Luda yã takada kↄ̃n Bokobaru yão 2 SAMUƐLI 12

Annabi Natã kpãkɛ̃na Daudazi

1 Dii Natã zĩ̀ Daudaa. Kɛ̀ à kà, à bènɛ: Gↄ̃gbɛ̃ gↄ̃ↄn plaa kenↄ bé wà kú wɛ́tɛ ke guu, gbɛ̃ doo nɛ́ auzikideemɛ, gbɛ̃ doo sↄ̃ takaasideemɛ. 2 Auzikidee pì sãanↄ kↄ̃n zùnↄ vĩ paripari, 3 takaasidee pì sↄ̃ pↄ́ke vĩro, sã núnu nɛ́ngo mɛ̀n doken à lù. Ben à dàto ai à bíta kũ̀ à bɛ kↄ̃n à nɛ́nↄ. Aↄ̃ègↄ̃ pↄ́ dↄ̃nkↄ̃ blee aↄ̃ègↄ̃ í mii ta dↄ̃nkↄ̃n, è dàɛ à pↄtɛ, ben èe à gwaa lán a zĩnda nɛ́nↄkparɛ bà. 4 Kɛ̀ nibↄ pìta auzikidee pìa, ben èe we à sãa ke zù kũ̀ a kpàsa guu à nibↄ pì yàari kɛoro. Takaasidee sã núnu nɛ́ngo pìn à sìa à a nibↄ pì yàari kɛ̀o. 5 Ben Dauda pↄ fɛ̃̀ auzikidee pì yã musu maamaa, à bè Natãnɛ: Kↄ̃n Dii kuunao, à kↄ̃ sìo wà gbɛ̃ kɛ̀ yã pì kɛ̀ dɛmɛ. 6 Kɛ̀ à kɛ̀ lɛ, èe à wɛ̃nda gwaro, ɛ̃ndɛ̃ à sãa pì fĩa bo lɛo siigↄ̃. 7 Ben Natã bè Daudanɛ: Ḿbe adee pì ũ. Dii Isarailinↄ Luda bé à yã kɛ̀ ò à bè: Ma n ka Isarailinↄ kí ũ, ma n bↄ Solu ↄzĩ, 8 ben ma n dii pì bɛɛ kpàmma, ma à nↄↄnↄ nànnɛ n ↄzĩ. Ma Isarailinↄ kↄ̃n Yudanↄ kpàmma n gbɛ̃nↄ ũ. Tó beeenↄ kɛ̀mma nɛ́ngo yã, lɛ mà à pãndenↄ kaarannɛ dↄ. 9 Bↄ́yãnzi n kya kà ma yãnzi? N yã kɛ̀ má yeziroo kɛ̀, n Iti bori Uria dɛ̀ kↄ̃n fɛ̃ɛdaao, n à nↄↄ sìa ń sɛ̀. Ń tò Amↄninↄ à dɛ̀ zĩ̀ guu. 10 Zaa gbã̀a yã pãsĩ é kɛ̃ n bɛɛa ziki dↄro, zaakɛ n kya kàmagu, n Iti bori Uria nↄↄ sìa ń sɛ̀. 11 Ben Dii ɛ̀ara à yã kɛ̀ ò dↄ à bè: Ǹ ma! Mɛ́ tó n zĩnda bɛdeenↄ mↄ́nzi kɛnnɛ. Mɛ́ n nↄↄnↄ símma mà ń kpá n gbɛ̃daa kea n wáa, eé daɛńyo gupuraaa. 12 N yã pì kɛ̀ asii guumɛ. Mapi sↄ̃ mɛ́ yã pì kɛnnɛ gupuraaa Isarailinↄ wáa ń píngi.

13 Ben Dauda bè Natãnɛ: Ma durun kɛ̀ Diinɛ. Ben Natã bènɛ: Dii n durun kɛ̃̀mma, nɛ́ garo. 14 Mↄde lán n dↄkɛ Diio maamaa nà kↄ̃n yã pì kɛnao, bee yãnzi nɛ́gↄ̃gbɛ̃ kɛ̀ nↄgbɛ̃ pì ìnyo é gamɛ. 15 Kɛ̀ Natã tà bɛ, ben Dii tò nɛ́ kɛ̀ Uria naↄ̃ↄ ì kↄ̃n Daudao pì gyã kũ̀. 16 Ben Dauda e kúɛ kɛɛ Ludanɛ nɛ́ pì yã musu kↄ̃n lɛ́yinao, gwãavĩ è daɛ tↄↄtɛmɛ. 17 À bɛ gbɛ̃nsinↄ ègↄ̃ zɛàla lɛ aↄ̃ à fɛɛ tↄↄtɛ, mↄde è weziro, è pↄ́ bleńyoro. 18 À gurↄ swɛɛplaadee zĩn nɛ́ pì gà. Vĩa Dauda ìbanↄ kũ̀, aↄ̃ↄe fↄ̃ wà ònɛ kɛ̀ nɛ́ pì gàro. Aↄ̃ bè: Gurↄↄ kɛ̀ nɛ́ pì kuu, wa yã ònɛ, èe wa yã maro. Dian wé onɛ nà sa kɛ̀ nɛ́ pì gà? Eé yã zaaa kɛ. 19 Dauda è a ìbanↄↄ e yã kpãi ookↄ̃nɛ, ben a dↄ̃̀ kɛ̀ nɛ́ pì gàmɛ. À ń lá à bè: Nɛ́ pì gàn yↄ́? Ben aↄ̃ wèàla wà bè: Ee! À gàmɛ. 20 Dauda fɛ̀ɛ tↄↄtɛ à zú ò, à nↄ́si kɛ̀awa à a pↄ́kãsãanↄ lìɛ, ben à gàa à kùɛ Diinɛ a kpɛ́n. Kɛ̀ à ɛ̀ara à tà bɛ, à pↄ́blee gbèka, ben wà kpàa à blè. 21 À ìbanↄ à là wà bè: À kɛ̀ dia nɛ́ɛ yã kɛɛ lɛɛ? Gurↄↄ kɛ̀ nɛ́ pì kuu, n lɛ́ yì n ↄ́ↄ dↄ̀. Kɛ̀ à gà sa, n fɛɛ n pↄ́ blè. 22 À wèńla à bè: Gurↄↄ kɛ̀ nɛ́ pì kuu, ma lɛ́ yì ma ↄ́ↄ dↄ̀, zaakɛ ma bè, ke Dii é ma wɛ̃nda gwa à tó nɛ́ pì gↄ̃ kuu gwɛɛ, dé bé à dↄ̃ↄ? 23 Lán à gà nà sa, bↄ́yãnzin mɛ́gↄ̃ lɛ́yinazi dↄↄ? Mɛ́ fↄ̃ mà à vun yↄ́? Mɛ́ gá à kiiamɛ, mↄde eé ɛara à su ma kiiaro.

24 Dauda a naↄ̃ Basɛba làakari kpàɛnɛ, ben à gàa à dàɛo. À nɛ́ ì gↄ̃gbɛ̃ ũ, ben à tↄ́ kpànɛ Sulemanu. Dii yezi, 25 ben à annabi Natã zĩ̀a à tↄ́ kpà nɛ́ pìnɛ Yɛdidia Dii yenzi pì yãnzi.

Raba sina Amↄninↄa

26 Ai tia Yoabu kpɛ́ e zĩ̀ kaa kↄ̃n Amↄninↄ zaa Raba, ben à kíbɛɛ sì. 27 Ben à gbɛ̃nↄ zĩ̀ Daudaa à bè: Ma zĩ̀ kà kↄ̃n Rabadeenↄ, ben ma ń ítↄkii sìḿma. 28 Ǹ zĩ̀kpɛ kpaaanↄ kakↄ̃a sa, ǹ mↄ́ ǹ liga wɛ́tɛ pìzi ǹ sí. Tó lɛnlo, mɛ́ sí, weé ma tↄ́ kpánɛ. 29 Ben Dauda zĩ̀kpɛɛnↄ kàkↄ̃a ń píngi, à gàa à lɛ̀ɛ Rabaa à sì. 30 Wà ń kína vura fùra gò wà kù Daudanɛ. À tìisi kà kiloo baaakuri, bensↄ̃ gbɛ̀ bɛ̀ɛdee kúa. À wɛ́tɛ pì pↄ́nↄ nàkↄ̃a maamaa, 31 ben à gbɛ̃ kɛ̀ aↄ̃ↄ kú gweenↄ kũ̀kũ à bↄ̀ɛńyo, à ń dá sagasigi zĩin kↄ̃n diga zĩio kↄ̃n kpása zĩio, bensↄ̃ à tò aↄ̃ kúnku bↄ̀. Lɛn à kɛ̀ Amↄni wɛ́tɛnↄnɛ lɛ píngi, ben à ɛ̀ara à tà Yerusalɛmu kↄ̃n a zĩ̀kpɛɛnↄ ń píngi.