki a maka butu na nure na karo ni rata na silva. O bole a bras o rata a vuhu-butu ne vona ni vakapesi a butu. 18 A niolana nure ge 44 mita, a nibolana ge 22 mita, a nipesina ge 2 mita 20 sentimita. O bole a kala keakea kamumu ni gi naviri vona a nure iea. O bole a bras ni gi rata a vuhu-butu ne vona ni vakapesi a butuna nure. 19 A maka mahalana kape ni gi rata na bras, turana a maka niroka ne vona ni tua kamumu ni vakatora a kape, a niroka na nure.

20 “O taki e huriki a Israel ri gi habi a namona oliv ni gi guru dili na lam ge para vakaroro. 21 E Aron turane huriki e tuna bakovi, ri gi bole dili na kape a lam ne vona ni tagui iau. Ra lam iea, ni gi ru polovavo na kala i naviri mule a Tava na Ngava Dagi. Na parava lobo ri gi guru dili a namona oliv na lam ge para na roho nau, e BAKOVI DAGI, ge vakatubu na malunga ge harena na hatelanga. E huriki a Israel turane huriki a hamone ria, ri gi ramai vakaroroa a vinara iea.