Luda yã takada kↄ̃n Bokobaru yão 2 TIMƆTI 2

Kirisi Yesu zĩ̀kari maaa

1 Mpi sↄ̃ ma nɛ́, ǹgↄ̃ gbãa kↄ̃n gbɛ̃kɛɛ kɛ̀ Ludaa vĩwao Kirisi Yesu guuo. 2 Yã kɛ̀ ń mà má ò parii wáa, ǹ na gbɛ̃ náanɛdeenↄnɛ ń ↄzĩ, kɛ̀ aↄ̃é fↄ̃ wà dada gbɛ̃ pãndenↄnɛ. 3 Ǹ nawɛ̃a fↄ̃wao Kirisi Yesu zĩ̀kari maaa ũ. 4 Anduna yã bↄkↄ̃tɛ è dↄ zĩ̀kari kɛ̀ kú zĩ̀lannɛ aɛro, lɛ à yã ká à diinɛ yãnzi. 5 Bàkpakↄ̃sↄ̃ri sↄ̃, tó èe bàa lɛ́ a zɛ́aro, eé zĩ̀blena fùra ero. 6 À kↄ̃ sìo búbari kɛ̀ zĩ gbãaa kɛ̀ a baka sɛ́ káaku. 7 Ǹ laasuu lɛ́ yã kɛ̀ má ò pìnↄzi, zaakɛ Dii é n gba ↄ̃ndↄ̃ↄ à píngi guu.

8 Ǹ dↄn kɛ̀ Yesu Kirisi nɛ́ Dauda boriimɛ, bensↄ̃ à fɛ̀ɛ bↄna gaan. Baaru nnaa kɛ̀ mɛɛ̀ kpán gwe. 9 Beee yãnzin mɛ́ɛ nawɛ̃a kɛɛzi. Wà mↄ̀ kàma lán dàkɛri bà, mↄde Luda yã e sí mↄ̀ káaro. 10 Beee yãnzi mɛɛ̀ yã píngi fↄ̃ gbɛ̃ kɛ̀ Luda ń sɛ́nↄ yãnzi, lɛ aↄ̃pinↄ se Luda ń mì sí, aↄ̃ gakui kɛ̀ è yãaroo e kuuna Kirisi Yesu guu. 11 Yã kɛ̀kii nɛ́ yãpuraamɛ:

Tó wa gao, wégↄ̃ kúo.

12 Tó wa mɛna fↄ̃̀, wé kí bleo.

Tó wa lɛ́ sɛ̀zi, eé sɛ́wazi se.

13 Tó wá náanɛ vĩro, à kpɛ́ náanɛ vĩ,

zaakɛ eé we à lɛ́ sɛ́ a zĩndaziro.

Dii zĩkɛri maa kↄ̃n lɛokpakↄ̃aoro

14 Ǹ yã pìnↄ dↄ n gbɛ̃nↄn, ǹ nańnɛ Ludazi aↄ̃ton lɛokpakↄ̃a kɛ yãnↄ musuro. À àre vĩro, è gbɛ̃ kɛ̀ aↄ̃ↄe maanↄ yakamɛ. 15 Ǹ aĩa kɛ lɛ Luda n sáabu kpá, zĩkɛri kɛ̀ è yã yãpuraa wɛ̃kↄ̃ańnɛ súusu ũ, kɛ̀ wí è à kũ à zĩ yã musuro. 16 Ǹ pã yãbↄɛna pãa kɛ̀ è kↄ̃ sɛ́ kↄ̃n Luda yãoroonɛ. È gbɛ̃nↄ ludayãdasai kaarańnɛmɛ, 17 ben yã kɛ̀ aↄ̃è dańnɛ è dańla lán fↄ̃̀ bà. Imɛnɛu kↄ̃n Filɛtuo kú ń tɛ́. 18 Aↄ̃ kɛ̃̀ yãpuraaa, aↄ̃è be wà fɛ̀ɛ bↄna gaan kↄ̀, aↄ̃è gbɛ̃kenↄ ludanaanɛkɛna yakańnɛ. 19 Baa kↄ̃n beeeo ɛ̃ɛ kɛ̀ Ludaa dàɛ zɛna gbãa, wà yã kɛ̀kii kɛ̃̀a: Dii gbɛ̃ kɛ̀ aↄ̃ↄ dɛ a pↄ́ ũunↄ dↄ̃. Gbɛ̃ kɛ̀ è Dii sísi mì kɛ̃ yã zaaaa.

20 Ua daa ègↄ̃ pↄ́nↄ vĩ pari. Wà à kenↄ kɛ̀ kↄ̃n vurao kↄ̃n kondogio yãtiisikɛbↄ ũ, bensↄ̃ wà à kenↄ kɛ̀ kↄ̃n lío kↄ̃n gũ̀o yãnɛngokɛbↄ ũ. 21 Tó gbɛ̃ ↄ bↄ̀ɛ yã bɛ̀ɛsaidee guu, eé gↄ̃ yãtiisikɛbↄ ũ, eégↄ̃ aufãni vĩ Diinɛ, eégↄ̃ kú adona maakɛna píngi soru guu. 22 Ǹ bàa sí gↄ̃kparɛ pↄ́nidɛnanↄnɛ, ǹ tó maakɛna kↄ̃n ludanaanɛkɛnao kↄ̃n yenzio kↄ̃n kuuna kↄ̃o nnaao dↄnnɛ aɛ lɛdo kↄ̃n gbɛ̃ kɛ̀ aↄ̃è Dii sísi kↄ̃n nↄ̀sɛ puraaonↄ. 23 Ǹ ↄ bↄɛ mìsai lɛokpakↄ̃a kɛ̀ dↄ̃na ke vĩroon. Ń dↄ̃ kɛ̀ è swèe da. 24 À maa Dii zↄ̀bleri gↄ̃ swèe vĩro. À nↄ̀sɛ gↄ̃ do kↄ̃n baade píngio, yãdannɛri maaa kɛ̀ è gbɛ̃ fↄ̃ ũ, 25 à gbɛ̃ kɛ̀ aↄ̃è à yã síroonↄ gba làakari busɛbusɛ. Wègↄ̃ dↄ̃ro ke Luda é fↄ̃ à ń gba zɛ́ aↄ̃ nↄ̀sɛ liɛ wà yãpura sí, 26 aↄ̃ bↄ Ibilisi kɛ̀ à ń kũ à ń dá a pↄyezi guu bàn, ń làakari suḿma.