Luda yã takada kↄ̃n Bokobaru yão 1 TIMƆTI 6

1 Gbɛ̃ kɛ̀ aↄ̃ↄ dɛ zↄ̀ ũunↄ ń diinↄ diɛ gbɛ̃ bɛ̀ɛdeenↄ ũ aↄ̃ mì siɛńnɛ à píngi guu, lɛ wàton Luda tↄ́ kↄ̃n yã kɛ̀ weè dańnɛo zaa boro yãnzi. 2 Gbɛ̃ kɛ̀ aↄ̃ diinↄ dɛ Yesudee ũunↄ tón dↄkɛńyo kɛ̀ aↄ̃ↄ dɛ kↄ̃ gbɛ̃nↄ ũ yãnziro. Aↄ̃ zĩi kɛńnɛ maamaa, zaakɛ gbɛ̃ kɛ̀ aↄ̃ↄe ń zĩ àre bleenↄ nɛ́ Yesudeenↄmɛ, aↄ̃ gbɛ̃ yenzideenↄmɛ. Ǹ yã pìnↄ dańnɛ, ǹ lɛ́ daoḿma.

Yena ↄↄzi

3 Tó gbɛ̃kee e yã pãnde daańnɛ, bensↄ̃ èe zɛ kↄ̃n wa Dii Yesu Kirisi yãzɛdeeo kↄ̃n wa zɛ́ yãdannɛnaoro, 4 wadadeemɛ, à yãke dↄ̃ro, lɛokpakↄ̃a kori kↄ̃n yãgwana yãanasaio à kũ̀ gyãa ũ. Yã beeenↄ è tó gbɛ̃nↄ wɛ́ɛ dↄkↄ̃nɛ, aↄ̃ swèe kɛ, aↄ̃ kↄ̃ sↄ̃sↄ̃, aↄ̃ laasuu zaaa lɛ́kↄ̃zi, 5 aↄ̃gↄ̃ ĩi kↄ̃o. Gbɛ̃ pìnↄ laasuu kotina, yãpura ń kɛ̃, aↄ̃ègↄ̃ daa dↄnzizɛ nɛ́ ↄↄwɛtɛzɛmɛ. 6 Dↄnzikɛna àre bíta yãpura, tó gbɛ̃ zɛ̀ kↄ̃n pↄ́ kɛ̀ à vĩio. 7 Zaakɛ wée mↄ́ kↄ̃n pↄ́keo anduna guu kɛ̀ro, wé sↄ̃ tá kↄ̃n pↄ́keoro. 8 Tó wá pↄ́ble kↄ̃n pↄ́kãsãanↄo vĩ, beee mↄ̀. 9 Gbɛ̃ kɛ̀ aↄ̃ↄ yezi wà gↄ̃ auzikidee ũunↄ è ń zĩnda da yↄ̃agwana takutɛɛn. Pↄ́nidɛna mìsai kari è gɛ̃ńgu à ń kpá mↄ́nzi kↄ̃n kaatɛnaozi. 10 Yena ↄↄzi bé à dɛ yã zaa píngi kãsãa ũ. Gbɛ̃kenↄ à kↄ̃dɛɛ kɛ̀ ai wà kɛ̃̀ wa dↄnzizɛa aↄ̃ wãwã bíta kpà ń zĩndazi.

Ǹ ↄsi maaa ká

11 Zaakɛ Luda gbɛ̃n n ũ, ǹ bàa sí yã pìnↄnɛ, ǹ tó yã maaa gaegↄ̃ dↄↄnnɛ aɛ kↄ̃n yãkɛna a zɛ́ao kↄ̃n ludanaanɛkɛnao kↄ̃n yenzio kↄ̃n mɛnao kↄ̃n busɛkɛɛo. 12 Ǹ wa dↄnzizɛ ↄsi maaa ká, ǹ wɛ̃̀ndi kɛ̀ è yãaro sí, zaakɛ beeen Luda n sisia gurↄↄ kɛ̀ n lɛ́ maaa gbɛ̃̀nɛ parii wáa. 13 Ma nannɛ Luda kɛ̀ è wɛ̃̀ndi kpá pↄ́ píngiazi kↄ̃n Kirisi Yesu kɛ̀ yã maaa ò Pↄntiu Pilatinɛo, 14 ǹgↄ̃ yã kɛ̀ wà dìɛnnɛ kũna gbãsĩ sai taari sai ai wa Dii Yesu Kirisi mↄ́gurↄↄ zĩ. 15 Gbãade mɛ̀n do Aubarikade, kínanↄ Kína, diinↄ Dii bé eé Kirisi pì bↄ gupuraaa a gurↄↄa. 16 À mɛ̀n doo bé è garo, ègↄ̃ kú gupuraa kɛ̀ wè fↄ̃ wà sↄ̃ziroo guu. Gbɛ̃kee e wɛ́ɛ siàlɛro, weé fↄ̃ sero. Àmbe à gakui kↄ̃n gbãaao vĩ gurↄ píngi, aami.

17 Ǹ o anduna tiaa kɛ̀kii auzikideenↄnɛ, aↄ̃ton ĩa dãro. Aↄ̃ton gbãa e ↄↄda náanɛsaiaro, aↄ̃ gbãa e Luda kɛ̀ è pↄ́ píngi kpáwa bíta wà pↄnnaa kɛoa. 18 Ǹ ońnɛ aↄ̃ à maaa kɛ, aↄ̃ nnaa kɛńnɛ, aↄ̃ ↄ porońnɛ, aↄ̃gↄ̃ gbɛ̃kɛɛ vĩ. 19 Lán beee bà aↄ̃é kũsãɛ maaa di ń zĩndanɛ auzɛnna pↄ́ ũ, aↄ̃é wɛ̃̀ndi kɛ̀ dɛ wɛ̃̀ndi ũ yãpuraa e.

20 Timↄti, ǹ yã kɛ̀ Ludaa nànnɛ n ↄzĩ kũ gbãa. Ǹ mì kɛ̃ ludadↄ̃sai yã pãpã'onaa kↄ̃n yãlɛkpɛɛ'ona kɛ̀ wè be dↄ̃nao. 21 Gbɛ̃kenↄ zɛ̀o, ben aↄ̃ pã̀ wa dↄnzizɛnɛ.

Luda gbɛ̃kɛɛ kɛare.