16
Samusĩ Gaza gɛ̃kii gbà gborona
1 Samusĩ gàa Gaza à kaarua ke è gwe, ben à gɛ̃̀ à daɛo. 2 Wà bè Gazadeenↄnɛ: Samusĩ kú kɛ̀. Ben aↄ̃ lìga guu pìzi, wèe à kpákpaa wɛ́tɛ gɛ̃kiia gwãavĩ. Aↄ̃ yĩ̀tɛ gwãavĩ pìa wà bè: Tó guu dↄ̀, wé à dɛmɛ. 3 Samusĩ dàɛ gwe ai lezãndo, ben à fɛ̀ɛ à gàa à wɛ́tɛ gɛ̃kii gbà kũ̀ kↄ̃n a lípɛɛ mɛ̀n plaaanↄ à wùrɛ kↄ̃n à gbãngao lɛdo. À dà a gã̀n à gàa à zĩ̀nna sĩ̀sĩ kɛ̀ aɛ dↄ Ɛblↄnua musu.
Samusĩ kↄ̃n Dɛlilao
4 Beee gbɛra Samusĩ yè nↄgbɛ̃ kezi zaa Sↄrɛki guzurɛn, à tↄ́n Dɛlila. 5 Ben Filisitininↄ kínanↄ gàa wà nↄgbɛ̃ pì lè aↄ̃ bènɛ: Ǹ ↄ̃ndↄ̃ↄ daɛzi lɛ ǹ e ǹ à gbãa bíta pì asii dↄ̃ kↄ̃n dian wé kɛ nà wà gbãaa mↄ́nɛo. Tó wa à yì bào wa à gbãaa bùsa, wa baade é n gba kondogi ↄↄ mɛ̀n wàa sↄↄro kpɛ́ basↄↄro. 6 Ben Dɛlila bè Samusĩnɛ: Ǹ ń gbãa bíta asii omɛ kↄ̃n dian weé kɛ nà wà n yi bào wà n gbãaa busao. 7 À wèàla à bè: Tó wà ma yi kↄ̃n kyã yĩi mɛ̀n swɛɛplaaao, beee bé eé ma busa màgↄ̃ dɛ lán baade bà. 8 Filisitininↄ kínanↄ mↄ̀ Dɛlilanɛ kↄ̃n kyã yĩi kɛ̀ èe kori kũrooo mɛ̀n swɛɛplaaa, ben à à yìo. 9 À kũ̀rinↄↄ utɛna kpɛ́tu, ben Dɛlila bè Samusĩnɛ: Samusĩ! Filisitininↄↄɛ zɛnla fá! Ben à kyã pìnↄ kɛ̃̀kɛ̃ lán bà mùna bà, wèe à gbãaa asii dↄ̃ro.
10 Ben Dɛlila bènɛ: Nɛ́ɛ ma lalandi kɛɛ, nɛ́ɛ ɛgɛɛ toomɛmɛ. Ǹ omɛ sa dian weé n yi nà. 11 Ben à bènɛ: Tó wà ma yi kↄ̃n bà gègete dufu kɛ̀ wèe zĩi kɛo zikirooo, eé ma busa màgↄ̃ dɛ lán baade bà. 12 Ben Dɛlila bà pì sɛ̀ à à yìo. À kũ̀rinↄↄ utɛna kpɛ́tu, ben à bè: Samusĩ! Filisitininↄↄɛ zɛnlaee! Ben Samusĩ bà kɛ̀ dↄ a ↄↄa pì kɛ̃̀kɛ̃ lán sↄbuba bà. 13 Dɛlila bènɛ: Nɛ́ɛ ma lalandi kɛɛ ai tia. Nɛ́ɛ ɛgɛɛ toomɛ. Ǹ omɛ sa dian weé n yi nà? Ben à bènɛ: Tó n ma mìkã gbã̀a mɛ̀n swɛɛplaaanↄ kũ̀ ń dà àsan ń tã̀, ben n káro pɛ̀a, mɛ́ busa màgↄ̃ dɛ lán baade bà. Dɛlila tò ii à sɛ̀, ben à à mìkã gbã̀a mɛ̀n swɛɛplaaa pìnↄ kũ̀ à tã̀ lán bisatãna bà 14 à káro pɛ̀a. Ben à bè: Samusĩ! Filisitininↄↄɛ zɛnlaee! Ben à vù à àsa pì gà à wùrɛ kↄ̃n a mìkão.
15 Dɛlila ɛ̀ara à bènɛ dↄ: Nɛɛ̀gↄ̃ bee ń yemazi, bensↄ̃ nɛɛ̀ ma náanɛ kɛro nɛ́? N ma lalandi kɛ̀ à kà gɛ̃̀n aagↄ̃. Nɛ́ɛ n gbãa bíta asii omɛro. 16 Lɛn ègↄ̃ nakↄ̃rɛɛa lɛ kↄ̃n yã beee takao yãana sai. Èe a zĩnda busaanɛ ai à gàa à fù mɛnaa à yezi à ga. 17 Ben à yã kɛ̀ kú a swɛ̃̀n ònɛ píngi sa à bè: Gɛ̃ɛ e na ma mìa zikiro, zaakɛ wà ma kɛ Luda pↄ́ ũmɛ. Tó wà ma mì bò, ma gbãaa é bↄmagu, mɛ́ busa màgↄ̃ dɛ lán baade bà. 18 Kɛ̀ Dɛlila è à yã kɛ̀ kú à swɛ̃̀n òare píngi, ben à lɛ́kpãsã kɛ̀ Filisitininↄ kínanↄnɛ à bè: À ɛara à mↄ́ gɛ̃̀n do dↄ, zaakɛ à à píngi òmɛ sa. Ben aↄ̃ ɛ̀ara wà mↄ̀ à kiia, aↄ̃ↄ kondogi pì kũna. 19 Dɛlila tò ii Samusĩ sɛ̀ a gbála, ben à gↄ̃gbɛ̃ ke sìsi. À à mìkã gbã̀a mɛ̀n swɛɛplaaa pìnↄ bò, ben à nà busanaa à gbãaa pì bↄ̀n. 20 Dɛlila bè: Samusĩ! Filisitininↄↄɛ zɛnlaee! Ben à vù èe daa é kɛ lán yãa bà à a zĩnda bↄmɛ. À dↄ̃ kɛ̀ Dii a tonlo. 21 Ben Filisitininↄ à kũ̀, wà à wɛ́ɛnↄ bↄ̀bↄ, ben aↄ̃ gàao Gaza. Aↄ̃ mↄ̀gotɛ̃ gata kpànɛ, ben wà à dà èe wísi lↄↄ kpɛ́siaan. 22 À mìkã pì ɛ̀ara à nà kpaɛnaa dↄ à bona gbɛra.
Samusĩ gana
23 Filisitininↄ kínanↄ kↄ̃ kàkↄ̃a lɛ wà ń tãa Dagↄni gbãgbã, ben aↄ̃ↄe pↄnnaa kɛɛ wèe bè: Wa tãa wa ibɛɛ Samusĩ nàwe wa ↄzĩ. 24 Kɛ̀ Filisitininↄ à è, aↄ̃ ń tãa sáabu kpà wà bè:
Wa ibɛɛ wa bùsu dɛ̀,
à wa gbɛ̃nↄ dɛ̀dɛ dúgudugu,
ben wa tãa à nàwe wa ↄzĩ.
25 Lán aↄ̃ pↄↄ kɛ̀ nna nà aↄ̃ bè: À Samusĩ sísi à kↄ̃kↄ̃ owe. Ben wà à bↄ̀ kpɛ́siaan à yáadↄziyã kɛ̀ńnɛ.
Kɛ̀ wà à zɛ̀ kpɛ́ wesagbanↄ dagura, 26 à bè gↄ̃kparɛ kɛ̀ à à ↄ kũnanɛ: Ǹ gámao wesagba kɛ̀ aↄ̃ kpɛ́ sɛnanↄ saɛ lɛ mà ↄ nanaa mà gbãaa ea. 27 Tãakpɛ pì pà, gↄ̃gbɛ̃nↄ kↄ̃n nↄgbɛ̃nↄↄ kú gwe kↄ̃n Filisitininↄ kínanↄ ń píngi. Gbɛ̃ kɛ̀ aↄ̃ↄ kú kpɛ́ pì musu kà gↄ̃ↄn bↄrↄ aagↄ̃, kɛ̀ aↄ̃ mↄ̀ Samusĩ kↄ̃kↄ̃ gwa.
28 Samusĩ wɛ́ɛ kɛ̀ Diia à bè: Dii Luda, ǹ tó ma yã dↄngu. Luda, ǹ ma gba gbãaa gɛ̃̀n do dↄ lɛ mà gɛ̃ɛ boo Filisitininↄa ma wɛ́ɛ mɛ̀n plaa yã musu. 29 À ↄ nàna wesagba mɛ̀n plaaa kɛ̀ aↄ̃ kpɛ́ pì kũna gura súusunↄa, à ↄplaa kú à dooa à ↄzɛɛ kú à dooa dↄ. 30 À bè: Ǹ tó mà ga kↄ̃n Filisitininↄo! À nàɛ, ben à ↄ yĩ̀pazi kↄ̃n gbãaao, ben kpɛ́ pì gbòro à sì Filisitininↄ kínanↄa kↄ̃n gbɛ̃ kɛ̀ aↄ̃ↄ kú à guunↄ ń píngi. Gbɛ̃ kɛ̀ Samusĩ ń dɛ́dɛ a gagurↄↄnↄↄ pari dɛ gbɛ̃ kɛ̀ à ń dɛ́dɛ gurↄↄ kɛ̀ à kú wɛ̃̀ndiola. 31 À dãaronↄ kↄ̃n à de bɛdeenↄ mↄ̀ ń píngi aↄ̃ à gɛ̀ sɛ̀ wà tào, ben aↄ̃ à mira kpàkↄ̃zi kↄ̃n à de Manↄa pↄ́o, Zↄra kↄ̃n Ɛsɛtaoluo dagura. À yã gↄ̃̀gↄ̃ Isarailinↄnɛ ai wɛ̃̀ baro.