Luda yã takada kↄ̃n Bokobaru yão ZĨRINƆ 8

1 Solu kú gbɛ̃ kɛ̀ aↄ̃ Sitivĩ dɛ̀nↄ kpɛɛ.

Solu wɛ́ɛtãmma mↄna Yesudeenↄnɛ

Zĩ beeean wà nà wɛ́ɛtãna sↄsi gbɛ̃ kɛ̀ aↄ̃ↄ kú Yerusalɛmunↄa maamaa. Zĩ̀rinↄ baasi, aↄ̃ fã̀akↄ̃a ń píngi Yudea kↄ̃n Samaria bùsunↄ guu. 2 Ludayãdari kenↄ Sitivĩ vĩ̀i aↄ̃ à gɛ̀ ↄ́ↄ dↄ̀ kↄ̃n wii gbãaao. 3 Ben Solu aĩa kɛ̀ kↄ̃n sↄsi gbɛ̃nↄ kaatɛnao. Ègↄ̃ gɛ̃ɛ ua kↄ̃n uao àgↄ̃ gↄ̃gbɛ̃nↄ kↄ̃n nↄgbɛ̃nↄ kũkũu àgↄ̃ ń gáɛɛ à gá à ń ká kpɛ́siaan.

Baarunnakpana Samaria bùsun

4 Gbɛ̃ kɛ̀ aↄ̃ fã̀akↄ̃aanↄ gàa wà Yesu baaru kpà gu sãnda píngin. 5 Filipi gàa Samaria bùsu wɛ́tɛ ken, ben à Mɛsaya waazi kɛ̀ńnɛ. 6 Kɛ̀ gbɛ̃nↄ Filipi yã mà, bensↄ̃ aↄ̃ dabuyã kɛ̀ à kɛ̀nↄ è, aↄ̃ làakari dↄ̀ yã kɛ̀ èe ooa kↄ̃n nↄ̀sɛo do. 7 Zaakɛ gbɛ̃ kɛ̀ aↄ̃ zĩnnↄ gòḿma kↄ̃n wii gbãaaonↄↄ pari, bensↄ̃ gbɛ̃ kↄ̃̀ↄkũnanↄ kↄ̃n ɛrɛnↄ kɛ̃̀kↄ̃a pari. 8 Ben wà pↄnnaa kɛ̀ maamaa wɛ́tɛ pì guu.

9 Gↄ̃gbɛ̃ kee kú gwe zaa zi wè benɛ Simↄ. Ègↄ̃ dabuyã kɛɛ à bↄ̀ Samariadeenↄ saɛ, ben à a zĩnda dìɛ gbɛ̃ bɛ̀ɛdee ũ. 10 Nɛ́ féte gbɛ̃nsi píngi è làakari dↄ à yãa aↄ̃ be: Gbɛ̃ pì nɛ́ gbɛ̃ kɛ̀ wè benɛ Luda Gbãabitadeemɛ. 11 Dabuyã kɛ̀ ègↄ̃ kɛɛ ń tɛ́ zaa gìkɛna ń kũ gbãa. 12 Mↄde kɛ̀ aↄ̃ kpata kɛ̀ bↄ̀ Luda kiia baaru kɛ̀ Filipi kpàńnɛ kↄ̃n Yesu Kirisi tↄ́o mà, aↄ̃ↄ sì, ben aↄ̃ batisi kɛ̀ gↄ̃gbɛ̃nↄ kↄ̃n nↄgbɛ̃nↄ ń píngi. 13 Baa Simↄ yã pì sì à batisi kɛ̀, ben à nà Filipia. Kɛ̀ à dabuyã kↄ̃n gbãa yã bíta kɛ̀ Filipi e kɛɛnↄ è, yã pìnↄ bↄ̀ à saɛ.

14 Kɛ̀ zĩ̀rinↄↄ mà zaa Yerusalɛmu Samariadeenↄ Luda yã sì, aↄ̃ Pita kↄ̃n Yohanao zĩ̀ḿma. 15 Kɛ̀ aↄ̃ kà gwe, aↄ̃ adua kɛ̀ńnɛ lɛ aↄ̃ Luda Nini e yãnzi. 16 Wà ń batisi kɛ̀ yã kↄ̃n Dii Yesu tↄ́o, mↄde Luda Ninii e di aↄ̃ gbɛ̃kearo. 17 Kɛ̀ aↄ̃ ↄ kɛ̀ḿma, ben aↄ̃ Luda Nini è sa. 18 Kɛ̀ Simↄ è aↄ̃ Luda Nini è kↄ̃n zĩ̀rinↄ ↄnammanao, ben à mↄ̀ńnɛ ↄↄo 19 à bè: À ma gba gbãaa pì se, lɛ gbɛ̃ kɛ̀ ma ↄ kɛ̀a é Luda Nini e. 20 Ben Pita bènɛ: N ↄↄ kaatɛnyo, zaakɛ nɛ́ɛ daa nɛ́ ludangbaa lú kↄ̃n ↄↄomɛ. 21 N ↄↄ kú zĩi pì guuro, n baka kú à guuro, zaakɛ n nↄ̀sɛ maa Ludanɛro. 22 Ǹ kpɛɛ li n yã zaaa pìnɛ ǹ adua kɛ Diia, ke eé sùu kɛnyo kↄ̃n n laasuu beee takao gwɛɛ? 23 Zaakɛ má è kɛ̀ sɛwɛɛ kãsãa kú n guu, durun bà kànnɛ. 24 Ben Simↄ bè: À adua kɛmɛ Diia lɛ yã kɛ̀ á ò ke tón ma lero yãnzi.

25 Kɛ̀ Pita kↄ̃n Yohanao Dii sèeda kɛ̀ aↄ̃ à yã dàńnɛ, ben aↄ̃ ɛ̀ara aↄ̃ↄe taa Yerusalɛmu, aↄ̃ↄe baaru nnaa kpaa Samaria lakutunↄ guu pari.

Filipi kↄ̃n Etiopia gbãade keo

26 Dii malaika yã ò Filipinɛ à bè: Ǹ fɛɛ ǹ gá sↄↄmɛtɛ kpa. Ǹ zɛ́ kɛ̀ bↄ̀ Yerusalɛmu à gàa Gaza sɛ́, zɛ́ kɛ̀ bↄ̀ɛ gbáan. 27 Ben à dà zɛ́n. Etiopia gbɛ̃kee tɛ́ zɛ́ pìn. Etiopia bùsu kína kɛ̀ dɛ nↄgbɛ̃ ũu kɛ̀ wè benɛ Kandase bɛgwarimɛ, à auziki dãkparinↄ gbɛ̃nsimɛ. À mↄ̀ à dↄnzi kɛ̀ Yerusalɛmu, 28 ben à lìara èe taa vɛ̃ɛna a sↄ̃goro guu, èe annabi Isaya takada kyó kɛɛ. 29 Ben Luda Nini bè Filipinɛ: Ǹ gá ǹ sↄ̃ sↄ̃goro kɛ̀kãazi. 30 Ben Filipi bàa lɛ̀ à gàa. À mà èe annabi Isaya takada kyó kɛɛ, ben à à là à bè: Ń kyó kɛ̀ nɛ́ɛ kɛɛ bↄkↄ̃tɛ dↄ̃ↄ́? 31 À wèàla à bè: Tó gbɛ̃kee e à bↄkↄ̃tɛmɛro, mɛ́ fↄ̃ mà à dↄ̀rↄ dↄ̃ↄ́? Ben à Filipi sìsi à gɛ̃̀ à vɛ̃̀ɛ à saɛ. 32 Yã kɛ̀ èe à kyó kɛɛ pìn yɛ̀:

Lán sãa kɛ̀ wèe gaa à kòto kpá bà,

lán sãnɛ bↄ̀rↄ kɛ̀ wèe à kã kɛ̃ɛ bà,

à yĩtɛ kpɛ̃ èe lɛ́ wɛ̃kↄ̃aro.

33 Wà wí dàa,

wèe yãkpaɛ kɛo a zɛ́aro.

Dé bé eé fↄ̃ à à gurↄ gbɛ̃nↄ yã oo?

Zaakɛ wà à wɛ̃̀ndi bↄ̀ anduna guu.

34 Ben gↄ̃gbɛ̃ pì bè Filipinɛ: Ǹ omɛ, dé musun annabi yã beee ò sↄ̃ↄ? À zĩndan yↄ́ ke gbɛ̃ pãndemɛ? 35 Naana Luda yã pìa Filipi Yesu baaru nnaa kpànɛ. 36 Kɛ̀ aↄ̃ↄe gaa aɛ, aↄ̃ kà í kiia, ben gↄ̃gbɛ̃ pì bè: Ǹ í gwa kɛ̀. Bↄ́ bé eé kpámɛ mà batisi kɛɛ? 37 Ben Filipi bènɛ: Tó n yã pì sì kↄ̃n nↄ̀sɛo do, nɛ́ fↄ̃. À wèàla à bè: Má sì kɛ̀ Yesu Kirisi nɛ́ Luda Nɛ́mɛ. 38 Ben à bè wà góro zɛ. Ben aↄ̃ plaa ń píngi aↄ̃ pìta wà gɛ̃̀ ín. Ben à à batisi kɛ̀. 39 Kɛ̀ aↄ̃ bikũ̀ baa, ben Dii Nini Filipi kpà guuzi, gↄ̃gbɛ̃ pì e à e dↄro, ben pↄnnaa guu à gɛ̃̀ zɛ́la. 40 Filipi a zĩnda è zɛ Azotu, ben à gàa à Yesu baaru nnaa kpà wɛ́tɛ kↄ̃n wɛ́tɛo ai à gàa à kào Sizarea.