1 Isarailinↄ ɛ̀ara wà yã kɛ̀ Dii gìzi kɛ̀ dↄ, ben Dii ń ná Midiãnↄnɛ ń ↄzĩ ai wɛ̃̀ swɛɛplaa. 2 Kɛ̀ Midiãnↄↄ e ↄ tↄ̃ↄḿma, ben Isarailinↄ utɛkiinↄ kɛ̀kɛ gukpiideenↄn kↄ̃n gbɛ̀wɛɛnↄ kↄ̃n sɛ̃̀tɛpↄↄtunↄo. 3 Tó aↄ̃ pↄ́ tↄ̃̀, Midiãnↄ kↄ̃n Amalɛkinↄ kↄ̃n ↄfãntɛ̃bↄɛ kpa bori pãndenↄ è mↄ́ wà lɛ́ɛḿmamɛ. 4 Aↄ̃è mↄ́ wà bùra káɛ ń bùsun, ben aↄ̃è ń bura pↄ́nↄ yakańnɛ ai à gá pɛ́o Gazaa. Aↄ̃è pↄ́ke tó Isarailinↄnɛro ke sãa ke zù ke zaaki. 5 Aↄ̃è mↄ́ kↄ̃n ń pↄ́kãdeenↄ kↄ̃n ń bisakutaanↄ paripari lán sutɛ̃nↄ bà. Gbɛ̃ke ègↄ̃ ḿpinↄ kↄ̃n ń lakuminↄ lɛ́ dↄ̃ro. Aↄ̃è mↄ́ wà bùsu yakamɛ. 6 Midiãnↄ Isarailinↄ kpà takaasikɛɛzi, ben aↄ̃ wii pɛ̀ Diizi.

7 Kɛ̀ aↄ̃ wii pɛ̀ Diizi Midiãnↄ yã musu lán beee bà, 8 ben Dii annabi bↄ̀ńnɛ à bè: Mamↄma Dii Isarailinↄ Luda ma bè ma a bↄ zↄ̀bleen ma a bↄɛ Igipiti. 9 Ma a bↄ Igipitinↄ ↄzĩ kↄ̃n gbɛ̃ kɛ̀ aↄ̃ ↄ tↄ̃̀awaanↄ ń píngi ma pɛ́ḿmaare, ben ma ń bùsu kpàawa. 10 Kɛ̀ ma bèare mámbe Dii a Luda ũ, àton Amↄri kɛ̀ á kú ń bùsunnↄ tãanↄ gbãgbãro, ben a gi ma yã mazi.

11 Dii Malaika mↄ̀ à vɛ̃̀ɛ gbíi lí gbáru zaa Ɔfla, Abiɛza bori Yoasi bɛ wɛ́tɛ. À nɛ́ Gidiↄn e blɛwɛɛ gbɛ̃ɛ geepi'ifɛ̃ki wɛ̀ɛn lɛ Midiãnↄ tón à ero yãnzi. 12 Kɛ̀ Dii Malaika bↄ̀ à mↄ̀zi, à bènɛ: Gↄ̃ gbãaa, Dii kúnyo. 13 Ben Gidiↄn bènɛ: Maree, tó Dii kúwao, bↄ́yãnzin yã kɛ̀nↄ wa lezi píngii? Dabuyã kɛ̀ wa denↄ à yã tↄ̃kɛ̃̀weenↄↄ kú mámɛ? Aↄ̃ bè Dii wa bↄɛ Igipiti, mↄde tiala à pã kpàwazi, ben à wa na Midiãnↄnɛ ń ↄzĩ. 14 Ben Dii aɛ dↄ̀a à bè: Ǹ gá kↄ̃n gbãaa kɛ̀ ń vĩio ǹ Isarailinↄ bↄ Midiãnↄ ↄzĩ. À dɛ mámbe mɛ́ɛ n zĩi fá. 15 Ben Gidiↄn à là à bè: Maree, mɛ́ fↄ̃ mà Isarailinↄ bↄ diamɛ? Ma ua bé à kɛ̃sãna Manasenↄ tɛ́ bensↄ̃ mámbe má nɛ́ngo dɛńla ma de bɛdeenↄ tɛ́. 16 Dii wèàla à bè: Mɛ́gↄ̃ kúnyo, nɛ́ Midiãnↄ lɛ́ ǹ nɛ lán gbɛ̃ mɛ̀n doo bà. 17 Ben Gidiↄn bènɛ: Tó ma n pↄnnaa è, ǹ sèeda ↄdↄamɛ lɛ màgↄ̃ dↄ̃ kɛ̀ ḿbe nɛ́ɛ yã oomao. 18 Ǹton gu kɛ̀ro ai mà su. Mɛ́ mↄ́nnɛ kↄ̃n gbaao mà diɛnnɛ. Ben à wèàla à bè: Mɛ́gↄ̃ kú kɛ̀ ai ǹ ɛara ǹ su.

19 Gidiↄn gàa à blènɛ dɛ̀ à kɛ̀kɛ, à burɛdi sɛ́sɛ'ɛ̃zɛ̃sai kɛ̀ kↄ̃n wísiti kilo kurio. À nↄ̀bↄ kà gbíin à dò kà oroon à gàao gbíi lí pì gbáru gwe, ben à dìɛnɛ. 20 Luda Malaika bènɛ: Ǹ nↄ̀bↄ kↄ̃n burɛdio sɛ́ ǹ káɛ gbɛ̀ kɛ̀kiia ǹ dò ɛɛa. Ben à kɛ̀ lɛ. 21 Ben Dii Malaika gò kɛ̀ à kũna zↄ̃̀ nↄ̀bↄ kↄ̃n burɛdi pìoa, ben tɛ́ bↄ̀ gbɛ̀ pì guu à kũ̀ nↄ̀bↄ kↄ̃n burɛdi pìoa, ben Dii Malaika pì gusii lɛ̀. 22 Kɛ̀ Gidiↄn dↄ̃̀ Dii Malaikamɛ, à bè: Kúku Dii Luda, ase n Malaikan ma wɛ́ɛ sìàlɛ tɛ̃tɛ̃ntɛ̃ↄ́? 23 Ben Dii bènɛ: Ǹgↄ̃ kú aafia! Ǹton tó vĩa n kũro. Nɛ́ garo. 24 Gidiↄn Dii gbãgbãkii bò gwe, ben à tↄ́ kpà guu pìnɛ Dii Aafiade. À kú Ɔfla Abiɛza gwe ai kↄ̃n a gbã̀ao.

25 Zĩ beeea gwãavĩ Dii bènɛ: Ǹ n de zùswaree kɛ̀ kà wɛ̃̀ swɛɛplaa kũ ǹ Baali gbãgbãkii kɛ̀ n dee vĩi gboro ǹ Asɛra lí kɛ̀ zɛ à saɛ zↄ̃ ǹ nɛ. 26 Ǹ mamↄma Dii n Luda gbãgbãkii bo a zɛ́a gu gbãaa kɛ̀kii musu. Ǹ Asɛra lí kɛ̀ ń zↄ̃̀ sɛ́ɛ yàka ũ ǹ sa'opↄ kɛ̀ wè ká tɛ́n à tɛ́ kũ oma kↄ̃n zù pìo. 27 Ben Gidiↄn a zĩkɛrinↄ sɛ̀ gↄ̃ↄn kuri à kɛ̀ lán Dii ònɛ nà. Kɛ̀ èe vĩa kɛɛ a de bɛdeenↄnɛ kↄ̃n wɛ́tɛdeenↄ yãnzi, èe we à kɛ̀ fãantɛ̃ro, gwãavĩn à kɛ̀.

28 Kɛ̀ wɛ́tɛdeenↄ fɛ̀ɛ kↄngↄ, aↄ̃ↄ è wà Baali gbãgbãkii gbòro wà Asɛra lí kɛ̀ zɛ à saɛ zↄ̃̀ wà nɛ̀ wà saa ò kↄ̃n zùo sa'oki dufu kɛ̀ wà bòa. 29 Ben aↄ̃ kↄ̃ làla: Dé bé à kɛ̀kii kɛ̀? Kɛ̀ wà dↄ̀ńzi wà gbèkagbeka, ben aↄ̃ mà wà bè: Yoasi nɛ́ Gidiↄn bé à kɛ̀ lɛ. 30 Ben wɛ́tɛdeenↄ gàa wà bè Yoasinɛ: Ǹ bↄ kↄ̃n n nɛ́o wà à dɛ, zaakɛ à Baali gbãgbãkii gbòro bensↄ̃ à Asɛra lí kɛ̀ zɛ à saɛ zↄ̃̀ à nɛ̀. 31 Ben Yoasi bè gbɛ̃ kɛ̀ aↄ̃ↄ ligaaziinↄnɛ: Ámbe é yã sí kↄ̃n Baalioↄ́? Ámbe é à bↄↄ́? Weé gbɛ̃ kɛ̀ yã sìo dɛ ai guu gↄ̃ gá dↄ. Tó tãan à ũ, à gí a zĩndao à gbãgbãkii kɛ̀ wà gbòro yãnzi. 32 Zĩ beeean wà tↄ́ kpà Gidiↄnnɛ Yerubaali wà bè: Wà à tó kↄ̃n Baalio, zaakɛ à gbãgbãkiin à gbòro.

33 Midiãnↄ kↄ̃n Amalɛkinↄ kↄ̃n ↄfãntɛ̃bↄɛ kpa gbɛ̃ pãndenↄ kↄ̃ kàkↄ̃a ń píngi aↄ̃ bikũ̀ Yodaa, ben aↄ̃ bùra kàɛ Yɛzɛrili guzurɛn. 34 Dii Nini sù Gidiↄn-a, ben à Abiɛzanↄ sìsi kↄ̃n kuuo lɛ aↄ̃ mↄ́ wà tɛ́azi. 35 À gbɛ̃nↄ zĩ̀ Manasenↄ bùsu gu píngia wà ń sísi se aↄ̃ mↄ́ wà tɛ́azi. Ben à gbɛ̃nↄ zĩ̀ Asanↄ bùsun kↄ̃n Zɛbuluninↄ bùsuo kↄ̃n Nafatalinↄ bùsuo. Ben aↄ̃ mↄ̀ wà nàḿma.

36 Gidiↄn bè Ludanɛ: Tó nɛ́ Isarailinↄ bↄ ma gãzĩ lán n à lɛ́ gbɛ̃̀mɛ nà, 37 ǹ gwa, mɛ́ɛ sãkã kaɛɛ blɛwɛɛgbɛ̃kiia. Tó kpíi kpà sãkã pìa ado, bensↄ̃ tↄↄtɛ gↄ̃̀ kori, mɛ́ dↄ̃ sa kɛ̀ nɛ́ Isarailinↄ bↄ ma gãzĩ lán ń ò nà. 38 Ben à kɛ̀ lɛ. Kɛ̀ guu dↄ̀, ben à fɛ̀ɛ idɛ'idɛ, à sãkã pì fɛ̃̀, à í taa pà. 39 Ben Gidiↄn bè Ludanɛ: Ǹton pↄ fɛ̃maoro. Má yezi mà yã gbekamma gɛ̃̀n do dↄ. Ǹ tó mà gwa sãkãa gɛ̃̀n do dↄ. Kɛ̀kii sa, ǹ tó kpíi kpá tↄↄtɛa ado, sãkã gↄ̃ kori. 40 Gwãavĩ beeea Ludaa kɛ̀ lɛ. Kpíi kpà tↄↄtɛa gu píngia, sãkã bé à gↄ̃̀ kori ado.