1 Siria kí Bɛnadada a zĩ̀kpɛɛnↄ kàkↄ̃a ń píngi. Kí gↄ̃ↄn baaakuri awɛɛplaaanↄↄ kúo kↄ̃n ń sↄ̃nↄ kↄ̃n ń sↄ̃goronↄ. Ben aↄ̃ gàa wà lìga Samariazi aↄ̃ lɛ̀ɛa. 2 Ben à gbɛ̃nↄ zĩ̀ Ahabua wɛ́tɛ guu à bè: Ma Bɛnadada ma bè, 3 n kondogi kↄ̃n n vurao gↄ̃̀ ma pↄ́ ũ. N nↄ maaanↄ kↄ̃n n nɛ́ maaanↄ gↄ̃̀ ma pↄ́ ũ dↄ. 4 Ben Isarailinↄ kína bè: Ma dii kí, mapi kↄ̃n pↄ́ kɛ̀ má vĩinↄ gↄ̃̀ n pↄ́ ũ píngi lán ń ò nà. 5 Ben Bɛnadada ɛ̀ara à gbɛ̃nↄ zĩ̀a dↄ à bè: Ma Bɛnadada ma gbɛ̃nↄ zĩ̀ ma n kondogi kↄ̃n n vurao kↄ̃n n nↄↄnↄ kↄ̃n n nɛ́nↄ làmma. 6 Zia mↄndaa'i mɛ́ ma gbɛ̃nↄ zĩmma aↄ̃ n bɛɛ kpokɛ kↄ̃n n gbɛ̃nↄ bɛɛnↄ, aↄ̃é a pↄ́ bɛ̀ɛdeenↄ sɛ́ɛ wà suomɛ píngi. 7 Ben Isarailinↄ kína a bùsu gbɛ̃nsinↄ sìsi ń píngi à bèńnɛ: Á è lán èe ma lɛ́ wɛtɛɛo nàↄ́? Kɛ̀ à gbɛ̃nↄ zĩ̀ma, à ma nↄↄnↄ kↄ̃n ma nɛ́nↄ kↄ̃n ma kondogio kↄ̃n ma vurao làma, mɛ́ɛ gíonɛro. 8 Ben gbɛ̃nsi pìnↄ kↄ̃n gbɛ̃ kpaaanↄ bènɛ: Ǹton à yã maro, ǹton wenɛro. 9 Ben à bè Bɛnadada zĩ̀rinↄnɛ: À gá à o ma dii kínɛ, pↄ́ kɛ̀ à là mamↄma a zↄ̀bleria káakun mɛ́ kɛ. Pↄ́ kɛ̀ à làma zãa kɛ̀kiin mɛ́ kɛro. Ben zĩ̀ri pìnↄ ɛ̀ara wà gàa Bɛnadadaa kↄ̃n lɛ́kpãsã pìo. 10 Ben à ɛ̀ara à gbɛ̃nↄ zĩ̀ Ahabua dↄ à bè: Tó Samaria bùsuti gↄ̃̀ à kà kɛ̀ ma gbɛ̃nↄ e à kↄkↄ ↄkũ doodo, tãanↄ yã kɛmɛ pãsĩpãsĩ! 11 Ben Isarailinↄ kína bè: À gá à onɛ, gbɛ̃ kɛ̀ èe zĩ̀ka'uta daa tón ĩa dã lán gbɛ̃ kɛ̀ uta pì bↄ̀ à kàɛ bàro. 12 Kɛ̀ Bɛnadada yã pì mà gurↄↄ kɛ̀ èe í mii kↄ̃n a kína daanↄ ń bisakutaanↄ guu, ben à bè a gbɛ̃nↄnɛ aↄ̃ soru kɛ. Ben aↄ̃ gàa soru kɛ.

13 Annabi ke mↄ̀ à Isarailinↄ kí Ahabu lè à bènɛ: Dii bè, n zĩ̀kpɛ parii kɛ̀gweenↄ èↄ́? É ń nannɛ n ↄzĩ gbã̀a, nɛ́gↄ̃ dↄ̃ kɛ̀ ámbe Dii ũ. 14 Ben Ahabu à là à bè: Dé bé eé beee kɛɛ? À wèàla à bè: Dii bè, n bùsu gu gbɛ̃nsinↄ ↄ̀wazi zĩ̀karinↄ bé wé kɛ. Ben Ahabu à là dↄ: Dé bé eé na zĩ̀a káakuu? À wèàla à bè: Ḿbee! 15 Ben Ahabu gu gbɛ̃nsinↄ ↄ̀wazi zĩ̀kari pìnↄ kàkↄ̃a gↄ̃ↄn wàa do kpɛ́ baaakuri awɛɛplaa. Ben à a zĩ̀kpɛɛnↄ kàkↄ̃a ń píngi, aↄ̃ kɛ̀ gↄ̃ↄn bↄrↄ swɛɛplaa. 16 Aↄ̃ fɛ̀ɛ wɛ́tɛn ↄfãntɛ̃o di mìdangura, gurↄↄ kɛ̀ í e Bɛnadada kↄ̃n a kína daa pìnↄ dɛɛ ń bisakutaanↄ guu. 17 Ben gu gbɛ̃nsinↄ ↄ̀wazi zĩ̀kari pìnↄ bↄ̀ɛ káaku. Ben Bɛnadada zĩ̀rinↄ gàa wà ònɛ, gbɛ̃nↄↄ e bↄↄ Samaria. 18 Ben Bɛnadada bè: Tó aafian aↄ̃ↄe mↄↄn yoo ke kↄ̃n zĩ̀o, à ń kũkũ bɛ̃ɛ. 19 Kɛ̀ gu gbɛ̃nsinↄ ↄ̀wazi pìnↄ bↄ̀ wɛ́tɛ guu, zĩ̀kpɛɛnↄↄ tɛ́ ń kpɛɛ, 20 ben aↄ̃ baade a ibɛɛ dɛ̀. Kɛ̀ Sirianↄ lɛ̀kↄ̃a, ben Isarailinↄ pɛ̀ḿma, ben Siria kí Bɛnadada kↄ̃n a sↄ̃de kenↄ bàa sì wà ń kɛ̃ sↄ̃ musu. 21 Ben Isarailinↄ kína bↄ̀ à gàa à sↄ̃deenↄ kↄ̃n sↄ̃gorodeenↄ dɛ̀dɛ à Sirianↄ ásaru kɛ̀ maamaa. 22 Annabi pì ɛ̀ara à mↄ̀ à Isarailinↄ kína lè à bè: Ǹ n zĩ̀kpɛɛnↄ kaara ǹgↄ̃ kú kↄ̃n soruo, zaakɛ tó Sɛ̃̀tãntɛ̃ kà, Sirianↄ kína é ɛara à mↄ́ lɛ́ɛmma dↄ.

23 Ben Sirianↄ kína ìbanↄ bènɛ: Isaraili tãanↄ nɛ́ sĩ̀sĩ tãanↄmɛ. Beee yãnzin aↄ̃ gbãaa dɛwalazi. Tó wée zĩ̀ kaańyo gusararaan, wa gbãaa égↄ̃ dɛńla. 24 Ǹ n kína daanↄ lendee kpá, nɛ́ dↄn'aɛde pãndenↄ diɛdiɛ ń gbɛ̀n. 25 Séde n zĩ̀kpɛɛnↄ kↄ̃n n sↄ̃nↄ kↄ̃n n sↄ̃goronↄ gↄ̃ pari lán káakupↄ kɛ̀ n korazinↄ bà, wé zĩ̀ káńyo gusararaan, wa gbãaa égↄ̃ dɛńla. Kína ń yã mà, ben à kɛ̀ lɛ.

26 Kɛ̀ Sɛ̃̀tãntɛ̃ kà, Bɛnadada Sirianↄ kàkↄ̃a, ben à gàa zĩ̀ ká kↄ̃n Isarailinↄ zaa Afɛki. 27 Wà Isarailinↄ kàkↄ̃a wà kũsãɛ kɛ̀ńnɛ, ben aↄ̃ gàańzi. Sirianↄ dàgula baama píngi, ben Isarailinↄ bùra kàɛ lán blè kpàsa nɛ́ngo sɛtɛɛgɛ lɛo plaaanↄ bà, wà aɛ dↄ̀kↄ̃a. 28 Ben Luda gbɛ̃ pì mↄ̀ à bè Isarailinↄ kínanɛ: Dii bè, zaakɛ Sirianↄↄ e daa sĩ̀sĩnↄ diin a ũ, guzurɛ diin a ũro, é à zĩ̀kari parii kɛ̀kiinↄ nannɛ n ↄzĩ, nɛ́gↄ̃ dↄ̃ kɛ̀ ámbe Dii ũ. 29 Aↄ̃ bùranↄ aɛ dↄdↄkↄ̃a lɛ ai gurↄ swɛɛplaa, à gurↄ swɛɛplaadee pìn aↄ̃ nà zĩ̀a. Ben Isarailinↄ Siria kɛ̀sɛdeenↄ dɛ̀dɛ gↄ̃ↄn bↄrↄ basↄↄro zĩ pìa. 30 Kɛ̀ gbɛ̃ kpaaanↄ lɛ̀kↄ̃a wà sì Afɛki wɛ́tɛn, ben à bĩi lɛ̀ɛ à sìḿma. Gbɛ̃ pìnↄ kà gↄ̃ↄn bↄrↄ baaasↄↄro awɛɛswɛɛplaa. Bɛnadada sↄ̃ bàa sì à sì wɛ́tɛ pìn se, à gàa à ùtɛ kpɛ́tu. 31 Ben à ìbanↄ bènɛ: Wá mà Isarailinↄ kínanↄ gbɛ̃kɛɛ vĩ. Wà pↄsia utanↄ dↄ wa pii, wà bà dↄ wa waalɛ, wà bↄ wà gá wà à le. Wègↄ̃ dↄ̃ro ke eé n tó wɛ̃̀ndio. 32 Ben aↄ̃ pↄsia utanↄ dↄ̀ ń pii, aↄ̃ bà dↄ̀ ń waalɛ, aↄ̃ gàa wà Isarailinↄ kína lè wà bè: N zↄ̀bleri Bɛnadada bè ǹ a tó wɛ̃̀ndio. Ben Isarailinↄ kína bè: Ase à kpɛ́ kuuↄ́? Ma gbɛ̃mɛ. 33 Yã pì kɛ̀ gbɛ̃ pìnↄnɛ àisi maaa ũ, ben aↄ̃ yã pì dã̀ wà kũ̀ wà bè: Ee, Bɛnadada nɛ́ n gbɛ̃mɛ. Ben kína bè: À gá à à sɛ́ à suo. Kɛ̀ Bɛnadada sù, ben Ahabu bènɛ à gɛ̃ao a sↄ̃goron. 34 Ben Bɛnadada bènɛ: Wɛ́tɛ kɛ̀ ma de sì n deanↄ mɛ́ ɛara mà sↄkpannɛ, nɛ́gↄ̃ laa yaa Damasiku lán ma dee kɛ̀ nà Samaria. Ben Ahabu bè: Wà lɛdolɛ kɛ beee musu, mɛ́ n gbarɛ. Ben à lɛdolɛ kɛ̀o à à gbàrɛ.

35 Dii bè annabi gãli gbɛ̃kenɛ à o a gbɛ̃daaanɛ à a lɛ́. Kɛ̀ annabi pì ònɛ, ben à gì. 36 Ben à bènɛ: Zaakɛ nɛ́ɛ Dii yã maro, tó wa kɛ̃kↄ̃a gↄ̃ↄ, músu é n dɛmɛ. Kɛ̀ aↄ̃ kɛ̃̀kↄ̃a, ben músu à è à dɛ̀. 37 Annabi pì gbɛ̃ke è dↄ, ben à bènɛ à a lɛ́. Ben à à lɛ̀ à kɛ̃̀nna. 38 Ben annabi pì bisa kù a wɛ́ɛla à a zĩnda lìɛ, ben à gàa èe kína dãa zɛ́ lɛ́a. 39 Kɛ̀ kína e gɛ̃tɛɛ, ben annabi pì lɛ́ zùzi à bè: Mamↄma n zↄ̀bleri, kɛ̀ ma gaa zĩ̀lan, ben gbɛ̃ke mↄ̀ ma kiia kↄ̃n gↄ̃gbɛ̃ keo, à bè màgↄ̃ à dãkpaa. Tó má tò à pìtimagu, ma wɛ̃̀ndi musu, kesↄ̃ mà fĩa bo kↄ̃n kondogio kiloo baplaa sↄↄrosai. 40 Kɛ̀ ma làakari tà gu pãndea, ben gↄ̃gbɛ̃ pì gɛ̃̀ zɛ́la. Ben Isarailinↄ kína bènɛ: Lán weé wɛ́ɛ tãmma nàn ń ò gwe. 41 À bisa pì gò a wɛ́ɛla kpakpaa, ben Isarailinↄ kína à dↄ̃̀ annabi ũ. 42 Ben annabi pì bènɛ: Dii bè, zaakɛ n gↄ̃gbɛ̃ kɛ̀ á dìɛ à gaa gbàrɛ, nɛ́ ga à gɛ̃ɛ ũ, n gbɛ̃nↄ é gaga à gbɛ̃nↄ gɛ̃ɛ ũ. 43 Ben Isarailinↄ kína dà zɛ́n à tà a bɛ zaa Samaria. À nↄ̀sɛ yàka à uu sìsi.