1 Ma bè, mɛ́gↄ̃ ma zĩnda kũna dↄ̃,

mɛ́ tó ma lɛ́ ma da durunkɛna guuro.

Tó gbɛ̃ zaaa kúmao, mɛ́ ma lɛ́ kũ.

2 Ma lɛ́ nakↄ̃a, ma yĩ kítikiti,

mɛ́ɛ yãke oro, baa yã maaa se,

ben ma yã'ↄ̃amma sↄ̀kpa à kàara.

3 Ma swɛ̃̀ puusu bↄ̀ ma guu,

kɛ̀ ma laasuu lɛ̀, ma swɛ̃̀ tɛ́ bↄ̀,

ben ma lɛ́ bↄ̀ ma bè:

4 Dii, ǹ tó màgↄ̃ ma wɛ̃̀ndigurↄ lɛ́ dↄ̃,

kↄ̃n ma gurↄ pari zaka lɛ́o.

Ǹ tó màgↄ̃ dↄ̃ lán ma wɛ̃̀ndi é gɛ̃ zɛ́la nà kãndo.

5 N ma wɛ̃̀ndi lɛ́ yↄ̃̀ n ↄla zakan,

ma kuuna dɛ wɛ́ɛ kↄ̃n yĩola n kiiaro.

Baade píngi è gɛ̃ zɛ́la lán ĩa bàmɛ,

6 gbɛ̃ntee tɛna ègↄ̃ dɛ lán ↄra bàmɛ.

È bãabãa bo à auziki kakↄ̃a,

mↄde à dↄ̃ tó dén eé gↄ̃nɛro.

7 Tó lɛmɛ, bↄ́ tãmaan mɛ́gↄ̃ vĩi?

Ḿbe ma wɛ́ɛ dↄnzi, Dii.

8 Ǹ ma taarinↄ kɛ̃mɛ,

ǹton tó yↄ̃nkↄↄnↄ ma faboro.

9 Ma lɛ́ nakↄ̃ana, mɛ́ɛ ma lɛ́ wɛ̃kↄ̃aro,

zaakɛ ḿbe n yã beee kɛ̀.

10 Ǹton ma lɛ́ dↄro,

ma gbãsĩ lɛ̀ n ↄkũ yãnzi.

11 Nɛɛ̀ gbɛ̃ toto nɛɛ̀ wɛ́ɛ tãa à durun yãnzi,

nɛɛ̀ à auziki yaka lán blɛ́ bà.

Baade píngi è gɛ̃ zɛ́la lán ĩa bàmɛ.

12 Ǹ ma aduakɛna sí Dii,

ǹ swã kpá ma wiipɛnazi.

Ǹton ma ↄ́ↄdↄna kpá swãkotoro,

zaakɛ n nibↄn ma ũ,

má dɛ gbɛ̃ zĩ̀tↄ ũ lán ma dezinↄ bà.

13 Ǹ uu goma lɛ ma pↄↄ e àgↄ̃ nna dↄ,

ai màgↄ̃ gá anduna tó.