Luda yã takada kↄ̃n Bokobaru yão YÃGƆ̃GƆ̃RINƆ 13

Samusĩ ina

1 Isarailinↄ ɛ̀ara wà yã kɛ̀ Dii gìzi kɛ̀ dↄ, ben Dii ń ná Filisitininↄnɛ ń ↄzĩ ai wɛ̃̀ baplaa. 2 Gↄ̃gbɛ̃ kee kú Zↄra, Dani boriimɛ, à tↄ́n Manↄa. À naↄ̃ nɛ́ pãaamɛ, èe nɛ́ iro. 3 Dii Malaika bↄ̀ à mↄ̀ nↄgbɛ̃ pìzi à bè: Ǹ ma! Pãaan n ũ, nɛ́ɛ nɛ́ iro, mↄde nɛ́ nↄ̀ sí ǹ nɛ́ i gↄ̃gbɛ̃ ũ. 4 Ǹ làakari kɛ! Ǹton geepiwɛ̃ɛ ke í gbãa ke miro. Ǹton tɛ̃̀ ke blero. 5 Nɛ́ nↄ̀ sí ǹ nɛ́ i gↄ̃gbɛ̃ ũ. Gɛ̃ɛ tón na nɛ́ pì mìaro, zaakɛ eégↄ̃ dɛ Luda pↄ́ ũmɛ zaa a igurↄ. Àmbe eé na Isarailinↄ bↄnaa Filisitininↄ ↄzĩ.

6 Ben nↄgbɛ̃ pì gàa à ò a zãnɛ à bè: Luda gbɛ̃ke mↄ̀ ma kiia. Tó n à è, à dɛ lán Luda Malaika bà à naasi vĩ maamaa. Mɛ́ɛ à la tó mán à bↄ̀nlo, bensↄ̃ èe a tↄ́ omɛro. 7 À bèmɛ mɛ́ nↄ̀ sí mà nɛ́ i gↄ̃gbɛ̃ ũ. À bèmɛ màton wɛ̃ɛ ke í gbãa ke miro, bensↄ̃ màton tɛ̃̀ ke blero, zaakɛ nɛ́ pì égↄ̃ dɛ Luda pↄ́ ũmɛ zaa a igurↄ ai à wɛ̃̀ndi lɛ́n. 8 Ben Manↄa wɛ́ɛ kɛ̀ Diia à bè: N yã nna Dii! Ǹ tó gbɛ̃ kɛ̀ ń zĩ̀ ɛara à mↄ́ dↄ à yã kɛ̀ wé kɛ kↄ̃n nɛ́ pìo à ina gbɛraa dawe. 9 Luda Manↄa yã mà, ben Luda Malaika pì ɛ̀ara à mↄ̀ nↄgbɛ̃ pìzi gurↄↄ kɛ̀ à kú bura. À zã Manↄa kúo gwero, 10 ben à kɛ̀ kpaa à bàa lɛ̀ à gàa à ònɛ à bè: Gↄ̃gbɛ̃ kɛ̀ bↄ̀ à mↄ̀ mazi zĩ mↄ̀a kɛ̀ dↄee! 11 Manↄa fɛ̀ɛ à tɛ̀ a naↄ̃zi. Kɛ̀ à kà gↄ̃gbɛ̃ pì kiia, à à là à bè: Ḿbe n yã ò ma naↄ̃oↄ́? À wèàla à bè: Mámbee! 12 Ben Manↄa à là à bè: Tó n yã pì gàa à kɛ̀ lɛ, nɛ́ pì kuuna égↄ̃ dɛ diamɛ? Bↄ́ zĩin eégↄ̃ kɛɛ? 13 Dii Malaika wèàla à bè: N naↄ̃ gↄ̃ yã kɛ̀ má ònɛ kũna píngi. 14 Àton geepi lí pↄ́ke blero. Àton wɛ̃ɛ ke í gbãa ke miro. Àton tɛ̃̀ ke blero. Àgↄ̃ yã kɛ̀ má dìɛnɛ kũna píngi. 15 Ben Manↄa bènɛ: N yã nna, ǹ zɛ gĩa ai wà blènɛ bↄ̀rↄ kɛkɛnnɛ. 16 Dii Malaika wèàla à bè: Baa tó ma gↄ̃ kɛ̀, mɛ́ n pↄ́ke blero. Tó n sa'opↄ kɛ̀ wè ká tɛ́n à tɛ́ kũ soru kɛ̀, ǹ o Diia. Manↄa e dↄ̃ kɛ̀ Dii Malaikanlo, 17 ben à à là à bè: N tↄ́n diaa? Tó yã kɛ̀ ń ò pì kɛ̀, wé sáabu kɛnnɛ. 18 Dii Malaika wèàla à bè: Bↄ́yãnzin nɛ́ɛ ma tↄ́ gbekaazi? Tↄ́ bↄnsaɛmɛ. 19 Ben Manↄa blènɛ bↄ̀rↄ kũ̀ à flawa sɛ̀ à Dii gbã̀gbão gbɛ̀ ke musu. Kɛ̀ Manↄa kↄ̃n a naↄ̃o wɛ́ɛ kà wèe gwaa, ben Dii yãbↄnsaɛ kɛ̀ 20 à tò tɛ́ bↄ̀ sa'okii pìn à fɛ̀ɛ musu, ben Dii Malaika fɛ̀ɛ tɛ́nɛnɛ pì guu à tà musu. Kɛ̀ Manↄa kↄ̃n a naↄ̃o è lɛ, ben aↄ̃ dàɛ ń puua.

21 Dii Malaika e gà à mↄ̀ Manↄa kↄ̃n a naↄ̃ozi dↄro, ben Manↄa dↄ̃̀ sa kɛ̀ Dii Malaikamɛ. 22 Manↄa bè a naↄ̃nɛ: Wa gan gweee! Zaakɛ wa wɛ́ɛ sì Ludalɛ. 23 Ben à naↄ̃ bènɛ: Tó Dii yezi à wa dɛmɛ, lɛ èe saa kɛ̀ wá òa kↄ̃n flawao síro, lɛ èe yã kɛ̀nↄ owero bensↄ̃ èe yã pì ↄdↄawero.

24 Nↄgbɛ̃ pì nɛ́ ì gↄ̃gbɛ̃ ũ, ben à tↄ́ kpànɛ Samusĩ. Nɛ́ pì bíta kũ̀, bensↄ̃ Dii aubarika dàn. 25 Dii Nini nà zĩkɛnaa à guu gurↄↄ kɛ̀ à kú Daninↄ bùran, Zↄra dagura kↄ̃n Ɛsɛtaoluo.