7
Ǹ yã nnaa kpáma, Dii!
Lɛ̀ kɛ̀ Dauda sì Diinɛ Bɛyãmi bori Kusu yã musu.
1 Dii ma Luda, ma nanzi,
ǹ ma mì sí ǹ ma faaba kɛ
gbɛ̃ kɛ̀ aↄ̃ pɛ̀ɛmaanↄ ↄzĩ.
2 Tó lɛnlo, aↄ̃é ma kɛ gyáigyai
lán músu è kɛńnɛ nàmɛ,
aↄ̃é ma kɛ̃kɛ̃kↄ̃rɛ,
gbɛ̃ke é ma mì síro.
3 Dii ma Luda, tó ma taari ke kɛ̀,
tó ma ↄↄ kú yã zaaan,
4 tó ma à zaaa kɛ̀ ma gbɛ̃daaanɛ,
ke tó ma gbãaa mↄ̀ ma ibɛɛnɛ pã,
5 ǹ tó ma ibɛɛ pì pɛ́ɛma à ma kũ,
à kɛ̀sɛ pɛ́ɛpɛɛma tↄↄtɛ,
à ma vĩi bùsu'ãatɛ̃n.
6 Ǹ fɛɛ ǹ zɛ kↄ̃n pↄfɛ̃o, Dii,
ǹ fɛɛ ma ibɛɛnↄzi ń nↄ̀sɛ kpã̀kpã yãnzi.
Ǹ vú, ma Luda,
ǹ yã gↄ̃gↄ̃ a zɛ́a.
7 Ǹ tó gbɛ̃nↄ kakↄ̃anzi,
ǹ kí bleńnɛ zaa musu.
8 Dii, nɛɛ̀ yãkpaɛ kɛ kↄ̃n gbɛ̃nↄ.
Dii, ǹ tó yã bↄmao nna ma yãzɛde lɛ́n,
Luda Musude, ǹ yã kɛmɛ ma nↄ̀sɛpura lɛ́n.
9 Luda, ḿbe ń maa,
nɛɛ̀ nↄ̀sɛ kↄ̃n laasuuo kpokɛ.
Ǹ gbɛ̃ zaaanↄ pãsĩkɛna mì dɛ,
ǹ gbɛ̃ maaanↄ gba zɛkii.
10 Luda Musuden ma sɛngbango ũ,
è gbɛ̃ kɛ̀ aↄ̃ nↄ̀sɛ maaanↄ mì sí.
11 Luda è yãkpaɛ kɛ a zɛ́a,
è tó yã gↄ̃ vɛ̃ɛḿma gurↄ píngi.
12 Tó gbɛ̃ e a nↄ̀sɛ liɛro,
Luda è a fɛ̃ɛda lɛ́ kɛ
è a sá kú à kã.
13 È a gↄ̃kɛbↄ kɛ̀ è gaa ińnɛnↄ kɛkɛ,
è a kà tɛ́deenↄ kpá sála.
14 Ǹ gwa, yã zaaa è nↄ̀ dↄ gbɛ̃n,
ben è wahaa nↄ̀ sí à nɛ́ i ɛgɛɛ ũ.
15 È wɛ̀ɛ yↄ̃ gbɛ̃nↄnɛ zã̀azã takutɛɛ ũ,
ben è zu wɛ̀ɛ kɛ̀ à yↄ̃̀ pì guu.
16 À àisi pãsĩ è wí à musu,
à wɛ́ɛtãna gbɛ̃nↄa è wí à mìa.
17 Mɛ́ Dii sáabu kpá a maakɛɛ yãnzi,
mɛ́ Dii Musude tↄ́ bↄ kↄ̃n lɛ̀sinao.