Bibeli Luayãtaalá Yobu 41

Yobu
<
41
>

41

1 Tó ńlɛ e ńyↄ̃ aà kũɛ,

ńlɛ nzĩa sãsãɛ,

tó n wɛsìaàlɛ, ńyↄ̃ gↄ̃ zɛ sã̀iiɛ.

2 Lá gbɛ̃e wↄ́ↄ i ka à to aà go a tíao,

démɛ a fↄ̃ zɛ ma aɛ sↄ̃i?

3 Démɛ a fↄ̃ ma le à o ma fĩaboɛi?

Pↄ́ pↄ́ kú dṹniau píiá ma pↄ́ɛ.

4 Má gí kwãsapi gbáↄ yã'oio

ge aà gↄ̃sakɛ ge aà kɛfɛnkɛ.

5 Démɛ a fↄ̃ à aà tɛɛ woloi?

Démɛ a we ã̀asĩna kaɛ̀i?

6 Démɛ a we à aà lɛ́ wɛ̃aai?

Aà swaa aà lɛ́ pà mɛ́ a kai vĩ.

7 Aà tɛɛ dɛ lán sɛ̀ngbaoↄwa aà kpɛsɛa,

a daaĩa sàlala fòonasai dↄ̀ↄdↄↄ.

8 Aà tɛɛpiↄ nanaakↄ̃waɛ,

baa ĩ́ana lí gɛ̃kĩi euo.

9 Aa pɛ́pɛakↄ̃wa gíũgiũɛ,

aa kɛ̃aaakↄ̃wa vĩo.

10 Tó à nisã̀, gu ì puɛ,

aà wɛ́ dɛ lán ĩatɛ̃ bilɛa kↄↄkↄↄwa.

11 Tɛ́vua ì pípi aà lɛ́u,

tɛkↄna ìↄ bↄlɛu.

12 Súɛlɛ ìↄ bↄlɛ aà níu

lán lá ísi tɛ́ pↄ́ wà oo dìwà súɛlɛwa.

13 Aà lɛ́'ĩana ì to sĩsĩↄna tɛ́sɛ,

tɛ́lɛpiↄ ì bↄ aà lɛ́u.

14 Aà gbãa ku aà waauɛ,

gbɛ̃́ pↄ́ kpàaũaànↄ píi ì tolootolooboɛ.

15 Aà báasi ì didikↄ̃a,

ì nawà gbã́ugbãu, ìli deeo.

16 Aà kùa gbãa lán gbɛwa,

lán wísilↄgbɛdawa.

17 Tó à fɛ̀lɛ, sↄ̃ ì kɛ̃ nɛgↄ̃naↄguɛ,

aaì kpákpakↄ̃a aaìↄ kua gɛ́kĩiwa.

18 Fɛ̃nda pↄ́ wa lɛ̀ò píi, ìli bↄwào

ge sↄ̃na ge ka ge saa.

19 Ì mↄsi dilɛ lán gàwatonawaɛ,

mↄgotɛ̃ ìↄ dɛɛ̀ lán lí mùaawa.

20 Ìli bàalɛ kaɛo,

gbɛma gbɛ ìↄ dɛɛ̀ lán ésemisinawaɛ.

21 Ìↄ go gwa lán sɛ̃̀ giiwaɛ,

sↄ̃na kↄ̃fĩ ìↄ dɛɛ̀ yaalↄyã ũɛ.

22 Aà gbɛɛ tɛɛ dɛ lán zàkologbawaɛ,

a ia ìↄ tɛ bɛ̀lɛau lán zusoon guwibↄwa.

23 Ì í bilɛ títiu lán í piaoouwa,

ì ísipi ya lán nísi ikpaawa.

24 Í seena ìↄ tɛ aà kpɛɛ,

ísipi ì ya aà kpɛ púuu.

25 Aà sáa kú dṹnia guuo,

ma pↄkɛaↄ guu ↄ̃mɛ vĩa vĩo.

26 Ì pↄ́ pↄ́ aalɛ e wa kaↄ dilɛ pãɛ,

ↄ̃mɛ nↄ̀ↄ tↄdeↄ kía ũ.

Yobu
<
41
>