Luda yã takada kↄ̃n Bokobaru yão ZIA YÃ 3

Saadideenↄ yã

1 Ǹ kɛ̃ Saadi sↄsi zĩ̀rinɛ: Mamↄma kɛ̀ má Luda Nini mɛ̀n swɛɛplaaanↄ kũna kↄ̃n sↄsↄnɛ mɛ̀n swɛɛplaaanↄ, mámbe ma yã kɛ̀kii ò. Má n yãkɛnanↄ dↄ̃. Kuuna bɛ̃ɛ tↄ́ bé à dↄmma, mↄde gɛ̀n n ũ. 2 Ǹ itɛ̃ kɛ ǹ gbɛ̃ kɛ̀ aↄ̃ gↄ̃̀nnɛɛnↄ gba gbãaa ai aↄ̃gↄ̃ gá ga, zaakɛ má è n yãkee bↄɛzina ma Ludanɛro. 3 Beee yãnzi yã kɛ̀ ń mà ben ń sì ǹ tó àgↄ̃ dↄngu, ǹgↄ̃ kũna ǹ nↄ̀sɛ liɛ. Tó nɛ́ɛ itɛ̃ kɛro, mɛ́ mↄ́nzi lán kpãi bà, nɛ́gↄ̃ gurↄ zaka kɛ̀ mɛ́ mↄ́ dↄ̃ro. 4 Baa kↄ̃n beeeo ń gbɛ̃nↄ vĩ Saadi gwe féte kɛ̀ aↄ̃ↄe ń pↄ́kãsãanↄ gbãsĩ kpáro. Wé táa o lɛdo kↄ̃n pↄ́ puraao dana, zaakɛ aↄ̃ kà à lɛ́zĩ. 5 Lɛn gbɛ̃ kɛ̀ zĩ̀ blè égↄ̃ pↄ́kãsã puraa dana lɛ. Mɛ́ à tↄ́ dɛdɛ wɛ̃̀ndi takadan zikiro. Mɛ́ zɛo ma De kↄ̃n a malaikanↄ aɛ. 6 Gbɛ̃ kɛ̀ swã vĩ à yã kɛ̀ Luda Ninii e oo sↄsinↄnɛ ma.

Filadɛlɛfiadeenↄ yã

7 Ǹ kɛ̃ Filadɛlɛfia sↄsi zĩ̀rinɛ: Mamↄma kɛ̀ má kú madona yãpuradee ũ, kɛ̀ má Dauda mↄ̀nɛ kũna, kɛ̀ mɛɛ̀ zɛ́ wɛ̃ gbɛ̃ke è fↄ̃ à tataro, kɛ̀ mɛɛ̀ zɛ́ tata gbɛ̃ke è fↄ̃ à wɛ̃ro, mámbe ma yã kɛ̀kii ò. 8 Má n yãkɛnanↄ dↄ̃. Ǹ ma, ma zɛ́ wɛ̃̀nnɛ n aɛ, gbɛ̃ke é fↄ̃ à tataro. Baa kɛ̀ n gbãa bítaro, ń ma yã kũna nɛ́ɛ lɛ́ sɛ́maziro. 9 Setãn aduakɛkpɛ gbɛ̃ kɛ̀ aↄ̃è ń zĩnda diɛ Yudanↄ ũ bensↄ̃ aↄ̃ↄ dɛ à ũroonↄ, mɛ́ tó ɛgɛdee pìnↄ mↄ́ wà kúɛnnɛ, aↄ̃é dↄ̃ kɛ̀ má yenzi. 10 Zaakɛ ń yã kɛ̀ má dìɛnnɛ kũna n fↄ̃ n mɛna, mɛ́ n bↄ nawɛ̃a kɛ̀ èe mↄↄ anduna píngia guu lɛ à gbɛ̃ kɛ̀ aↄ̃ↄ kú tↄↄtɛanↄ lɛ́ à ń gwa. 11 Mɛ́ mↄ́ tia. Ǹgↄ̃ pↄ́ kɛ̀ ń vĩ kũna gbãa, lɛ gbɛ̃ke tón n láada símmaro yãnzi. 12 Mɛ́ gbɛ̃ kɛ̀ zĩ̀ blè kɛ ma Luda kpɛ́ wesagba ũ. Eé bↄ zikiro. Mɛ́ ma Luda tↄ́ kɛ̃a kↄ̃n ma Luda wɛ́tɛ Yerusalɛmu dufu kɛ̀ eé pita bↄna à kiia zaa musu tↄ́o kↄ̃n ma tↄ́ dufuo. 13 Gbɛ̃ kɛ̀ swã vĩ à yã kɛ̀ Luda Ninii e oo sↄsinↄnɛ ma.

Laodiseadeenↄ yã

14 Ǹ kɛ̃ Laodisea sↄsi zĩ̀rinɛ: Mamↄma Aami, sèeda náanɛde yãpuraa kɛ̀ má dɛ pↄ́ kɛ̀ Ludaa kɛ̀nↄ mìdee ũ, mámbe ma yã kɛ̀kii ò. 15 Má n yãkɛnanↄ dↄ̃. Ń yĩiro bensↄ̃ ń wãaro. Má yezi ǹgↄ̃ yĩi kesↄ̃ wãa. 16 Lán ń lↄ́gↄlↄgↄ nà, ń wãaro, bensↄ̃ ń yĩiro, mɛ́ n pisimɛ. 17 Nɛɛ̀ be ↄↄde auzikidee kɛ̀ pↄ́ke nii vĩroon n ũ. Ń dↄ̃ kɛ̀ gbɛ̃ pã bũu baakɛri wɛ̃ndade takaaside vĩ̀an n ũro. 18 Mɛ́ɛ lɛ́ daamma ǹ vura baasana lú ma kiia, lɛ ǹ kɛ ↄↄdee ũ. Ǹ pↄ́kãsã puraa lú ǹ da, lɛ ǹ n bũukɛɛ utɛ ǹ bↄ wín. Ǹ wɛ́ɛ ɛ̃zɛ̃ lú ǹ ká n wɛ́ɛn lɛ ǹ guu e. 19 Mɛɛ̀ kpãkɛ̃ gbɛ̃ kɛ̀ má yeńzinↄzi mà ń tòto kɛ. Beee yãnzi, ǹ aĩa kɛ ǹ nↄ̀sɛ liɛ. 20 À gwa, má zɛna kpɛɛlɛ mɛ́ɛ gbá lɛɛ. Tó gbɛ̃ ma kòto mà, ben à zɛ́ wɛ̃̀mɛ, mɛ́ gɛ̃ mà pↄ́ bleo eé blemao. 21 Mɛ́ gbɛ̃ kɛ̀ zĩ̀ blè gba zɛ́ à vɛ̃ɛmao ma kìtaa, lán mapi ma zĩ̀ blè ma vɛ̃ɛ kↄ̃n ma Deo a kìtaa nà. 22 Gbɛ̃ kɛ̀ swã vĩ à yã kɛ̀ Luda Ninii e oo sↄsinↄnɛ ma.