Bibeli Luayãtaalá Soũↄ 71

71

Mae zↄ̃ↄ wabikɛa Luawa

1 Dii, ma nanziɛ,

ńsu to wí ma kũ bauo.

2 Ma misi, ma bↄ n maakɛa yã́i,

swã́kpamazi, ma suaba.

3 Ma gbɛsi pↄ́ máli gɛ́ ulɛi a guun n ũ.

Ń dìlɛ ǹ ma suaba,

asa ma gbɛsi ń ma zɛgikĩion n ũ.

4 Ma Lua, ma bↄ vãikɛnaↄ ↄzĩ,

ma si gbɛ̃́ bɛ̃̀ɛ pãsĩↄwa.

5 Ḿmɛ ma wɛ́ dↄnzi, Dii Lua,

ḿmɛ má n náai vĩ za ma ɛ̀waasogↄↄ.

6 Ma sↄ̃ kpálɛanzi za nɛasakpɛuɛ,

ḿmɛ n ma bↄ ma da nↄ̀sɛu.

N táasi miↄ lɛ gↄↄpii.

7 Ma kua dɛ yãbↄnsaɛ ũ gbɛ̃́ dasideɛ,

asa ḿmɛ ń ma ulɛkĩi gbãa ũ.

8 N táasilɛa ìↄ dↄ ma lɛ́u,

miↄ n maabo kↄↄ ń oosio.

9 Ńsu pãkpamazi ma zikũa yã́io,

ńsu ma vũaa ma gbãa láaa yã́io.

10 Asa ma ibɛɛↄ lɛ́ ma yã'o,

ma wɛ̀lɛↄ lɛ́ lɛkpaaĩ ma wɛ̃nibↄai.

11 Aa mɛ̀: Lua gìaàziɛ,

wà aà ya kṹ,

gbɛ̃e ku à aà suabao.

12 Lua, ńsu ǹyↄ̃ kumanↄ zã̀o,

ma Lua, kɛ kpakpa mↄ dↄmalɛ.

13 To wí gbɛ̃́ pↄ́ lɛ́ yãdↄaↄ kṹ,

aa midɛ,

to sↄ̃́sↄ̃a da gbɛ̃́ pↄ́ lɛ́ ĩadaaↄla,

an tↄ́ ↄ̃̀ↄkpa.

14 Mapi sↄ̃, ma wɛ́ ìↄ dↄnzi láasaiɛ,

miↄ n táasilɛ màↄ gɛ́.

15 N maakɛa aↄ dↄ ma lɛ́u gↄↄpiiɛ

ń n gbɛ̃suabaa pↄ́ má a lɛ́ dↄ̃oo.

16 Má mↄ mà Dii Lua gↄ̃sakɛyãↄ galikɛ,

n mɛ̀ndo maakɛa má dↄ gbɛ̃́ↄgu.

17 N yãdàdamɛɛ za ma ɛ̀waasogↄↄ,

Lua, e tia málɛ n yãbↄnsaɛↄ o'o.

18 Baa kɛ́ ma zikũ̀, ma mikã pua,

ńsu ma to weo, Lua,

kɛ́ mà e n gbãa galikɛ tiadeↄnɛ,

mí n gↄ̃sakɛyã dau siu gbɛ̃́ pↄ́ aalɛ fɛlɛↄnɛ.

19 Lua, n maakɛa zↄ̃̀ma,

n yãzↄ̃ↄkɛ̀, démɛ muaannↄi?

20 Ń tò taasi pãsĩ ma le dasidasi,

ãma ńyↄ̃ ɛa ǹ ma gba wɛ̃ni,

ńyↄ̃ ɛa ǹ ma bↄ tↄↄlɛ nↄnau.

21 Ńyↄ̃ ma bɛɛɛ kã́fĩmɛɛ,

ńyↄ̃ ɛa ma nↄ̀sɛ nínimɛɛ lↄ.

22 Ma Lua, má n sáaukpa ń mↄↄnao n náai yã́i.

Isailiↄ Lua pↄ́ n kua adoa, má n táasilɛ ń kúuo.

23 Gula aↄ dↄ ma lɛ́u.

Ma gbɛ̃́ pↄ́ n ma mìsi,

má n táasilɛ.

24 Máↄ n maakɛa o gↄↄpiiɛ,

asa wí gbɛ̃́ pↄ́ lɛ́ ma vãi wɛɛlɛↄ kũ̀,

an gɛɛ gↄ̃̀ kpá ń wɛ́i.